Лъэпкъ проектхэр
Гъогухэм язытет зэрагъашIэ
[caption id="attachment_132211" align="aligncenter" width="800"] Сурэтыр: «Адыгеяавтодорыр».[/caption]
«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыщыдэлъытагъэу агъэцэкIэжьырэ гъогухэм язытет агъэкощырэ лабораториехэмкIэ ауплъэкIу.
Адыгеим игъогухэр языгъэгъэцэкIэжьырэ «Адыгеяавтодорымрэ» муниципальнэ образованиехэм яадминистрациехэмрэ ащ фэдэ лабораториеу бгъэфедэмэ нахьышIум икъыхэхын мэхьанэ раты. Ащ фэшI «Росдортехнология» зыфиIорэ ГъэIорышIапIэм ащ фэдэ псэуалъэхэр тигъогухэм ащеушэтых, зэрегъапшэх.
Мызыгъэгум ушэтын IофшIэнхэм апае Мыекъуапэ икIэу къалэу Лабинскэ кIорэ федеральнэ гъогоу джырэблагъэ агъэкIэжьыгъэр къыхахыгъ. Ащ щыщэу километритIу ашти, асфальтыр зэщизэу телъымэ, ар мытэкъожьыным пае шIыкIэу агъэфедагъэхэр, гъогу конструкциехэм япытагъэ Урысыем къыщашIыгъэ къекIокIырэ лабораториехэмкIэ ауплъэкIугъ. Оборудованиеу ащ хагъэлэжьагъэхэр къалэхэу Москва, Санкт-Петербург, Самарэ, Саратов ыкIи Шъачэ къащашIыгъэх. Лабораторие пэпчъ ищыкIэгъэ приборхэмкIэ зэтегъэпсыхьагъ, ау ахэм IэкIыб къэралхэм къащашIыгъэу зыпари ахэтэп.
«Росдортехнологием» диагностикэмкIэ иотдел ипащэу Арсен Бар-Слива къызэриIуагъэмкIэ, ащ фэдэ техникэ къыдэзыгъэкIырэ хъызмэтшIапIэ пэпчъ ар зызэхигъэуцокIэ, гъогум изытет иуплъэкIунхэр зызэхищэхэкIэ, шIыкIэу ыгъэфедэхэрэмкIэ шъэф иI. Командэу ушэтынхэм ахэлажьэу, лабораториехэр къэзыгъэлъагъохэрэм а зы уахътэм, а зы чIыпIэм ахэр ащаушэтых. Арышъ, мы Iофтхьабзэм пшъэрылъ шъхьаIэу иIэр ахэм къагъэлъэгъуагъэр анализ ышIынышъ, зэригъэпшэнхэр ары.
Гъогур зыгъэфедэрэ водительхэмкIэ анахь шъхьаIэр ахэм язытет оборудование анахь дэгъухэмкIэ уплъэкIугъэ хъуныр ары.
[caption id="attachment_132212" align="aligncenter" width="800"]
Сурэтыр: «Адыгеяавтодорыр».[/caption]
Километри 3,1-рэ агъэцэкIэжьыщт
«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу 2023-рэ илъэсым гъогу Iахьитф Мыекъопэ районым щагъэцэкIэжьыщт.
Поселкэу Табачнэм екIурэ гъогоу километри 3,1-рэ хъурэмкIэ рагъэжьагъ. Проектым ишIуагъэкIэ ар федеральнэ шапхъэхэм адиштэу ашIыщт.
ГъогушI ГъэIорышIапIэу N-у 3-р ары IофшIэнхэр зэшIозыхыхэрэр. ХъызмэтшIапIэм асфальтыр ежь къешIы, температурэу ищыкIагъэм дэмыхыным фытегъэпсыхьэгъэ техникэр иI.
IофшIэнхэр зэрэзэшIуахыхэрэм «Адыгеяавтодорыр» лъэплъэ. Ащ испециалистхэм къызэраIуагъэмкIэ, мы подрядчикым илъэсыбэ хъугъэу тишъолъыр игъогухэм Iоф ащешIэ, сыдигъокIи ипшъэрылъхэр егъэцакIэх.
Поселкэм екIурэ гъогум асфальтэу телъыр зэрагъэкIэжьырэм имызакъоу, тамыгъэу тетхэр зэблахъух, общественнэ транспортым иуцупIэхэр зэтырагъэпсыхьажьых, лъэсрыкIо гъогухэр агъэцэкIэжьых.
Мы гъогум изытет поселкэм дэсхэмкIэ мэхьэнэ ин иI — еджапIэм, кIэлэцIыкIу IыгъыпIэм, ФАП-м яекIолIапIэхэр ащ къыхэкIых.
Сурэтхэр: «Адыгеяавтодорыр».