Хэхъоныгъэхэр ашIынхэм иIахьышIу хэлъ
Мыекъопэ къэралыгъо технологическэ университетым иректорэу Къуижъ Саидэ Армением щыкIогъэ научнэ-практическэ конференцием хэлэжьагъ. Шъолъырым экономикэмкIэ хэхъоныгъэхэр ышIынхэм апшъэрэ еджапIэм иIахьышIу зэрэхэлъыр ащ къыщиIуагъ.
[caption id="attachment_132200" align="aligncenter" width="800"]
МКъТУ-м ипресс-къулыкъу.[/caption]
Конференциер Армением и Лъэпкъ аграрнэ университет щыкIуагъ. Урысыем, Армением ыкIи Грузием яапшъэрэ еджапIэхэм ялIыкIохэр ыкIи предпринимательствэм епхыгъэ организациехэм ащыщхэр хэлэжьагъэх. Дунэе опытыр ыкIи гъэхъагъэу ашIыгъэхэр къызфагъэфедэхэзэ джырэ лъэхъаным экономикэм хэхъоныгъэхэр ышIынхэм пае ашIэн фаем къэзэрэугъоигъэхэр тегущыIагъэх.
Экономикэм гухэлъыкIэхэр хэгъэхьэгъэнхэм ыкIи технологическэ предпринимательствэм IэпыIэгъу фэхъугъэным мэхьэнэ ин зэряIэр тикъэралыгъо къытыралъхьэгъэ санкциехэм къагъэлъэгъуагъ. ШIэныгъэмрэ ныбжьыкIэхэм ячаныгъэрэ зэготэу технологическэ предпринимательствэм хэхъоныгъэ ышIынымкIэ апшъэрэ еджапIэхэм мэхьанэшхо яI.
[caption id="attachment_132201" align="aligncenter" width="800"] МКъТУ-м ипресс-къулыкъу.[/caption]
Мыекъопэ къэралыгъо технологическэ университетыр къызызэIуахыгъэр мыгъэ илъэс 30 мэхъу. Урысыем и Къыблэ ыкIи Адыгеим яэкономикэ хэхъоныгъэхэр ышIынхэр ары ар къызкIызэIуахыгъэр. Анахьэу мэкъу-мэщым, гъомылэпхъэшI производствэм, зекIоным ыкIи экологием ар афытегъэпсыхьагъ. Псауныгъэр къэухъумэгъэным епхыгъэ сэнэхьатхэр зыщызэрагъэгъотырэ лъэныкъохэри къыщызэIуахыгъэх. Технологическэ предпринимательствэм хэхъоныгъэ егъэшIыгъэнымкIэ проект пчъагъэ щыIэныгъэм щыпхыращыгъ. Конференцием ахэм ягугъу къыщишIыгъ Мыекъопэ къэралыгъо технологическэ университетым иректорэу Къуижъ Саидэ.
Шъолъырым ииновационнэ системэ, технологическэ предпринимательствэм хэхъоныгъэхэр ашIынхэм университетым иIахьышIу хэлъ. Апшъэрэ еджапIэм студентхэм ыкIи кIэлэегъаджэхэм яшIэныгъэ зэрэщыхагъахъорэм дакIоу федеральнэ проект инхэм ахэлажьэ. 2017-рэ илъэсым къыщегъэжьагъэу студентхэр проектнэ куп зэфэшъхьафхэм ахэтых. Предприятие ыкIи организацие 50 фэдизмэ проекти 100-м ехъу афызэхищагъ. Джащ фэдэу апшъэрэ еджапIэм кIэлэеджакIохэми Iоф адешIэ, проектнэ IофшIэнхэр арегъэшIых.