ТекIоныгъэм и Мафэ фэшI сыгу къыздеIэу сышъуфэгушIо! Сыд фэдиз уахътэ тешIагъэми, жъо­ныгъуакIэм и 9-р тихэгъэгу анахьэу щагъэлъэпIэрэ мэфэкIэу, зэфагъэр, цIыфыгъэр, шIур зэрэтекIорэм имафэу щытыщт. Ау ащ дакIоуи мы мафэм гур цIыкIу мэхъу, сыда пIомэ ТекIоныгъэм екIурэ гъогур кIыхьагъэ ыкIи къин дэдагъ. ТхьамыкIагъоу, гукъаоу заом къыздихьыгъэр, зигупсэхэмрэ зиIа­хьылхэмрэ зышIокIодыгъэр, ныбжьыкIэхэу хьадэгъур къызылъыIэсыгъэр зэрэбэр зыщыгъэгъупшэгъуай. Хэгъэгу зэошхом хэлэжьагъэхэу тичIыгу гупсэ фашизмэм щызыухъумагъэхэр ренэу тишIэжь хэлъыщтых. ЕгъэшIэрэ щыт­хъур ахэм адэжь, ахэм лъэшэу тафэраз.

ГухэкI нахь мышIэми, уахътэр лъыкIуатэ къэс заом хэлэжьагъэхэр нахь макIэ мэхъух. Арэу щытми, тызыфэгушIон, гущыIэ фабэхэр зэтIон, лъхъан­чэу шъхьащэ зыфэтшIын тлъэкIыщтхэр непи зэрэщыIэхэр насыпыгъэшху.

Хэгъэгу зэошхом иветеранхэу згъэ­лъапIэхэрэр! УшэтыпIэ къинэу шъуапэкIэ къикIыгъэхэр зэпышъучынхэ шъулъэкIыгъ, шъуищыIэныгъэрэ шъуи­псауныгъэрэ къарыкIощтым шъуемыгупшысэу тыщыIэнэу, тылэжьэнэу, тынасыпышIонэу амал тэжъугъэгъо­тыгъ. Урысые Федерацием къырыкIощтымкIэ пшъэдэкIыжь зэрэшъухьырэр къызэрэжъугурыIорэмкIэ, Хэгъэгум шIулъэ­гъоу фышъуиIэмкIэ ренэу щысэтехыпIэу шъутиI.

Ветеран лъапIэхэр, сыгу къыздеIэу сышъуфэлъаIо псауныгъэ пытэ шъуиIэнэу, шъуигъашIэ кIыхьэ хъунэу, шъу­гукIэ шъурэхьатынэу! ШъуичIыфэу ттелъыр егъашIи тэ тфэпщыныжьыщтэп!

МэфэкIымкIэ — ТекIоныгъэм и МафэкIэ джыри зэ сышъуфэгушIо!

Шъэумэн Хьазрэт.