Адыгеим и ЛIышъхьэ къафэгушIуагъ
1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызыщыдахыгъэр илъэс 78-рэ зэрэхъурэм фэгъэхьыгъэ игъэкIотыгъэ зэIукIэр республикэм и Къэралыгъо филармоние непэ щыкIуагъ.
[caption id="attachment_132149" align="aligncenter" width="800"] А. Гусев.[/caption]
Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет – Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м ыцIэкIэ Урысые Федерацием и Федеральнэ ЗэIукIэ ФедерациемкIэ и Совет исенаторэу Александр Наролиныр, АР-м ыцIэкIэ Урысыем и Къэралыгъо Думэ идепутатэу Хьасанэкъо Мурат, АР-м иветеранхэм я Совет итхьаматэу Къоджэ Аслъан, АР-м иминистрэхэм я Кабинет хэтхэр, АР-м и Къэралыгъо Совет —Хасэм идепутатхэр, федеральнэ, шъолъыр къулыкъухэмрэ ведомствэхэмрэ япащэхэр, заомрэ уIэшыгъэ кIуачIэхэмрэ яветеранхэр, муниципальнэ образованиехэм япащэхэр, общественнэ организациехэм ялIыкIохэр, юнармейцэхэр.
ЗэIукIэр рамыгъажьэзэ зышIоигъо пстэуми амал яIагъ «ЛIыхъужъхэм яшъхьэгъусэхэр» зыфиIорэ проектым икъэгъэлъэгъон нэIуасэ зыфашIынэу. Проектым кIэщакIо фэхъугъэ Екатерина Колотовкинар къэгъэлъэгъоным икъызэIухын хэлэжьэнэу Мыекъуапэ къэкIуагъ. Адыгеим щыщ бзылъфыгъэхэу зишъхьэгъусэхэр хэушъхьафыкIыгъэ дзэ операцием хэлажьэхэрэм ясурэтхэр Къэралыгъо филармонием къыщагъэлъэгъуагъэх. Адыгеим и ЛIышъхьэ проектым къыдыригъэштагъ. Къэгъэлъэгъоным зеплъым, проектым хэлажьэхэрэм задэгущыIэм, обществэм изэкъогъэуцонкIэ патриотическэ Iофтхьабзэхэмрэ проектхэмрэ мэхьанэшхо зэряIэр КъумпIыл Мурат къыхигъэщыгъ. «Тихэгъэгу ис лъэпкъхэр шъхьафитэу, мамырэу псэунхэр лъапIэу къафыдэкIыгъ, нацизмэр зэрэщынагъор зыщыдгъэгъупшэ хъущтэп. Джыдэдэм нацизмэм ышъхьэ къызыщиIэтыжьырэ лъэхъаным тарихъ хъугъэ-шIагъэхэм, яшъыпкъапIэ къэтыухъумэн фае. ЛIыхъужъхэм япхъорэлъфхэр Хэгъэгум изыкIыныгъэрэ ишъхьафитыныгъэрэ къаухъумэн фаеу непэ чIыпIэ ифагъэх», – къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, дзэкъулыкъушIэхэми, гуфакIохэми, мобилизацием къыхиубытэу Адыгеим икIыгъэ дзэкIолIхэми хэушъхьафыкIыгъэ дзэ операцием япшъэрылъ еIолIэнчъэу щагъэцакIэ, лIыхъужъныгъэ къызхагъафэзэ мэзаох.
«ДзэкIолI пэпчъ тырэгушхо. Зипшъэрылъхэр зыгъэцакIэзэ лIыхъужъныгъэ къызыхэзыгъэфэгъэ тидзэкIолIхэр тщыгъупшэщтхэп Хэгъэгу зэошхом илъэхъан зищыIэныгъэ зытыгъэхэр тыгу зэрилъхэм фэдэу», — къыIуагъ Адыгеим и ЛIышъхьэ.
ЗэIукIэм хэлэжьагъэхэм Хэгъэгум ишъхьафитыныгъэ къаухъумэзэ фэхыгъэхэр, зэоуж лъэхъаным къэралыгъор зыпкъ изыгъэуцожьыгъэхэр агу къагъэкIыжьыгъэх.
«ТекIоныгъэр къыдэзыхыгъэхэм псэемыблэжьыныгъэу къызхагъэфагъэм, ахэм IофшIэнымкIэ гъэхъагъэу яIэхэм тарэгушхо, ахэм тизыкIыныгъэ нахь агъэпытэ. Президентэу Владимир Путиным зэрэхигъэунэфыкIыгъэу, «непэ тэ къиныгъохэр зэпытчынхэ тэзыгъэлъэкIырэр тятэжъ пIашъэхэм щысэ зэратетхырэр ары. Ахэм яосыетхэр дгъэцэкIэнхэм тишъыпкъэу ыуж титын фае. Тэ ыпэкIэ тылъызыгъэкIуатэрэр Хэгъэгум тызэрэфэшъыпкъэмрэ зыкIыныгъэ зэрэтхэлъымрэ ары». ТидзэкIолIхэр зэрэтекIощтхэм тицыхьэ телъ, ТекIоныгъэр къыдахыгъэу ахэм ядэжь псынкIэу къагъэзэжьынэу тэгугъэ», — къыIуагъ КъумпIыл Мурат.
Адыгеим и ЛIышъхьэ республикэм иветеранхэм ТекIоныгъэм и МафэкIэ къафэгушIуагъ, республикэм ис пстэуми псауныгъэ пытэ, щыIэкIэ-псэукIэ дэгъу яIэнэу, шIум щымыкIэнхэу, мамырэу псэунхэу къафэлъэIуагъ.
АР-м и Къэралыгъо Совет — Хасэм и Тхьаматэу Владимир Нарожнэри республикэм исхэмрэ ихьакIэхэмрэ ТекIоныгъэм и МафэкIэ къафэгушIуагъ. Iофтхьабзэр концерткIэ аухыгъ.