Адыгеим и ЛIышъхьэу КъумпIыл Мурат Урысые Федерацием и Общественнэ палатэ хэтэу, фондэу «Звезда и Лира» зыфиIорэм ипащэу, мысатыу организациеу «Самарскэ хэкумкIэ Хэгъэгум идзэкъулыкъушIэхэм яунагъохэм я Комитет» зыфиIорэм иIэшъхьэтетэу, проектэу «ЛIыхъужъхэм яшъхьэгъусэхэр» зыфиIорэм кIэщакIо фэхъугъэ Екатерина Колотовкинар республикэм и Правительствэ и Унэ щыригъэблэгъагъ.

[caption id="attachment_132146" align="aligncenter" width="800"] М. Гордышов.[/caption]

ЗэIукIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м ибзылъфыгъэхэм я Союз итхьаматэу Ворэкъо Хьалимэт, Хэгъэгум идзэкъулыкъу­шIэхэм яунагъохэм я Комитет Адыгэ РеспубликэмкIэ икъутамэ ипащэу Ольга Пронтенкэр.

ХэушъхьафыкIыгъэ дзэ операцием хэлажьэхэрэм ящыкIэгъэщтхэм ыкIи мылъкум якъэугъоин Екатерина Колотовкинар фэгъэзагъ, джащ фэдэу ахэм яунагъо­хэм социальнэ Фондыр къызфигъэфедэзэ IэпыIэгъу ареты. Ащ ишъхьэгъусэу Андрей Колотовки­ныр дзэм игенерал-лейтенант, Адыгеим къыщыхъугъ, хэушъхьа­фы­кIыгъэ дзэ операцием хэлажьэ. Проектэу «ЛIыхъужъхэм яшъхьэгъусэхэр» зыфиIорэм къы­дыхэ­лъытагъэу Екатерина Колотовкинам сурэтхэм якъэгъэлъэгъонхэр зэхещэх. Ахэр нахьыбэрэмкIэ зыфэгъэхьыгъэхэр дзэкъулыкъушIэхэм яшъхьэгъусэхэр ары, хэушъхьафыкIыгъэ дзэ операцием хэлажьэхэрэри а сурэтхэм арыплъэгъощтых. Апэ къэгъэлъэгъоныр Самарэ илъэсэу икIыгъэм щыкIогъагъ, Урысыем и Президентэу Владимир Путинми ащ къыдыригъэштэгъагъ.

НепэкIэ шъолъыр 60-м ехъу а проектым гъусэ фэхъугъ. Мы Iофтхьабзэм кIэщакIо фэхъугъэ бзылъфыгъэм социальнэ хъытыу­хэмкIэ республикэм и ЛIышъ- хьэу КъумпIыл Мурат зыкъыфигъэзэгъагъ Адыгеими фотопроектым къыщыдырагъэштэным иIофкIэ.

Республикэм и ЛIышъхьэ ар игъоу ылъэгъугъ ыкIи къыдыригъэштагъ. ЗэIукIэгъум илъэхъан КъумпIыл Мурат къыхигъэщыгъ ащ фэдэ патриотическэ Iофтхьабзэхэмрэ проектхэмрэ мэхьанэшхо зэряIэр. ДзэкъулыкъушIэхэм агу нахь къыдэщэегъэнымкIэ, обществэм зыкIыныгъэ хэлъынымкIэ ахэм пшъэрылъ гъэнэфагъэ зэшIуахы.

«КIалэхэу заом Iутхэм яунагъо къызэряжэрэр ашIэ. Партиеу «Единэ Россием», общественнэ организациехэм, цIыф гумызагъэхэм яIэпыIэгъу хэлъэу тшIэрэр зэкIэ зэшIотэхы хэушъхьафыкIыгъэ дзэ операцием хэлажьэхэрэм, ахэм яунагъохэм, мобилизацием къыхиубытэгъэ яIахьылхэм таде­Iэным пае. Заом Iутхэм яIоф псынкIэу пфэIощтэп, сицыхьэ телъ сыд фэдэрэ IэпыIэгъуми ишIуагъэ къызэрэкIощтым. Дзэ­къу­­лыкъушIэхэм яреспубликэ Комитетэу о уишIуагъэкIэ зэхэт­щагъэм сыкъыпкъырыкIызэ къэсэIо: къиныгъохэр зэкIэ зэпытчын, текIоныгъэр къэдгъэблэгъэн зэрэтлъэкIыщтым сицыхьэ телъ», — къыIуагъ КъумпIыл Мурат.

ХэдгъэунэфыкIын Екатерина Колотовкинар мыщ ыпэкIэ рес­публикэм ибзылъфыгъэ советхэм зэраIукIэгъагъэр, дэпIэ цехэу дзэкъулыкъушIэхэм апае шъуа­шэхэр ыкIи нэмыкI пкъыгъохэр къызщагъэхьазырхэрэми щыIагъ. Республикэм и ЛIышъхьэ хьакIэм зэрэфэразэр къыIуагъ дзэкъулыкъушIэхэмрэ ахэм яунагъохэмрэ яфэныкъоныгъэхэм ателъытэгъэ проектхэу Адыгеим щызэшIуахырэ пстэуми ащ ынаIэ къызэратетым, ишIуагъэ къызэригъа­кIорэм апае.

«Iофтхьабзэу «ЛIыхъужъхэм яшъхьэгъусэхэр» зыфиIорэм къызэрэдебгъэштагъэм пае хэ­ушъхьафыкIыгъэу тхьауегъэпсэу къыосIонэу сыфай. Адыгеим сыкъызэкIом ны, шъхьэгъусэ ыкIи пшъэшъэ шIагъохэм саIукIагъ, тилIыхъужъхэм ахэр япытапIэх. Гушхуагъэ, гупшысэ дахэхэр ахэм къапкъырэкIых, текIоныгъэр шIэхэу къызэрэдэтхыщтымкIэ шIошъхъуныгъэ къыпхалъхьэ», — къыIуагъ Екатерина Колотовкинам.

ДзэкъулыкъушIэхэм социальнэ IэпыIэгъу ятыгъэным, ахэм яIэзэнхэм ыкIи реабилитацием япхыгъэ Iофыгъо пстэуми мы зэIукIэгъум илъэхъан атегущыIагъэх.

Хэгъэгум идзэкъулыкъушIэхэм яунагъохэм я Комитет IэпыIэгъу етыгъэнымкIэ, заом Iутхэм шIушIэ IэпыIэгъоу аратырэм джыри нахь зегъэушъомбгъугъэнымкIэ амалыкIэхэр яIэ хъунхэм тегъэпсы­хьэгъэ унашъохэр КъумпIыл Мурат афишIыгъэх.

АР-м и ЛIышъхьэ ипресс-къулыкъу