Адыгеим и ЛIышъхьэу КъумпIыл Мурат АР-м цIыфым ифитыныгъэхэмкIэ и Уполномоченнэу Анатолий Осокиным зэIукIэгъу дыриIагъ. 2022-рэ илъэсым аппаратым Iофэу зэшIуихыгъэм икIэуххэм атегущыIагъэх, цIыфхэм ялъэIухэмкIэ IофшIэнэу агъэцакIэрэм къыпкъырыкIыхэзэ, пшъэ­рылъхэр агъэнэфагъэх.

«ЦIыфхэм зыкъызэрэтфагъэзэрэ, зыгъэгумэкIыхэрэ Iофыгъо­хэм тынаIэ атетын, ахэр зэшIохыгъэ хъунхэм икъоу тыдэлэжьэн фае. А пшъэрылъыр хаб­зэм икъулыкъухэм ыкIи муниципалитетхэм апашъхьэ ит. МыщкIэ амал зэфэшъхьаф­хэр тэгъэфедэх, цIыфым ифитыныгъэ­хэмкIэ уполномоченнэм иаппарат ахэм зыкIэ ащыщ», — къыхигъэщыгъ КъумпIыл Мурат.

Анатолий Осокиным къызэриIуагъэмкIэ, 2022-рэ илъэсым республикэм щыпсэухэрэм зыкъызэрэфагъазэрэр процент 25-кIэ нахьыбэ хъугъэ, джащ фэдэу ашъхьэкIэ зыгъэгумэкIырэ Iофыгъохэм ялъытыгъэу къяуалIэхэрэм япчъагъэ хэхъуагъ. Ау тхьаусыхэхэр нахь макIэ хъугъэх. Iофыгъоу къаIэтыхэрэмкIэ хабзэм икъулыкъухэр ягъусэу зэхэфын Iофтхьабзэхэр зэрахьэх, джащ фэдэу мэхьанэшхо зиIэхэм язэшIохынкIэ яшIуагъэ арагъэкIы.

Анатолий Осокиным къызэрэхигъэщыгъэмкIэ, республикэм социальнэ лъэныкъомкIэ фэхъурэ зэхъокIыныгъэ инхэм ялъытыгъэу — еджапIэхэр, кIэлэцIыкIу IыгъыпIакIэхэр, псауныгъэм икъэухъумэн епхыгъэ псэуалъэхэр зэрашIыхэрэм яшIуагъэкIэ — псауныгъэм икъэухъумэнрэ гъэсэныгъэмрэ алъэныкъокIэ тхылъэу къагъэхьыхэрэр нахь макIэ хъугъэх. НахьыбэмкIэ ягумэкIыгъохэр къызщыраIотыкIырэ тхылъхэр зыфэгъэхьыгъэхэр хабзэм ичIыпIэ федеральнэ къулыкъу­хэм Iоф зэрашIэрэр ары. ГущыIэм пае, хьыкумышI приставхэмрэ чIыпIэ уполномоченнэхэмрэ яIофшIэн.

Республикэм и ЛIышъхьэ къызэрэхигъэщыгъэмкIэ, Адыгеим щыпсэухэрэм зигъо Iофыгъоу къаIэтыхэрэм язэшIо­хынкIэ Уполномоченнэм иинститутрэ хабзэм икъулыкъухэмрэ язэдэлэжьэныгъэ мэхьанэшхо иI.

КъумпIыл Мурат къы­зэриIуагъэмкIэ, Iофыгъуабэхэм язэшIохын зэлъытыгъэр чIыпIэхэм Iоф­шIэныр зэращызэхэщагъэр ары. ГущыIэм пае, илъэсэу икIыгъэм икIэуххэм къызэрагъэлъэгъуагъэмкIэ, Уполномоченнэм иаппарат анахь макIэу зыкъыфэзыгъэзагъэхэр Кощхьэблэ районым щыпсэухэ­рэр ары, анахьыбэу тхылъхэр къаIэкIэзыгъэхьагъэхэр Мыекъопэ районым щыщхэр ары.

ЛъэIу тхылъхэм ренэу Iоф адэшIэ­гъэн зэрэфаер Адыгеим и ЛIышъхьэ джыри зэ къыхигъэщыгъ ыкIи ашъхьэкIэ цIыфхэр къяолIэнхэм иамал яIэнымкIэ IофшIэныр агъэлъэшынэу, лъэIу тхылъхэм икъоу ахэплъэнхэу муниципалитетхэм къафигъэпытагъ. КъумпIыл Мурат къыхигъэщыгъ гъэцэкIэкIо хабзэм икъулыкъухэмрэ муниципальнэ образованиехэм япащэхэмрэ нахьыбэрэ цIыфхэм аIукIэнхэ, зыгъэгумэкIыхэрэр икъоу зэхафын, Iофыгъоу къэуцухэрэм зэшIохыкIэ амалхэр къафагъотын зэрэфаер. Ащ нэужым псэупIэу Краснооктябрьскэм, Джэджэ районым ащыпсэухэрэм ялъэIу тхылъхэм ахэплъагъэх. АР-м и ЛIышъхьэ иIэпыIэгъу хэлъэу пстэуми зэшIохыкIэ къафагъотыгъ. КъумпIыл Мурат пшъэрылъ афишIыгъ хэушъхьафыкIыгъэ дзэ операцием хэлажьэхэрэм яунагъохэм IэпыIэгъу ятыгъэным иIофыгъо нахь лъэшэу анаIэ тырагъэтынэу, фэныкъохэм шIушIэ IэпыIэгъу аIэкIагъэ­хьанэу.

«Зэхэубытагъэу къэпIон хъумэ, гъэцэкIэкIо хабзэм икъулыкъу­хэмрэ цIыфым ифитыныгъэ­хэмкIэ Уполномоченнэм иаппаратрэ язэпхыныгъэ, язэдэлэжьэныгъэ дэгъоу макIо. Ти­гуапэ цIыфхэми ар зэрэзэхашIыкIырэр: ахэм къафэразэх, джыдэдэм хэушъхьафыкIыгъэ дзэ операцием ишъолъыр щыIэхэри яунагъохэм къа­фэрэхьатых. Ау, сыд Iо фаеми, джыри макIэп зэшIотхын фаеу къыт­пыщылъыр. Пстэуми анахь мэхьанэ зэтыгъэн фаер гъот макIэ зиIэхэм, хэушъхьафыкIыгъэ дзэ операцием хэлажьэхэрэм IэпыIэгъу ятыгъэныр ары. Къытфэгъэзэгъэ Геническэ районми Iоф макIэп щызэшIотхын фаеу къытпыщылъыр. Урысые Федерацием и Президентэу Владимир Путиным къытфигъэуцугъэ пшъэ­рылъхэр зэкIэ дгъэцэкIэщтых», — къыIуагъ Адыгэ Республи­кэм и ЛIышъхьэу КъумпIыл Мурат.

АР-м и ЛIышъхьэ ипресс-къулыкъу