ЕгъэжьапIэ афэхъущт
УФ-м и Президентэу Владимир Путиныр зикIэщэкIо лъэпкъ проектхэм ащыщэу предпринимательствэ цIыкIумрэ гурытымрэ IэпыIэгъу афэхъугъэным тегъэпсыхьагъэм къыщыдэлъытэгъэ программэу «Агростартапым» хэлэжьагъэхэу зитхылъхэр пхырыкIыгъэхэм япчъагъэ къэнэфагъ.
[caption id="attachment_132067" align="aligncenter" width="800"] Сурэтыр: «Адыгэ макъэм» ихъарзынэщ.[/caption]
Мэкъумэщ хъызмэтыр мылъку къэкIуапIэу къыхэзыхыгъэхэм егъэжьапIэ афэхъунэу грантхэр ятыгъэнхэм программэр фэгъэхьыгъ. Адыгеим ичIыгулэжьэу е былымхъупIэ фермэ зыIыгъэу непэ мыдэеу бизнесыр лъызыгъэкIуатэхэрэм ащыщыбэм ар IэпыIэгъу афэхъугъ. Джыри мары ащ хэлажьэ зышIоигъохэм язэнэкъокъу мэлылъфэгъу мазэм ыкIэм щыIагъ. АР-м мэкъумэщ хъызмэтымкIэ и Министерствэ къызэрэщытаIуагъэмкIэ, нэбгырэ 53-рэ ащ хэлэжьагъ, 42-мэ ятхылъхэр пхырыкIыгъэх.
Ахэм ащыщэу нэбгырэ 16-мэ цумпэ лъэпкъхэм якъэгъэкIын пае грант къаратыщт, лэжьыгъэхэм е дагъэ къэзытырэ культурэхэм зафэзыгъазэ зышIоигъоу зитхылъхэр пхырыкIыгъэхэри ащ фэдиз мэхъух, нэбгыри 3-мэ хэтэрыкIхэр е картоф къагъэкIымэ ашIоигъу.
Былымхъуным ыуж ихьанэу зэнэкъокъум хэлажьи къизыхыгъэр нэбгыри 7 мэхъу. Ахэм щэр е лыр бэу къэзытырэ былымхэр зыщэфын гухэлъ зиIэхэр ахэтых, бжьэхъуныр е пцэжъыехъуныр мылъку къэкIуапIэу къыхэзыхы зышIоигъохэри къахэкIыгъэх.
Министерствэм къызэрэщыкIагъэтхъыгъэмкIэ, мы нэбгырэ 42-мэ бизнесыр езыгъэжьагъэ зыпари ахэтэп. Программэм къызэрэщыдэлъытагъэм тетэу, ахэм ыпэрапшIэу тхылъхэр къагъэхьазырыгъэх, Iофэу рагъэжьэщтым ищыкIэгъэ ахъщэм, грантым нэмыкIэу, ежьхэм яIахьэу халъхьащтыр аIэкIэлъ. Джы ахэм унэе хъызмэтшIапIэхэр агъэпсынхэшъ, счетэу ахъщэр зэрагъэхьащтхэр къызэIуахынхэ фае. Ащ нэужым грантхэр афатIупщыщтых.
[caption id="attachment_132069" align="aligncenter" width="800"]
Сурэтыр: «Адыгэ макъэм» ихъарзынэщ.[/caption]
ПстэумкIи нэбгырэ 42-мэ аратыщтыр сомэ миллион 94,4-рэ мэхъу. Шъхьадж тефэщтыр зэфэшъхьаф, Iофэу ригъэжьэщтым елъытыгъ. ГурытымкIэ лъытагъэу, зы нэбгырэм фэкIощтыр сомэ миллиони 2,2-рэ фэдиз.
Лъэпкъ проектым ишIуагъэкIэ мыхэм рахъухьагъэр пхыращын амал яIэ хъугъэшъ, ягухэлъхэр къадэхъунхэу тэри тафэлъаIо.
ХЪУТ Нэфсэт.