Цифрэ шапхъэхэмкIэ пшъэрылъхэр
Цифрэ трансформацием фэгъэхьыгъэ зичэзыу зэIукIэр республикэм и Правительствэ зычIэт унэм щыкIуагъ. Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьаматэу КIэрэщэ Анзаур Iофтхьабзэр зэрищагъ. ЗэIукIэм хэлэжьагъэхэр экономикэр, социальнэ лъэныкъор, псауныгъэм икъэухъумэн, гъэсэныгъэр, къэралыгъо гъэIорышIэныр цифрэ шапхъэхэм зэратыращэрэм тегущыIагъэх.
АР-м иминистрэхэм я Кабинет хэтхэр, хабзэм ишъолъыр, имуниципальнэ къулыкъухэм япащэхэр Iофтхьабзэм хэлэжьагъэх.
АР-м цифрэ, информационнэ, телекоммуникационнэ технологиехэмкIэ иминистрэу Шыу Заурбек къызэриIотагъэмкIэ, 2022-рэ илъэсым «цифровая зрелость» зыфиIорэ лъэныкъомкIэ республикэм планыр проценти 134-у, 2023-рэ илъэсым иапэрэ мэзищ проценти 106-у ыгъэцэкIагъ.
Экономикэмрэ социальнэ лъэныкъомрэ цифрэ технологиехэм атещэгъэнхэмкIэ Стратегием ипхырыщын лъагъэкIуатэ. ГъэцэкIэкIо хэбзэ къулыкъуи 10 фэдиз Стратегием хэлажьэ. Ахэм ахэхьэх министерствэхэу, къулыкъухэу гъэсэныгъэм, псауныгъэм икъэухъумэн, социальнэ хэхъоныгъэм, псэолъэшIыным, транспортым, псэупIэ-коммунальнэ хъызмэтым, финансхэм, культурэм, зыкъэухъумэжьыным, ошIэ-дэмышIэ Iофхэм архитектурэм, цIыфхэм IофшIапIэ къафэгъотыгъэным, тыкъэзыуцухьэрэ дунаим икъэухъумэн япхыгъэ Iофыгъохэр зыгъэзекIохэрэр.
2023-рэ илъэсым Стратегием ипхырыщын сомэ миллион 16,6-рэ пэIуагъэхьащт. Лъэныкъо заулэхэмкIэ мылъку тедзэ къагъотын фаеу хъущт. Зыкъэухъумэжьыным, ошIэ-дэмышIэ Iофхэм, япхыгъэ проектхэр, общественнэ транспортым иIофшIэн зэрауплъэкIурэр ары ар зыфэгъэхьыгъэр.
АР-м цифрэ, информационнэ, телекоммуникационнэ технологиехэмкIэ иминистрэ къызэриIуагъэмкIэ, непэрэ мафэм ехъулIэу лъэныкъо 18-мкIэ Стратегием къыдилъытэхэрэм ашъхьэдэкIыгъэх, лъэныкъо 18-мкIэ планыр агъэцэкIагъ, лъэныкъо 14-мэ Iоф адашIэ. Электрон шIыкIэм тетэу документхэр зэрагъэзекIорэ системэр (СЭД) лъэныкъуи 178-мэ къызэрэзфагъэфедэрэр зэIукIэм щыхагъэунэфыкIыгъ. Ахэм ахэхьэх гъэцэкIэкIо хабзэм икъулыкъухэр, муниципальнэ образованиехэр, къоджэ псэупIэхэр. Тэхъутэмыкъое, Красногвардейскэ районхэм япсэупIэ заулэ ащ фэдэ системэм хэгъэхьэгъэнхэмкIэ Iофэу ашIэрэр агъэлъэшын фаеу алъытагъ.
АР-м цифрэ, информационнэ, телекоммуникационнэ технологиехэмкIэ иминистрэ зэIукIэм игъо щафилъэгъугъ «цифровая зрелость» зыфиIорэ лъэныкъомкIэ Iофхэр зэрэзэпыфэхэрэм гъунэ алъыфыгъэнымкIэ АР-м и ЛIышъхьэ и Координационнэ гупчэ амалэу иIэхэр къызфагъэфедэнхэу.
«Республикэм цифрэ, информационнэ, телекоммуникационнэ технологиехэмкIэ иминистрэ игъоу ылъэгъугъэм къыдесэгъаштэ. Ащ зигугъу къышIыгъэ лъэныкъом ишIуагъэкIэ чIыпIэхэм къэбар тэрэзхэр къаIэкIагъэхьан, яIофшIэнкIэ гъэхъэгъэшIухэр ашIынхэ алъэкIыщт», — къыIуагъ КIэрэщэ Анзаур.
Цифрэ шапхъэхэм атехьэгъэнымкIэ республикэм ыпашъхьэ ит пшъэрылъхэм ягъэцэкIэн тегъэпсыхьэгъэ унашъохэр зэIукIэм щаштагъэх. АР-м иминистрэхэм я Кабинет и Тхьаматэ зэрэхигъэунэфыкIыгъэмкIэ, цифрэ технологиехэр зытегъэпсыхьагъэхэр цIыфхэм ящыIэкIэ-псэукIэ зыкъегъэIэтыгъэныр, къэралыгъо фэIо-фашIэхэр икъоу гъэцэкIэгъэнхэр, транспортымрэ унэ-коммунальнэ хъызмэтымрэ яIофшIэн нахьышIоу зэхэщэгъэныр ары.