ХэушъхьафыкIыгъэ дзэ операциер зырагъэжьагъэм ыуж зэзэгъыныгъэкIэ къулыкъур зыхьы зышIоигъохэм япчъагъэ нахьыбэ хъугъэ.

Ахэм ащыщ илъэс 26-рэ зыныбжь Дмитрий К. Ащ АР-м идзэ комиссариат тыщыIукIагъ.

Дмитрий илъэситIу пIалъэкIэ зэзэгъыныгъэкIэ къулыкъур ыхьыным кIэтхагъ. КIэлэ ныбжьыкIэм апшъэрэ гъэсэныгъэ иI, Мые­къопэ къэралыгъо технологическэ университетыр къызеухым ыуж Iоф ышIэщтыгъ. Ау ар илэжьапкIэ ымыгъэразэу псэузэ, зэзэгъыныгъэ шIыкIэкIэ къулыкъур зыхьыхэрэм ясоциальнэ гарантиехэм яшIуагъэ къызыгурэIом, а унашъор ышIыгъ.

— Хэтрэ хъулъфыгъи ихэгъэгу къыухъумэныр ипшъэ­рылъ шъхьаI. Ау сихэгъэгу шIу слъэгъоу, ащ фэсшIэшъу­щтым имызакъоу, сищыIэныгъэ тапэкIэ хэхъухьан ылъэ­кIыщтхэм бэрэ сягупшысагъ. АпэрэмкIэ, мазэ къэс а зы мафэм теубытагъэ хэлъэу лэжьэпкIэ ин къысатыщт, илъэс 20-кIэ пенсием сыкIон слъэкIыщт. Ау анахьэу сэ сызыфаер «военнэ ипотек» зыфаIорэр згъэпсынэу ары. Ащ пае илъэсищым нахь мымакIэу къулыкъум ухэтын фае. Сэ сиеплъыкIэкIэ, дзэ къулыкъур зэзэгъыныгъэ шIыкIэм тетэу ыхьыным кIатхэрэр къакIоу, кIожьэу щытынэу щытэп. Теубытагъэ хэлъэу, зэхэпшIыкIэу а лъэбэ­къур пшIын фае. УищыIэныгъэ дзэ Iофым еопхымэ, уныбжь екъуфэ къулыкъум ухэтыщт, хэбзэгъэуцугъэу щыIэхэм къадыхэлъытэгъэ социальнэ фэгъэкIотэнхэр къэблэжьыщтых, — къыIуагъ Дмитрий.

ТигущыIэгъу ежь унэгъо шъхьаф иIэп, ау янэ-ятэхэр къежэщтых. Ащ дзэ Iофым зыфигъэзэнымкIэ щысэтехыпIэу янэ фэхъугъ. Илъэс пчъагъэ хъугъэ ащ Мыекъуапэ игарнизонхэм ащыщ къулыкъу зыщихьырэр.