Гъогухэм ягъэцэкIэжьын падзэжьыгъ
Мэлылъфэгъу мазэр къызехьэм гъогухэм яшIын ыкIи ягъэцэкIэжьын республикэм щыпадзэжьыгъ.
«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу Адыгеим шъолъыр мэхьанэ зиIэ гъогу Iахь 23-рэ щагъэцэкIэжьыщт, ар километрэ 54-рэ мэхъу.
Автомобиль гъогухэмкIэ ГъэIорышIапIэу «Адыгеяавтодорым» ипащэу Алексей Корешкиныр Федеральнэ гъогу агентствэм инаучнэ-практическэ конференцие къызщэгущыIэм къызэриIуагъэмкIэ, къыкIэлъыкIорэ 2024-рэ илъэсымкIэ гухэлъхэм ахэтыгъэх джы зэшIуахыщт IофшIэнхэр. ПIалъэхэм апэ итхэу пшъэрылъхэр зэрагъэцакIэхэрэм ишIуагъэкIэ илъэскIэ нахьыжьэу гъогухэр шапхъэхэм адиштэу ашIыжьыщтых.
Республикэм пстэумкIи автомобиль гъогу километрэ 4833-рэ иI. Ащ щыщэу 244-р федеральнэх, 1319-р шъолъыр гъогух, километрэ 3268-мэ чIыпIэ мэхьанэ яI. Ащ фэдэу ямэхьанэ зэфэшъхьафэу, ау зы «опорнэ сеть» хагъэхьагъэр километрэ 208-рэ мэхъу. Непэ республикэм игъогухэм япроцент 55-р шапхъэхэм адештэ.
IофшIэнэу гъогухэм ащызэшIуахыщтхэм яплан зэхагъэуцо зыхъукIэ, гъэцэкIэжьыгъахэхэм якъызэтегъэнэн ыкIи гъогурыкIоныр щынэгъончъэным мэхьанэ республикэм щыраты.
Ащ фэшI хьылъэзещэ автомашинэхэм яонтэгъугъэ къэзыщэчырэ псэуалъэхэри, сурэт ыкIи видео тезыхырэ камерэхэри агъэуцугъэх.
ГъэрекIо ащ фэдэ щэчалэу тIу Красногвардейскэ районым щагъэуцугъ, джы Мыекъопэ районым щашIыщт, камерэхэми мыгъэ 16 къахэхъощт.
Шъолъыр мэхьанэ зиIэ гъогухэм лъэмыджэу ателъхэр шапхъэхэм адиштэу шIыгъэнхэми республикэм ынаIэ тет. Мы илъэсым ыкIэм нэс лъэмыджитIумэ ягъэкIэжьын аухыщт, зыр икIэрыкIэу ашIыжьыщт. ПстэумкIи ахэр метри 128-рэ мэхъух.
Поселкэу Гъозэрыплъэ ыкIи бгы сэтхэу Лэгъо-Накъэ кIорэ гъогоу километри 7,7-рэ хъурэм ишIыни лъагъэкIуатэ. Мыр Адыгеим зекIоным зыщиушъомбгъуным, тиреспубликэ гъэпсэфыпIэу къыхэзыхыхэрэм гъогу инфраструктурэр Iэрыфэгъу афэхъуным атегъэпсыхьагъэу зэшIуахырэ IофшIэнхэм ащыщ.