МыцыхьэшIэгъу пкъыгъохэр зышъулъэгъухэкIэ шъузэрэзекIон фаер АР-м хэгъэгу кIоцI IофхэмкIэ и Министерствэ шъугу къегъэкIыжьы

ЖъоныгъокIэ мэфэкI мафэхэу къэбла­гъэхэрэм общественнэ рэхьатныгъэр къэухъумэгъэным, террористическэ актхэр къэмыгъэхъугъэнхэм афэгъэхьыгъэ Iофтхьабзэхэр АР-м хэгъэгу кIоцI IофхэмкIэ и Министерствэ зэрехьэх.

ЦIыфыбэ зыщызэрэугъоирэ чIыпIэхэм анаIэ атырагъэтыщт. МэфэкI Iофтхьабзэхэр зыщыкIощт чIыпIэхэр зэкIэ пэшIорыгъэшъэу ауплъэкIущтых.

ЦIыфыбэ зыщызэрэугъоирэ чIыпIэхэм, учреждениехэм, къатыбэу зэтет унэхэм ядэкIояпIэхэм, транс­портым цыхьэшIэгъунчъэ пкъыгъохэр ащышъулъэ-гъунхэ ылъэкIыщт. Гу зылъышъутэгъэ пкъыгъор а чIыпIэм а уахътэм щымылъынэу щытмэ, шъунаIэ тешъумыдзэу къэшъумыгъан. Гъунэгъоу щытхэм ащыщ иемэ шъукIэупчI, арэущтэу къызычIэмыкIырэм полицием макъэ ежъугъэIу.

Транспортым ащ фэдэ пкъыгъо къыщыжъугъоты­гъэмэ, исхэм яемэ шъукIэупчI, арэу щымытмэ, водителым макъэ ежъугъэIу.

Зыщышъумыгъэгъупш:

— къэжъугъотыгъэ пкъыгъор къызэкIоцIышъумых ыкIи шъумыгъэкощы;

— пкъыгъор зиер, амал иIэмэ, зэжъугъашIэ; — зиер къэшъумыгъотыгъэмэ, полицием макъэ ежъугъэIу;

— гъунэгъоу щыт цIыфхэм зэлъяжъугъашI мыцыхьэшIэгъу пкъыгъо зэрэщылъыр;

— нахь чыжьэу IукIынхэу яшъуIу.

Джыри зэ шъугу къэтэгъэкIыжьы!!!

Ны-тыхэр! ШъуикIэлэцIыкIухэм ящыIэныгъэкIэ, япсауныгъэкIэ шъоры пшъэдэкIыжь зыхьырэр. Ахэм агурыжъугъаIу сыд фэдэрэ пкъыгъоу урамым къытыра­гъуатэрэм щынагъо къыпыкIын зэрилъэкIыщтыр. Къэ­жъугъотырэ пкъыгъохэм шъузэрэфаеу шъуа­дыземыкIу.

Полицием цIыфхэм закъыфегъазэ общественнэ чIыпIэхэм зэращызекIощтхэм, ­хъугъэ-шIагъэ къэхъугъэу алъэгъумэ макъэ зэрагъэIущт шIыкIэхэм, нэмыкIхэми афэгъэхьыгъэу. ЦIыфхэр бэу зыхэлэжьэхэрэ

Iофтхьабзэхэм уазэращызекIон фаер:

— общественнэ рэхьатныгъэр уукъо хъущтэп;

— цIыфхэмкIэ щынагъоу ыкIи гузэжъогъоу щыт зекIуакIэхэр щыбгъэзыенхэ фае;

— Iофтхьабзэхэр зыщыкIохэрэ псэуалъэхэм ыкIи агъэфедэхэрэ пкъыгъохэм уафэсакъын фае;

— цIыфхэм ыкIи фэIо-фашIэхэр зыгъэцакIэхэрэм, Iофтхьабзэм изэхэщакIохэм, пэщэ IэнатIэм Iутхэм, Iофтхьабзэм изэхэщэнкIэ общественнэ рэхьатныгъэр къэзыухъумэхэрэм шъхьэкIафэ афэшъушIын фае;

— Iофтхьабзэр зыщырекIокIырэ уахътэм машIор къэмыгъэхъугъэнымкIэ ыкIи рэхьатныгъэр къэухъумэгъэнымкIэ хэбзэухъумэкIо къулыкъухэм къышъуаIорэр жъугъэцэкIэнэу щыт;

— зыныбжь имыкъугъэхэм алъыплъэн щымыIэу язакъоу къэшъумыгъанэх;

— хэушъхьафыкIыгъэ чIыпIэхэм шъуиавтомобильхэр жъугъэуцух;

— ошIэ-дэмышIэ Iоф къэхъоу цIыфхэр агъэкощынхэ фаеу хъумэ, хэгъэгу кIоцI къулыкъум иIофышIэ ыIорэм тетэу шъузекIонэу щыт, рэхьатныгъэ зыхэ­жъугъэлъ, егъэлыегъащэу щынэныгъэ къызхэжъугъафэ хъущтэп.

Адыгэ Республикэм ичIыпIэхэм цIыфхэр бэу зыхэ­лэжьэрэ Iофтхьабзэхэр ащырекIокIыхэ хъумэ, общест­веннэ рэхьатныгъэр къэухъумэгъэнымкIэ хэбзэукъоныгъэ зэрахьагъэу хъугъэ-шIагъэхэм шъуарихьылIагъэ­мэ, АР-м хэгъэгу кIоцI IофхэмкIэ и Министерствэ ителефон номерэу 02-мкIэ (102) макъэ ежъугъэIун шъулъэкIыщт.

Полицием зызэрэфэбгъэзэн плъэкIыщтыр

БзэджэшIагъэ е хъугъэ-шIагъэ горэ шъулъэгъугъэмэ, е шъо шъушъхьэкIэ хэбзэукъоныгъэ къыжъудызэрахьагъэмэ, Адыгэ Республикэм хэгъэгу кIоцI IофхэмкIэ и Министерствэ макъэ ежъугъэIунэу зыкъышъуфегъазэ. Ар шIыкIэ зэфэшъхьафхэмкIэ пшIын плъэкIыщт.

Тхьапэу яшъутырэм итынхэ фаехэр:

1. Хэгъэгу кIоцI IофхэмкIэ къулыкъоу е ащ Iоф щызышIэу зызыфэбгъазэрэм ыцI, IэнатIэу ыIыгъыр.

2. Зафэзыгъазэрэм ылъэкъуацI, ыцI, ятэ ыцI.

3. Джэуапыр зыдагъэхьыжьыщт адресыр.

4. Ежь ышъхьэкIэ зэрэкIэтхэжьыгъэр ыкIи мафэу зитхыгъэр.

5. ЦIыфым ытхыгъэр къэзыгъэшъыпкъэжьырэ документхэр.

БзэджэшIагъэ зэрахьагъэу шъущыгъуазэмэ

БзэджэшIагъэхэу ыкIи хъугъэ-шIагъэхэу гъогухэм, общественнэ чIыпIэхэм ащызэрахьэхэрэр нахьыбэрэмкIэ цIыфхэм янэрылъэгъух.

БзэджэшIагъэ ыкIи административнэ хэбзэукъоныгъэ зэрахьагъэу шъущыгъуазэмэ, бзэджашIэм итеплъэ гум ишъуубыт (иинагъэ, щыгъыным, цуакъэм, нэшанэу иIэхэм шъуалъыплъ). Полицием псынкIэу макъэ зэрежъугъэIущтым шъупылъ, телефон номерэу 02-м (102-м) шъутеу, хэбзэукъоныгъэм щыжъугъэгъуазэх.

ШъумыгуIэу, нахь игъэкIотыгъэу хъугъэ-шIагъэу шъузэрихьылIагъэр, уахътэу зыщыхъугъэр полицием икъулыкъушIэхэм къафэшъуIуатэх.

БзэджашIэм итеплъэ зыфэдэр ыкIи ащ лъэныкъоу зыздигъэзагъэр къулыкъушIэхэм яшъуIомэ, охътэ кIэкIым къыкIоцI ар къаубытын алъэкIыщт.

Хъугъэ-шIагъэм ыпкъ къикIыкIэ зыгорэм шъобж тещагъэ хъумэ, ащ IэпыIэгъу шъуфэхъу. Полицием икъулыкъушIэхэр къэкIофэхэ шъуяж. Джащ фэдэу наркотикхэр, Iашэр ыкIи къэорэ пкъыгъохэр къезыгъэкIокIыхэрэм якъэбар шъущыгъуазэмэ, полицием ителефон номерэу 02-м (102-м) шъутеу.

ХъункIэн бзэджэшIагъэхэр дэгъэзыжьы­гъэнхэм фэшI зыщышъумыгъэгъупш:

— ахъщэшхо ыкIи уасэ зиIэ мылъку зэрэшъуIы­гъыр общественнэ чIыпIэхэм къащызхэшъумыгъэщ;

— чэщырэ унэм шъукъэкIожь зыхъукIэ, цIыфхэр макIэу зыщызекIохэрэ урамхэм шъуатемыхь;

— унэ пчъэIум шъукъызысыжькIэ, шъэфэу зышъуплъыхь мыцыхьэшIэгъу цIыф къышъулъэплъэмэ е щынэгъо нэшанэ горэ щыIэмэ;

— цыхьэ зыфэшъумышIэу ыкIи шъумышIэрэ цIыф куп унэ чIэхьапIэм Iутэу шъузыIухьажькIэ, шъуаблэкIи унэм чIэс горэ къыIохьажьыфэкIэ шъуеж;

— шъуимынэIуасэхэм лифтым шъуадимытIысхь;

— зыгорэ къышъулъыплъэу гу зылъышъутэкIэ, ­гъунэгъоу щыт тучан е нэмыкI сатыушIыпIэу цIыфыбэ зычIэтым шъучIахьи, полицием макъэ ежъу­гъэIу, а цIыфым итеплъэ зыфэдэр яшъуIу;

— къышъутебэнагъэхэмэ, бзэджашIэм итеплъэ горэхэр шъугу ишъуубытэх, шъушIуатыгъугъэр зыфэдэр къэшъуIотэжьым пае.

КIэджыбэм илъым шъуфэсакъ!

Мыщ епхыгъэ бзэджэшIагъэхэр анахьэу мафэм зэрахьэх. ЦIыфыбэ зыщызэрэугъоирэ чIыпIэхэм тыгъокIо цIыкIухэр «чанэу» ащэIабэх, кIэджыбэхэр е Iалъмэкъхэр аунэкIых.

Ар къышъомыхъулIэным ыкIи чIэнэгъэшхо шъумышIыным пае:

— шъуиахъщалъэ мэхьанэ зиIэ документхэр дэшъу­мыгъэлъых;

— ахъщэшхо зыдешъумыхьыжь е шъуштэнэу хъугъэ­ми, къэмылъэгъорэ джыбэм ишъулъхьэмэ нахьышIу;

— общественнэ транспортым телефон е ахъщэжъгъэйхэр зыщыIэпызыгъэзыхэрэм шъуафэсакъ, ахэм IэпыIэгъу шъуафэхъуфэ ягъусэм шъуиIалъмэкъ ыхъун­кIэн ылъэкIыщт.

БзэджэшIагъэ къыжъудызэрахьагъэмэ

Шъуащыщ горэм хэбзэукъоныгъэ къыдызэрахьа­гъэмэ, полицием ителефон номерэу 02-мкIэ шъутеу.

Бэ тешъумыгъашIэу полицием макъэ ежъугъэIумэ, бзэджашIэр нахь псынкIэу къаубытын алъэкIыщт. ШъулъэкъуацIэ, шъуцIэ, шъуятацIэ ыкIи шъузщыпсэурэ чIыпIэр яшъуIу.

Хъугъэ-шIагъэр зыщыхъугъэ чIыпIэм шъуIумыкIыжьэу полицием икъулыкъушIэхэр къэкIофэхэ шъуяж.

ИгъэкIотыгъэу ыкIи шъыпкъагъэ хэлъэу зэкIэ къы­шъущышIыгъэр къулыкъушIэхэм яшъуIу. Нахьыбэ шъугу къэкIыжьэу афэшъуIуатэ къэс бзэджашIэр нахь къэубытыгъошIу афэхъущт. Зыщышъумыгъэгъупш, зэрар зырахыгъэм полицием макъэ зыримыгъэIукIэ, бзэджашIэм пшъэдэкIыжь ымыхьэу хэтыщт.

Хэбзэукъоныгъэ зышIагъэм итеплъэ, ищыгъын, ицуакъэ зыфэдэм (жакIэ, пакIэ тетмэ, ыкIышъо сурэт хэутыгъэ тешIыхьагъэмэ) шъунаIэ атешъудз.

БзэджэшIагъэр зылъэгъугъэм шъуелъэIуи, полициер къэкIофэ IушъумыгъэкIыжь. Яжэн ымылъэкIыщтмэ, ителефон номер, зыщыпсэурэ чIыпIэр къежъугъаIу.

ТхыгъэкIэ е жэрыIокIэ дежурнэ частым зыфэжъугъэзэн, ащ нэмыкIэу общественнэ рэхьатныгъэм икъэухъумэнкIэ полицием иучастковэ пунктэу къы­шъупэгъунэгъум макъэ ежъугъэIун шъулъэкIыщт.

НэкIубгъор зыгъэхьазырыгъэр КIарэ Фатим.