Гурыт еджапIэхэм язэтегъэпсыхьан лъагъэкIуатэ
Урысые Федерацием и Президентэу Владимир Путиным иунашъокIэ игъэкIотыгъэ гъэцэкIэжьынхэм япхыгъэ къэралыгъо программэм къыдыхэлъытагъэу гурыт еджапIэхэр агъэкIэжьых.
Партиеу «Единэ Россием» ипрограммэ ихэушъхьафыкIыгъэ едзыгъоу ар щыт. Гурыт еджапIэхэм ягъэкIэжьын епхыгъэ программэр Урысыем просвещениемкIэ и Министерствэ ягъусэу шъолъырхэм зэшIуахы. АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, 2024 — 2025-рэ илъэсхэм объект 42-рэ республикэм щагъэкIэжьынэу агу хэлъ. 2023-рэ илъэсым ыкIэ нэс гъэцэкIэжьынхэр зыщыкIощт гурыт еджапIэу къыхахыхэрэр къаIощтых.
Мы программэм къыдыхэлъытагъэу 2022-рэ илъэсым гъэсэныгъэ гупчэу N 18-р, лицееу N 19-р, гимназиеу N 22-р ыкIи АР-м гъэсэныгъэмрэ шIэныгъэмрэкIэ и Министерствэ епхыгъэ Адыгэ республикэ гимназиер, зэхэзымыхыхэрэ ыкIи зымылъэгъухэрэ кIэлэцIыкIухэр зычIэсхэ еджэпIэ-интернатыр зэтырагъэпсыхьагъэх.
Мы илъэсым игъэкIотыгъэ гъэцэкIэжьынхэр ащэкIох Мыекъуапэ игурыт еджапIэхэу N 3-м, N 20-м, N 23-м ыкIи лицееу N 8-м. 2024-рэ илъэсым гурыт еджапIэхэу N 10-м, N 15-м, N 17-м, лицееу N 35-м, япсауныгъэкIэ ялэгъухэм акIэмыхьэрэ кIэлэцIыкIухэр зыщеджэхэрэ еджапIэр агъэкIэжьыщтых.
«Партийный десант» зыфиIорэмрэ фракциеу «Единэ Россием» идепутатхэмрэ игъэкIотыгъэ гъэцэкIэжьынхэр зэрыкIохэрэм лъэплъэх.