Росгвардием и ГъэIорышIапIэу АР-м щыIэм вневедом­ственнэ ухъумэнымкIэ иотдел икъулыкъушIэхэр лъыр зыщахащырэ Адыгэ республикэ станцием щыIагъэх ыкIи ыпкIэ хэмылъэу лъыр атыгъ. Мыр Урысые Iоф­тхьабзэу «От сердца к сердцу» зыфиIорэм къыдыхэлъытагъ.

КъулыкъушIэхэм къапэгъокIыгъ лъым изэIугъэ­кIэнкIэ отделым ипащэу, врач-трансфузиологэу Наталья Остапенкэр. Хэ­бзэухъумакIохэм агу зэ­Iухыгъэу мыщ фэдэ Iоф­тхьабзэм хэлэжьэнхэр хэбзэшIу зэрафэхъугъэмкIэ станцием испециалист рэзэныгъэ гущыIэхэр къа­пигъохыгъэх.

Росгвардием илIыкIохэм лъыр атыным ыпэкIэ ищыкIэгъэ медицинэ уплъэ­кIунхэр арагъэшIыгъэх. КъулыкъушIэхэм ащыщыбэм илъэс пчъагъэ хъугъэу лъыр аты. А ма­фэм апэрэу Iофтхьа­бзэм хэлэжьагъэхэми лъыр зы­хакIэнэу зищы­кIагъэхэм джыри тапэкIэ IэпыIэгъу афэхъунхэм зэрэфэхьазыр­хэр къаIуагъ. Медицинэ уплъэкIунхэм къызэрагъэ­лъэгъуа­гъэмкIэ, къулыкъу­шIэу къекIолIа­гъэхэм лъыр атымэ ­хъущт. ПстэумкIи ахэм лъы литри 5 фэдиз зы мафэм атыгъ.

КъулыкъушIэхэр лъытыным зэрэхэлэжьагъэхэмкIэ медицинэм иIофы­шIэхэр афэрэзагъэх ыкIи псауныгъэ пытэ яIэнэу, гъэхъагъэхэр ашIынхэу ахэм афэлъэIуагъэх.

Шъолъырым имедицинэ учреждениехэм ящыкIагъэ хъумэ агъэфедэн алъэ­кIыщт лъы литри 10-м ехъу росгвардейцэхэм атыгъ.

ЗипсауныгъэкIэ лъыр зыты хъущт къулыкъушI­хэр ары Iофтхьабзэм хэлэжьагъэхэр. ПэшIорыгъэшъэу ахэм ялъ ауплъэкIугъ ыкIи врачым гущыIэгъу фэхъугъэх.

— Мыщ фэдэ Iофтхьабзэхэр ренэу зэхэтэщэх. Лъыр птыным мэхьанэу иIэр къыдгурэIо. Къулы­къум иIофышIэ пэпчъ цIыфхэм IэпыIэгъу афэ­хъуным фэхьазыр, — къы­Iуагъ полицием ипод­полковникэу Алексей Чабанец.