АР-м и ЛIышъхьэу КъумпIыл Мурат Адыгеим гъогухэр щынэгъончъэу щытынхэмкIэ и Комиссие изэхэсыгъо тыгъуасэ зэрищагъ.

Федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэу КIэрэщэ Анзаур, прокуратурэм, хьыкумхэм, хэбзэухъумэкIо къулыкъухэм, муниципалитетхэм япащэхэр ащ хэлэжьагъэх. Зэхэсыгъом анахьэу зыщытегущыIэгъэхэ Iофыгъохэр 2023-рэ илъэсым иапэрэ мэзищ респуб­ликэм игъогухэм тхьамыкIагъоу къатехъу­хьагъэр зыфэдизыр, гъогухэр щынэгъон­чъэнхэмкIэ амалэу зэрахьэхэрэр ары.

ГъогурыкIоныр щынэгъончъэнымкIэ ГъэIорышIапIэм къызэритыгъэмкIэ, 2023-рэ илъэсым иапэрэ мэзищ республикэм игъогухэм тхьамыкIэгъо 91-рэ атехъу­хьагъ. Нэбгыри 9 ахэм ахэкIодагъ, нэбгыри 103-мэ шъобжхэр атещагъэ хъугъэ. ТхьамыкIагъохэм янахьыбэр зэпхыгъагъэр гъогухэм зэрадэхыгъэхэр, лъэсрыкIом чэщым зэрэтехьагъэхэр ары. Автобусхэм яводительхэм ялажьэкIэ тхьамыкIэгъуи 4 къэхъугъ. Адыгеим и ЛIышъхьэ общественнэ транспортым Iоф зэришIэрэм нахь пхъашэу лъыплъэнхэу пшъэрылъ афишIыгъ.

«Транспорт инспекциеми, Къэралыгъо автоинспекциеми, муниципалитетхэми ащ фэдэ тхьамыкIагъохэр къэмыхъунхэм акIуачIэ рахьылIэн фае. Къэлэ щыIэкIэ IэрыфэгъумкIэ, цIыфхэр къалэм щызещэгъэнхэмкIэ стратегиер къыхахы зыхъукIэ, общественнэ транспортым иIоф­шIэнкIэ екIолIакIэу яIагъэм хэплъэжьыгъэн фае», — къыIуагъ КъумпIыл Мурат.

КIэлэцIыкIухэм гъогухэм шъобжхэр щатырамыщэнымкIэ пэшIорыгъэшъ амалхэр зехьэгъэнхэ зэрэфаем лъэшэу анаIэ зэхэсыгъом щытырагъэтыгъ. Гъогум зэрэщызекIонхэ, шапхъэхэр къызэрэдалъытэн фаемкIэ кIэлэцIыкIухэм адэгущыIэх. Мафэрэ зызыщагъэпсэфырэ лагерьхэм ащыIэ кIэлэцIыкIухэм пэшIорыгъэшъ Iофтхьабзэхэр адызехьэгъэнхэм пае гъэмэфэ зыгъэпсэфыгъохэр джыри рамыгъажьэзэ, кIэлэцIыкIу транспорт площадкэхэр зэрагъэкIэжьыхэрэми зэхэ­сыгъом щытегущыIагъэх. Ащ фэгъэхьыгъэу игъэкIотыгъэу къэгущыIагъ АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Евгений Лебедевыр.

Мыекъуапэ имэрэу Геннадий Митрофановым, Джэджэ районым ипащэу Андрей Таранухиным, Красногвардейскэ районым ипащэу Гъубжьэкъо Темур мы лъэныкъомкIэ ярайонхэм яIофхэм язытет къаIотагъ. Адыгеим и ЛIышъхьэ чIыпIэхэм япащэхэм пшъэрылъ афишIыгъ Къэралыгъо автоинспекцием иIофышIэхэм ягъусэхэу гъогухэм язытет ашъхьэкIэ гъунэ лъафынэу, тхьамыкIагъохэр къызыхэкIырэр зэхафынэу, бэрэ хэукъоныгъэ зышIыхэрэм Iофэу адашIэрэр нахь агъэлъэшынэу, гъогухэр щынэгъончъэнымкIэ муниципальнэ комиссиехэм язэхэсыгъохэм ахэр къарагъэблэгъэнхэу.

«Гъогухэм атехъухьэрэ тхьамыкIагъохэм япчъагъэ къызкIеIыхыгъэр информационнэ, пэшIорыгъэшъ Iоф­тхьабзэу зэрахьэрэр нахьыбэ зэрэхъугъэр ары. Гъогухэм ягъэцэкIэжьынкIэ, видеокамерэхэм ягъэу­цункIэ бэ тшIэрэр. Ахэм япхыгъэу гъогухэм атехъухьэрэ тхьамыкIагъор нахь макIэ хъугъэ», — къыIуагъ КъумпIыл Мурат. Къуаджэу АдыгеякIэм иурам игъэ­кIэжьынрэ сатыу гупчэу «МЕГА-Адыгея» зыфиIорэм игъогу зэхэкIыпIэ дэжь автомобиль гъогу щыгъэпсыгъэнымрэ япхыгъэ Iофыгъоми зэхэсыгъом щыхэплъагъэх. Джыдэдэм проект-сметэ документациер агъэхьазырыгъах. АР-м и ЛIышъхьэ мыщ фэдэ IофшIэнхэм мэхьанэшхо зэряIэр, ахэм яшIуагъэкIэ федеральнэ гъогум утехьаныр нахь псынкIэ зэрэхъущтыр къыхигъэщыгъ.

Гъэмафэрэ хьылъэшхохэр зэращэхэ зыхъукIэ, автомобиль гъогухэр зэщамыгъэкъонхэмкIэ Iофтхьабзэу зэрахьанхэ фаеми зэхэсыгъом щытегущыIагъэх. «Адыгеяавтодорым» къызэритыгъэмкIэ, 2023-рэ илъэсым жъоныгъуакIэм и 1-м къыщегъэжьагъэу Iоныгъом и 3-м нэс фабэр градус 32-м зышъхьадэкIыкIэ, шъолъыр е муниципальнэ мэхьанэ зиIэ автомобиль гъогухэм хьылъэшхохэр зезыщэрэ транспортыр нахь макIэрэ ащызекIощт. 2022-рэ илъэсым транспортым ионтэгъугъэ зыщащэчырэ автоматическэ пунктитIу агъэпсыгъ. Мы илъэсым ия 3-рэ мэзищ имыкIызэ джыри ащ фэдэ пунктитIу ашIынэу рахъухьэ. Хьылъэшхохэм язещэнкIэ шапхъэхэр водительхэм зэраукъорэм епхыгъэу рейдхэр нахьыбэрэ зэхащэнхэу, мэкъумэщ гъомылапхъэхэр зезыщэхэрэм, мыжъохэр, пшахъор къызыщычIахырэ чIыпIэхэр зиехэм аIукIэнхэу рахъухьагъ. АР-м и ЛIышъхьэ пшъэ­рылъ афишIыгъ хьылъэшхохэр зезыщэрэ транспортыр пчыхьэрэ е чэщырэ зэрэзекIощт шIыкIэр къыхахынэу.

МэшIокугъогу зэпырыкIыпIэхэр щынэгъончъэу щытынхэм епхыгъэ Iофыгъоми зэхэсыгъом щыхэплъагъэх. Мыгъэ рес­публикэм имэшIокугъогу зэпырыкIыпIэхэм тхьамыкIагъо къазэращымыхъугъэм емылъытыгъэу мы лъэныкъомкIэ пэшIорыгъэшъ амалэу зэрахьэхэрэр лъагъэ­кIотэнэу агъэнэфагъ. Зэхэсыгъом икIэ­уххэм атетэу Адыгеим и ЛIышъхьэу КъумпIыл Мурат Комиссием иунашъохэр зэрагъэцакIэрэм гъунэ лъафынэу пшъэ­рылъ заулэ афишIыгъ.

АР-м и ЛIышъхьэ ипресс-къулыкъу