2024-рэ илъэсым зэтырагъэпсыхьанэу щыт общественнэ чIыпIэхэм якъыхэхынкIэ мэкъэтыным иапэрэ кIэуххэр зэфахьысыжьыгъэх.

Лъэпкъ проектэу «Жилье и городская среда» зыфиIорэм хэхьэрэ шъолъыр проектэу «Къэ­лэ щыIэкIэ Iэрыфэгъур гъэпсыгъэ­ныр» зыфиIорэм диштэу муниципальнэ образованиехэу нэбгырэ мин 20-м ехъу зыщыпсэухэрэм мэкъэтыныр ащыкIуагъ.

Шъугу къэтэгъэкIыжьы: къэлэ щыIэкIэ гупсэфым тегъэпсыхьэгъэ программэр пхырыщыгъэным пае субсидиехэр зэратыщтхэм муниципальнэ образованиищ къахиубытагъ: къалэу Мыекъуапэ, къэлэ псэупIэхэу Яблоновскэмрэ Инэмрэ.

Къалэу МыекъуапэкIэ общественнэ чIыпIиплI амакъэ зыфатынэу къахалъхьагъэр: псэупIэу Ханскэм культурэм и Унэу дэтым къыпэблэгъэ скверыр, В. И. Лениным ыцIэ-кIэ щыт пчэгур, бульварэу «ТекIоныгъэм ия 55-рэ илъэс» ыкIи къэлэ мемориалэу «Фэхыгъэхэм яшIэжь» зыфиIохэрэр.

Мэлылъфэгъум и 26-м ехъу­лIэу щыIэгъэ пэшIорыгъэшъ мэкъэтыным къызэригъэлъэгъуа­гъэмкIэ, МыекъуапэкIэ апшъэрэ чIыпIэр зыубытыгъэр общественнэ чIыпIэу бульварэу «ТекIоныгъэм ия 55-рэ илъэс» зыфиIорэр ары. Къалэм дэс нэбгырэ 10758-мэ ащ пае амакъэ атыгъ. Бульварым изэтегъэпсыхьан ипроект къызэрэдилъытэрэмкIэ, гупчэу ащ иIэщтыр саугъэт-самолетыр ары. Джащ фэдэу плиткэкIэ гъогур агъэпкIэщт, кIэлэцIыкIу джэгупIэр зэтырагъэпсыхьа­жьыщт, чъыгхэр, къэгъагъэхэр агъэтIысхьащтых, къэзыгъэнэфыхэрэр агъэкIэжьыщтых, тIысыпIэхэр ыкIи хэкIитэкъуапIэхэр агъэуцущтых. Проектым къыделъытэ фонтанхэр зэблахъунхэр.

— Къэлэдэсхэм янахьыбэр къызэрэкIэлъэIугъэм тетэу чIыпIэхэр зэтырагъэпсыхьэхэ зыхъу­кIэ чъыгхэм янахьыбэр къагъэ­нэжьыщт. Ар зэхьылIагъэр пчэйхэмрэ псаехэмрэ ары. Ахэр зы чIыпIэм ипхынхэшъ, нэмыкI чIыпIэ щыбгъэтIысхьанхэу щытэп. КIэкIэу къэпIон хъумэ, бульварым теплъэу иIэр ащ фэдизэу лъэшэу зэхъокIыгъэ хъущтэп, — къыщаIуагъ АР-м псэолъэшIынымкIэ и Министерствэ.

Шъугу къэтэгъэкIыжьы: жъоныгъуакIэм и 31-м нэс хэти чIыпIэу анахь къыхихыгъэмкIэ ымакъэ ытын ылъэкIыщт. ДжырэкIэ псэупIэу Яблоновскэм дэсхэм янахьыбэм амакъэ зыфатыгъэр урамэу Титовым (унэу 68/1-р) тет спорт джэгупIэр ары. Ащ пае нэбгырэ 1167-мэ амакъэ атыгъ. ПсэупIэу Инэм фэгъэхьыгъэу къэIогъэн фае анахьыбэ дэдэмэ пчэгоу «Зэкъошныгъэм» амакъэ зэрэфатыгъэр — нэбгырэ 1403-рэ.