Адыгэ Республикэм и ЛIышъхьэ унашъо зэрафишIыгъэм тетэу Хэгъэгу зэошхом иветеранхэм апае зэты­гъо ахъщэ IэпыIэгъоу сомэ миллион 11,5-рэ респуб­ликэ бюджетым къыхагъэкIыгъ.

ТекIоныгъэм и Мафэ ехъулIэу нэбгырэ 1300-рэ фэдизмэ ахъщэ аратыщт, ахэм ащыщэу нэбгырэ 99-р Хэгъэгу зэошхом сэкъатныгъэ хэзыхыгъэхэр ыкIи ащ хэлэжьагъэхэр, блокаднэ Ленинград щыпсэущтыгъэхэр, концлагерьхэм, геттом зыныбжь имыкъугъэхэу адэсыгъэхэр ары. Ахэм сомэ мин 50 зырыз аIэкIагъэхьащт. Адрэхэр заом иилъэсхэм тылым Iоф щызышIагъэхэр, Хэгъэгу зэошхом хэлэжьагъэхэу сэкъат хъугъэхэу зидунай зыхъожьыгъэхэм яшъхьэгъусэхэр ары. Ахэм сомэ мини 5 зырыз аратыщт. Ащ нэфэшъхьафэу Хь. М. Шъэумэным ыцIэкIэ щыт Адыгэ республикэ общественнэ шIушIэ фондым сомэ миллиони 5 къыхигъэкIыгъ Хэгъэгу зэошхом иветеранхэм мылъку IэпыIэгъу ятыгъэным пае. А ахъщэр (сомэ мин 50 зырызэу) мэфэкIым ехъулIэу Адыгеим щыпсэурэ ветеран 99-м аIэкIагъэхьащт. Адыгэ Республикэм IофшIэнымрэ социальнэ хэхъоныгъэмрэкIэ и Министерствэ IэкIэлъ тхылъхэм атетэу ахъщэр къаратыщт. Гупчэу IофшIэнымрэ цIыфхэр социальнэу ухъумэгъэнхэмрэ афэгъэзагъэм Хэгъэгу зэошхом хэлэжьагъэхэм ясчетхэм ахъщэр афыригъэхьащт е федеральнэ къэралыгъо учреждениеу «Урысыем и Почт» зыфиIорэм икъутамэхэмкIэ алъагъэIэсыщт.

Адыгеим и ЛIышъхьэ къызэрэхигъэщыгъэмкIэ, мы охътэ благъэхэм ТекIоныгъэм и Мафэ ехъулIэу зэтыгъо ахъщэ IэпыIэгъур зыIэкIагъэхьан фэе пстэуми алъыгъэIэсыгъэн фае. «Непэрэ мэфэкIым анахьэу тынаIэ зытедгъэтыхэрэр, тызфэгушIохэрэр Хэгъэгу зэошхом иветеранхэр ары. ГухэкI нахь мышIэми, илъэс къэс ахэм япчъагъэ нахь макIэ мэхъу. Арышъ, ветеран пэпчъ тынаIэ тедгъэтын, тыфэгумэкIын, ТекIоныгъэм и Мафэ ехъулIэу ыгу къэтIэтын фае. Мы мэфэкIыр Урысыем итарихъкIэ анахь мэфэкIышхоу щытыгъ, щыт ыкIи щытыщт. Непэрэ уахътэм къыгъэуцурэ гумэкIыгъохэр щыгъэзыегъэнхэмкIэ ТекIоныгъэшхом икъыдэхынкIэ тинахьыжъхэу лIыгъэшхо зезыхьагъэхэм кIуачIэрэ гугъапIэрэ къытаты», — къыIуагъ КъумпIыл Мурат.

АР-м и ЛIышъхьэ ипресс-къулыкъу