Ошъум зэрарэу къыхьыгъэр къалъытагъ
Мэлылъфэгъум и 28-м ошъоу къехыгъэм зэрар къызфихьыгъэхэр Джэджэ ыкIи Кощхьэблэ районхэр ары.
ЗэкIэмкIи республикэм коц гектар 736-рэ, рапс гектар 486-рэ, хьэу гектар 40, зэнтхъ гектар 15, илъэсыбэхэм къакIоцI къэкIырэ лэжьыгъэр зэрыт гектар 822,9-рэ ошъум ыгъэфыкъуагъэх.
Адыгэ Республикэм мэкъу-мэщымкIэ иминистрэу Къуанэ Анзаур хъызмэтшIапIэмэ япащэмэ заIуигъэкIагъ ыкIи Iофхэм язытет зыщигъэгъозагъ, гумэкIыгъом идэгъэзыжьынкIэ хэкIыпIэу щыIэхэм зэдягупшысагъэх. ЗэIукIэм изэфэхьысыжьэу Къуанэ Анзаур лэжьыгъэр къэзыгъэкIырэмэ къяджагъ мэкъумэщ хъызмэтыр ухъумэгъэным фэгъэхьыгъэ программэу щыIэм нахь чанэу хэлажьэхэзэ ашIынэу. Ащ фэдэ шIыкIэр къызфэзгъэфедагъэмэ мылъкоу чIанагъэм ипроцент 80-р ухъумэкIо компанием къыфызэкIегъэкIожьы.