1989-рэ илъэсым къыщегъэжьагъэу мэлылъфэгъум и 28-м IофшIэныр щынэгъон­чъэ­ным и Дунэе мафэ хагъэунэфыкIы.

[caption id="attachment_131887" align="aligncenter" width="800"] Сурэтыр: Iэшъынэ Аслъан.[/caption]

Ащ фэгъэхьыгъэу АР-м Iоф­шIэнымрэ социальнэ хэхъоныгъэмрэкIэ и Министерствэ илъэс къэс конференцие зэхещэ.

Мы мафэхэм щыIэгъэ зэхэсыгъом Iофыгъо зэфэшъхьафхэм щатегущыIагъэх. 2022 — 2023-рэ илъэсхэм IофшIэныр щынэгъончъэным фэгъэхьыгъэ зэхъокIыныгъэхэм, егъэджэнэу зэхащэ­хэрэм, IофшIапIэм щыхъурэ фыкъоныгъэхэр ыкIи тхьамыкIагъоу къыщяхъулIэхэрэр нахь макIэ шIыгъэнхэм афэшI пшъэ­рылъэу къэуцухэрэм атегущыIагъэх. Iофтхьабзэм къыдыхэлъытагъэу мы лъэныкъомкIэ зипшъэ­рылъхэр нахь дэгъоу зыгъэцакIэхэрэм щытхъу тхылъхэр аратыжьыгъэх.

АР-м IофшIэнымрэ социальнэ хэхъоныгъэмрэкIэ иминистрэу Мырзэ Джамбэч Iофтхьабзэр къызэIуихыгъ. Хабзэ зэрэхъу­гъэу, мэлылъфэгъум и 28-м IофшIэныр щынэгъончъэным и Дунэе мафэ зэрэхагъэунэфыкIырэр, ащ мэхьанэ ин зэриIэр ащ къыIуагъ.

ЦIыфым ицIыкIугъом къыщегъэжьагъэу щынэгъончъэ зе­кIуакIэхэр хэлъынхэ зэрэфаер къыхигъэщыгъ.

[caption id="attachment_131888" align="aligncenter" width="800"] Сурэтыр: Iэшъынэ Аслъан.[/caption]

— Нэбгырэ пэпчъ IофшIэпIэ чIыпIэм Iухьэ зыхъукIэ, щынэгъончъэным ылъэныкъокIэ ама­лэу яIэр ышIэн фае. АР-м и ЛIышъхьэу КъумпIыл Мурат мы лъэныкъом лъэшэу ынаIэ тет ыкIи ащ фэгъэхьыгъэ пшъэрылъхэр къегъэуцух. Республикэм ащ епхыгъэу комиссие зэхэщагъэу Iоф ешIэ, ащ хэхьэх хэбзэ къулыкъухэр, профсоюзхэр ыкIи IофшIэпIэ чIыпIэ къязытыхэрэр. Ащ ишIуагъэкIэ IофшIэпIэ чIыпIэ­хэм къащыхъурэ тхьамыкIагъо­хэр нахь макIэ хъугъэх, ахэр къэмы­хъуныр ары типшъэры­лъыр. Iоф­шIэныр щынэгъончъэным епхыгъэ пэшIорыгъэшъ Iофтхьабзэхэр зэхэщэгъэнхэ, пащэхэр Iоф зышIэрэ цIыфхэм гущыIэгъу афэхъунхэ, псауныгъэр къэухъу­мэгъэнымкIэ шапхъэу щыIэхэр амыукъонхэу агурыгъэIогъэн фае, — къыIуагъ министрэм.

Нэужым IофшIэныр щынэгъон­чъэнымкIэ IофшIэпIэ анахь дэгъоу агъэнэфагъэхэм япащэхэм щытхъу тхылъхэр аратыжьыгъэх. Ахэр: СПИД-м пэуцужьыгъэнымкIэ Адыгэ республикэ Гупчэм ипащэу Людмила Мартьяновар, Урысыем и Социальнэ фонд и Къутамэу АР-м щыIэм иотдел ипащэу Щыщэ Зар, пшъэрылъэу иIэмкIэ гъунэпкъэ гъэнэфагъэ зиIэ «Восток-Сервис» зыфиIорэм ихэушъхьафыкIыгъэ подразделение ипащэу Артем Козка.

Iофтхьабзэм къыдыхэлъытагъэу «КIэлэцIыкIухэм анэкIэ Iоф­шIэныр щынэгъончъэныр» зыфиIорэ сурэт къэгъэлъэгъоныр щыIагъ, кIэлэцIыкIухэм яIэшIагъэхэр ащ къырахьылIагъэх. Джащ фэдэу IофшIэныр щынэгъончъэным епхыгъэ щыгъынхэр, лъэкъопылъхьэхэр, пкъыгъо зэ­фэшъхьафхэр къыдэзыгъэкIырэ организациехэм якъэгъэлъэгъон нэбгырэ пэпчъ еплъын амал иIагъ.

ДЕЛЭКЪО Анет.