УФ-м и Президент кIэщакIо зыфэ­хъугъэ зэнэкъокъоу «Лидеры России» зыфиIорэм хэлажьэ зышIоигъохэм ятхын лъагъэкIуатэ. Шъугу къэд­гъэкIыжьын, ар гъэIорышIакIохэм язэнэкъокъу, мыгъэ ятфэнэрэу зэхащэ.

Илъэс 55-м зыныбжь шIомыкIыгъэу, гъэIорышIэн Iофым илъэситIу нахь мымакIэу рылэжьагъэхэр зэкIэ мыщ хэлэжьэнхэ алъэкIыщт.

ГъэIорышIакIохэм ясатырэ ухэхьан амал Iофтхьабзэм къыуеты, сэнаущыгъэу мы лъэныкъомкIэ пхэлъым зебгъэушъомбгъуным, лъыбгъэкIотэным пае упчIэжьэгъу къыщыпфэхъух, гъэIорышIэн Iофым хэшIыкI фызиIэу, IэпэIэсэныгъэ ин зыхэлъ цIыфхэм уиамалхэм уасэ къафашIы.

Финалым нэсыгъэхэм ыкIи текIоныгъэр къыдэзыхыгъэхэм яшIэныгъэ хагъэхъоным е нэмыкI сэнэхьат феджэжьынхэм пэIуагъэхьанэу сомэ миллион грантэу къараты, ыпэкIэ лъыкIотэнхэм пае анахьэу анаIэ зытетын фаер, хэхъоныгъэхэр языгъэшIыщтхэр къафаIуатэ, ащкIэ IэпыIэгъу хъущт гъэсакIохэм, топ-менеджерхэм, компаниешхо­хэм япащэхэм нэIуасэ афашIых.

Зэнэкъокъур уцугъуитIоу гощыгъэ. Зыр пэIудзы­гъэ шIыкIэм тетэу макIо. Хэлэжьэнэу тхылъхэр къезыхьылIагъэхэм гъэIорышIэн Iофым хэшIыкIэу фыряIэм уасэ фэшIыгъэнэу ащ къы­щыдэлъытагъ.

ЯтIонэрэ уцугъор очнэ шIыкIэу щыт. Апэрэм къыщыхахыгъэхэр ащ щызэIокIэхэшъ, гъэIорышIэн Iофым фэгъэхьыгъэ IофшIэнэу къаратыхэрэр зэхафых. Зэнэкъокъум ишапхъэхэм къызэращыдэлъы­тагъэмкIэ, Iофтхьабзэм хэлажьэ зышIоигъохэм ащ иинтернет нэкIубгъоу «лидерыроссии.рф» зыфиIорэм зыщагъэунэфынышъ, анкетэу къытырэм ищыкIагъэхэр ратхэнхэ фае.

ЖъоныгъуакIэм и 14-м нэс тхылъхэр аштэщтых.