Тилъэпкъэгъоу, хы ШIуцIэ Iушъо Шапсыгъэ щыщ Хъущт Рэщыдэ хэу­шъхьафыкIыгъэ дзэ операцием хэлажьэзэ, блэкIыгъэ илъэсым ичъэпыогъу мазэ хэкIодагъ.

Хъущт зэшхэу Рэщыдэрэ Къам­болэтрэ Украинэм щыкIорэ хэушъхьафыкIыгъэ дзэ операцием зэрэхэлажьэхэрэм зэ­кIэри щыгъозагъ пIоми хэукъоныгъэ хъущтэп. КIэлитIум лъэшэу агу афэузыщтыгъ, псаухэу, узынчъэхэу къэкIожьынхэу, те­кIоныгъэр къыдахынэу афэлъаIощтыгъэх.

Ахэр сабыибэ зэрыс унагъо къихъухьагъэх. Янэ-ятэхэу, къуа­джэу ШэхэкIэй къыщыхъугъэ Хъущт Биболэтрэ Тхьагъапшъэ дэс Хэшххэм апхъоу ДэхэкIасэрэ цIыфхэм лъытэныгъэ зыфашIырэ IофшIэкIо къызэрыкIох. КIэлитIум анэмыкIэу зы пшъа­шъэ апIугъ, пхъорэлъ-къорэлъф­хэу щы яI.

Дзэ операцием апэу кIуа­гъэр зэшхэм анахьыжъ Рэщыд. Ар ПсышIуапэ къыщыхъугъ, ащ гу­рыт еджапIэр къыщиухи, нэужым полицием иеджапIэу Шъачэ дэтым щеджагъ, исэнэхьаткIэ ПсышIуапэ Iоф щишIэщтыгъ. Унагъо иIэу, ишъхьэгъусэрэ ежьыррэ зы пшъашъэ, Миланэ, зэдапIущтыгъ.

Ащ ыуж Къамболэт хэушъхьа­фыкIыгъэ дзэ операцием хэлэ­жьэнэу ащагъ. ЗэшитIури лIыблэнагъэ зыхэлъэу, пшъэры­лъэу афашIырэр дэх имыIэу зыгъэцэ­кIэн кIэлэ хъупхъэ, Iэдэбыгъэх. Къулыкъоу ахьыщтыр зыфэдэр къагурыIоу, ятэжъхэр ящысэте­хы­пIэхэу кIуагъэх. Хъущт Хьа­джы­рэтрэ Хэшх Нуррэ Хэгъэгу зэошхор къызэпачыгъ, къэралы­гъо тын зэфэшъхьафыби къа­лэжьыгъ.

Ягупсэхэм къызэраIорэмкIэ, кIэлитIум якъэбар бэрэ къалъы­Iэсыщтыгъэп, ау ар нахь рэхьатыгъ. Зыпари къамыIорэмэ, кIалэхэр псаух, уIагъэ атещагъэ хъугъэп, яхэгъэгу къаухъумэ, къагъэукIытэжьыхэрэп. ЗэкIэри дэгъу хъуным яцыхьэ телъыгъ.

Рэщыдэ ятэ къызщыхъугъэ къуаджэм шъхьэкIэфэныгъэу фишIырэм ишыхьатэу, ШэхэкIэй иныбжьыкIэхэр зэрэзэджэжьы­хэрэ цIэу «Сикамо» зыфиусы­жьыгъагъ. ИкIыгъэ илъэсым ичъэпыогъу мазэ и 5-м ар Ар­темовскэ дэжь къыщаукIыгъ. Мыгъэ ыныбжь илъэс 40 хъущтыгъ. Къуаджэу ШэхэкIэй ар щагъэтIылъыжьыгъ. УФ-м и Президент иунашъокIэ ащ щымыIэжьэу ЛIыхъужъныгъэм иор­ден къыфагъэшъошагъ.

Къамболэт илъэс 34-рэ ­ыныбжь, джыри унагъо иIэп. Ышыпхъу Фатимэрэ ащ ишъхьэ­гъусэу Вартан Манучарянрэ афэ­дэу ари лъэпкъ хореографическэ ансамблэу «Шапсы­гъэм» хэтыгъ. Донецкэ лъэныкъо щыIэу ары къызэраIорэр. Джы ар ежь имызакъоу, ышна­хьыжъи, ащ иунагъуи, янэ-ятэхэми, Хъущт лIакъоми зэрэщытэу ацIэкIэ мэзао. Псауныгъэ иIэ­нэу, текIоныгъэр ылэжьэу, къы­гъэзэжьынэу тыфэлъаIо!

ГухэкIми, мы илъэсым имэзае хы ШIуцIэ Iушъо Шапсыгъэ щыщэу джыри зы кIалэ хэу­шъхьафыкIыгъэ дзэ операцием хэлажьэзэ хэкIодагъ. Ар ТIопсэ районым ит къуаджэу Кодэ­шъхьапIэ щыщ ЕкIошъэ Руслъан. Икъоджэ гупсэ щагъэтIылъы­жьыгъ. Тхьэм джэнэт лъапIэ кIалэхэм къарет.

НЫБЭ Анзор. Сурэтхэр: Хъущтхэм яунэгъо хъарзынэщ.