НыбжьыкIэ инспекторхэр зэнэкъокъугъэх
Урысые зэнэкъокъоу «Безопасное колесо-2023» зыфиIорэм иреспубликэ едзыгъо джырэблагъэ Мыекъуапэ щыкIуагъ.
Ыпэрэ илъэсхэм афэдэу, зэнэкъокъум имуниципальнэ едзыгъохэм апэрэ чIыпIэр къащыдэзыхыгъэхэр шъолъыр едзыгъом хэлэжьагъэх. ГъогурыкIоным иныбжьыкIэ инспекторхэр (ЮИД) «Автогородокым» щызэрэугъоигъэх ыкIи мы лъэныкъомкIэ шIэныгъэу аIэкIэлъыр къагъэлъэгъуагъ. Мыгъэрэ зэнэкъокъур ныбжьыкIэ инспекторхэм ядвижение (ЮИД) илъэс 50 зэрэхъурэм фэгъэхьыгъагъ.
МэфэкI шIыкIэм тетэу къызэIуахыгъэ Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель, гъогурыкIоныр щынэгъончъэнымкIэ къэралыгъо инспекцием и ГъэIорышIапIэу АР-м щыIэм ипащэ игуадзэу, полицием иполковникэу Едыдж Мурат, автомобилистхэм я Урысые обществэу Адыгеим щыIэм илIыкIоу Оздэмыр Налбый.
Зэнэкъокъум команди 10 хэлэжьагъ. Нэбгырэ пэпчъ чэзыучэзыоу гъогурыкIоным ишапхъэхэм хэшIыкIэу фыряIэр, пэрыохъухэр къаухьэхэзэ кушъхьэфачъэр дэгъоу зэрафэн зэралъэкIырэр, зы творческэ номер къагъэлъэгъонхэу щытыгъ. Ащ дакIоу гъогу хъугъэ-шIагъэхэм ахэфагъэхэм апэрэ медицинэ IэпыIэгъур зэрарагъэгъотыщт шIыкIэм зэрэфэкъулайхэр нэрылъэгъу къашIыгъ.
ТекIоныгъэр къыдахыным зэкIэ командэхэр фэбэнагъэх. Ухьазырыныгъэ дэгъоу яIэри къахэщыгъ. Ау анахь зэкъотхэу ыкIи гъогурыкIоным ишапхъэхэмкIэ шIэныгъэ дэгъу зиIэу жюрим ылъытагъэр Мыекъуапэ хэхьэрэ поселкэу Севернэм иеджапIэу N 27-м икоманд. ЯтIонэрэ чIыпIэр къыдихыгъ Красногвардейскэ районым игимназиеу N 1-м, ящэнэрэ хъугъэ Джэджэ районым игурыт еджапIэу N 2-м икомандэ.
Хэлэжьэгъэ пстэуми нэпэеплъ шIухьафтынхэр аратыгъэх. КIэух дэгъу къэзыгъэлъэгъуагъэхэм шIухьафтын лъапIэхэмрэ дипломхэмрэ афагъэшъошагъэх.
Зэнэкъокъум кIэух зэфэхьысыжь Едыдж Мурат къыфишIызэ, темыкIуагъэ зэрахэмытыр къыхигъэщыгъ, шIэныгъэу ыкIи IэпэIэсэныгъэу мы зэнэкъокъум щагъотыгъэхэр гъогурыкIоным щынэгъончъэу хэлэжьэнхэмкIэ къазэрашъхьапэщтхэр къариIуагъ.
Урысые зэнэкъокъоу «Безопасное колесо-2023-рэ» зыфиIорэм ифиналэу мэкъуогъум щыIэщтым Адыгеир къыщигъэлъэгъощт поселкэу Севернэм иеджапIэ иинспектор ныбжьыкIэхэм яотряд (ЮИД).
Iэшъынэ Сусан.
Сурэтыр: АР-м и Къэралыгъо инспекцие.