Урысыем и Правительствэ и Тхьаматэ игуа­дзэу Марат Хуснуллиным видеоконференцие шIыкIэм тетэу я ХIV-рэ Дунэе экономическэ ­форумэу «Россия —Исламский мир: Kazan­Forum» зы­фиIорэм изэхэщэкIо комитет изэхэ­сыгъо непэ зэ­рищагъ.

Мы Iофтхьабзэм хэлэжьагъэх федеральнэ министерствэхэмрэ ведомствэхэмрэ яIэшъхьэтетхэр, хэгъэгум ишъолъырхэм япащэхэр, Урысыем илIыкIохэу бизнесым фэгъэзагъэхэр. Адыгеим ыцIэкIэ зэхэсыгъом хэлэжьагъ Адыгэ Республикэм и ЛIышъхьэу КъумпIыл Мурат.

Форумыр жъоныгъуакIэм и 18-м къыщыублагъэу и 21-м нэс Казань щыкIощт. Урысыем и Президентэу Владимир Путиным иунашъо диштэу 2023-рэ илъэсым къыщыублагъэу а Iоф­тхьабзэм федеральнэ мэхьанэ иIэ хъугъэ.

Урысые Федерацием и Правительствэ и Тхьаматэ игуадзэ къызэрэхигъэщыгъэмкIэ, хэгъэгум тапэкIи социальнэ-эко­номикэ хэхъоныгъэ ышIыным иIо­фыгъохэмкIэ Урысыем быс­лъымэн хэгъэгухэм лъэныкъуа­бэ къызэлъызыубытырэ зэдэлэ­жьэныгъэу адыриIэр ­гъэлъэшыгъэным мэхьанэшхо иIэу щыт.

«Хэгъэгум и Президентэу Владимир Путиным мызэу­-мытIоу къыхигъэщыгъ быс­лъы­мэн хэгъэгухэм адыряIэ зэдэлэжьэныгъэм нахь зиушъомбгъуным ренэу Урысыем ынаIэ зэрэтыригъэтыщтыр. Хэгъэгухэм ащ фэдэ зэфыщытыкIэу зэдыряIэм нахь хэхъоныгъэ ышIынымкIэ мэхьэнэ шъхьаIэ зиIэр мы форумыр ары. Илъэсэу къихьагъэм щыублагъэу федеральнэ лъэгапIэм тетэу ар зэхащэ», — къыIуагъ Марат Хуснуллиным.

Шъугу къэтэгъэкIыжьы: мы аужырэ илъэсищым Урысыемрэ быслъымэн хэгъэгухэм язэ­дэлэ­жьэныгъэ и Организацие къыхиубытэрэ къэралыгъохэмрэ товарэу зэIэкIагъэхьажьырэр процент 26,6-кIэ нахьыбэ хъугъэ. Илъэсэу икIыгъэм Казань щыкIогъэ форумым хэгъэгу 60-м ехъумэ ялIыкIохэр хэлэжьэгъагъэх.

Республикэу Татарстан ипащэу Рустам Миннихановым къызэрэхигъэщыгъэмкIэ, форумым хэлэжьэнхэу хэгъэгу 65-м ехъумэ ыкIи Урысыем ишъолъыр 30-м ехъумэ ялIыкIохэм шIоигъоныгъэ зэряIэр къагъэшъыпкъэжьыгъ. Джащ фэдэу IэкIыб къэрал министрэхэр ыкIи дипломатхэр ащ хэлэжьэщтых. Зэхэхьэшхом изыфэгъэхьазырын илъэныкъо хэушъхьафыкIыгъэхэм Iоф адэзышIэщт купхэр Татарстан щызэхащагъэх.

Я ХIV-рэ Дунэе экономическэ форумэу щыIэщтым ипрограммэ къыдыхэлъытагъ къэгъэлъэгъонэу «Russiа hаIаI ехро» зыфиIорэр. Джащ фэдэу Iофтхьабзэу зэшIуахыщтхэм ателъытагъэу лъэныкъо 15-мкIэ сессии 127-рэ зэхащэнэу агъэнэфагъ.

Ислъам хэгъэгухэм язэдэлэжьэныгъэ и Организацие хэхьэрэ къэралыгъохэм ясатыу-промышленнэ палатэхэм ясессие илъэхъан наукэмрэ гъэсэныгъэмрэ япхыгъэ Iофыгъохэм, Урысыем хэхьэрэ шъолъырхэм инвестициехэмкIэ амалыкIэхэу яIэхэм, джащ фэдэу проектыкIэхэм япхырыщынкIэ правовой, финанс лъэныкъо хэушъхьафыкIыгъэхэм атегущыIэщтых.

Зэхэсыгъом икIэуххэр зэфихьысыжьхэзэ республикэм и ЛIышъхьэ къызэрэхигъэщыгъэмкIэ, Урысыем и Президентэу Владимир Путиным быслъымэн хэгъэгухэм адыряIэ зэдэлэжьэныгъэм амалышIухэр къытынхэу елъытэ.

«Адыгэхэу быслъымэн хэгъэгухэм ащыпсэухэрэм адытиIэ зэпхыныгъэхэм яшIуагъэкIэ пIэлъэ кIыхьэ хъугъэу Адыгеим IофшIэнымрэ культурэмрэ алъэныкъокIэ Iофтхьэбзэ гъэнэфагъэхэр зэрехьэх, Тыркуем, Шам, Иорданием ыкIи КъокIыпIэ Благъэм щыIэ нэмыкI хэгъэгухэм ябизнесменхэм адызэшIуахыщт проектхэр рахъухьанхэм тиреспубликэ дырегъаштэ», - къыIуагъ КъумпIыл Мурат.

Адыгеим и ЛIышъхьэ экономикэ хэхъоныгъэмкIэ министрэм пшъэрылъэу фишIыгъэхэм анахь къащыхигъэщыгъэр быслъымэн хэгъэгухэм бизнесым ылъэныкъокIэ яIофышIэ купхэм зэпхыныгъэу адыряIэр гъэлъэшыгъэн, инвестиционнэ проектыкIэхэр пхырыщыгъэнхэмкIэ ящыкIэгъэ амалхэр ягъэгъотыгъэнхэр ары.

АР-м и ЛIышъхьэ ипресс-къулыкъу