ПсэолъэшIын IофшIэнхэр лъагъэкIуатэх
Мыекъуапэ ипсэуалъэу псыр зыщаукъэбзырэм игъэкIэжьын епхыгъэ IофшIэнхэр лъагъэкIуатэх.
[caption id="attachment_131788" align="aligncenter" width="800"] АР-м псэолъэшIынымкIэ и Министерствэ ипресс-къулыкъу.[/caption]
ЯтIонэрэ уцугъом къыдыхэлъытагъэу рагъэжьагъэр заухыкIэ, псэуалъэм иапэрэ комплекс ыкIуачIэ кубометрэ 40 хэхъощт. УФ-м псэолъэшIынымкIэ и Министерствэ къызритырэмкIэ, 2025-рэ илъэсым IофшIэнхэр аухыщтых.
Шъугу къэдгъэкIыжьын, АР-м и ЛIышъхьэу КъумпIыл Мурат УФ-м и Президентэу Владимир Путиным IукIагъэу, социальнэ-экономикэ Iофхэм язытет зыфеIуатэм, федеральнэ гупчэр къадемыIэу зэшIохыгъуае хъущт Iофыгъохэм ягугъу фишIыгъагъ. Мыекъуапэ ипсэуалъэу псыр зыщаукъэбзырэри ахэм ащыщыгъ.
Апэрэ уцугъом пай къатIупщыгъэ сомэ миллиардрэ миллион 300-р агъэфедагъ ыкIи комплексэу ащкIэ агъэпсыгъэр илъэсым ыкIэм нэс атIупщыщт. Ау ащ нэмыкIэуи сомэ миллиардрэ миллион 700-рэ ящыкIэгъагъ. УФ-м и Президент Правительствэр мы Iофым хэплъэнышъ, ар зэшIохыгъэ хъуным пае программэ гъэнэфагъэ хагъэуцонэу афигъэпытэгъагъ. Ащ ишIуагъэкIэ, ятIонэрэ уцугъом къыдэлъытэгъэ IофшIэнхэр 2023-рэ илъэсым икIымафэ рагъэжьэнхэу хъугъэ.
— Псыр зыщаукъэбзырэ псэуалъэу агъэкIэжьыхэрэм Адыгеим икъэлэ шъхьаIэ хэхъоныгъэхэр ышIынхэмкIэ мэхьанэшхо яI. Илъэс къэс Мыекъуапэ хэхъо, зеушъомбгъу, унакIэхэр, социальнэ псэолъакIэхэр щашIых. Ахэм ящыкIэгъэ инфраструктурэр яIэныр шIокI зимыIэ Iоф. Амалэу щыIэхэр икъоу гъэфедагъэ зэрэхъугъэхэм ишIуагъэкIэ ахэм яшIын рагъэжьагъ. Псыр зыщаукъэбзыщт псэуалъэхэм яапэрэ уцугъо 2021-рэ илъэсым агъэцэкIагъ, джы мары ятIонэрэм фежьагъэх, — къыIуагъ УФ-м псэолъэшIынымкIэ иминистрэ игуадзэу Юрий Гордеевым.
IофшIэнхэр зэрэкIохэрэм лъэплъэ мы министерствэм епхыгъэ ГъэIорышIапIэу «РосСтройКонтроль» зыфиIорэр.