ЧIыпIэ 41-рэ зэтырагъэпсыхьажьыщт
«Iэрыфэгъу къэлэ щыIакIэр гъэпсыгъэныр» зыфиIорэ федеральнэ проектым къыдыхэлъытагъэу чIыпIэ 41-рэ 2023-рэ илъэсым республикэм щагъэкIэжьыщт. Ахэм ащыщэу 10-р общественнэ чIыпIэх, 31-р фэтэрыбэу зэхэт унэхэм ящагух.
[caption id="attachment_131785" align="aligncenter" width="800"] ЗэIухыгъэ къэбарлъыгъэIэс амалхэр.[/caption]
— Адыгеир проектым зэрэхэлажьэрэм ишIуагъэкIэ общественнэ чIыпIэхэр цIыфхэм нахьыбэу агъэфедэнхэ алъэкIынэу хъущт, предпринимательствэм зиушъомбгъуными фэIорышIэщт. Шъолъырым имуниципальнэ образовании 9-мэ мыгъэ чIыпIэхэм ягъэкIэжьын анэсыщт, — къыIуагъ УФ-м псэолъэшIынымкIэ и Министерствэ и Проектнэ дирекцие ипащэу Дина Сафиуллинам.
Тэхъутэмыкъое районым ит къуаджэу Козэт ШIэжьым иплощадэу щагъэкIэжьыщтыр анахь инхэм ащыщ. Проектым къызэрэдэлъытагъэмкIэ, ащ тIысыпIэхэр, нахь кIэракIэ къэзышIыщт архитектурнэ псэуалъэхэр щагъэуцущтых, чэщырэ къэнэфынэу ашIыщт. Площадым изэтегъэпсыхьан заухыкIэ зыгъэпсэфыпIэ чIыпIэ дахэ къоджэдэсхэм яIэ хъущт. Мыщ къыпэблагъэу щытых МФЦ-р, почтэр ыкIи псэупIэ кой администрациер зычIэт унэр.
Поселкэу Инэм Серафим Своровскэм ичылысэу дэтым дэжь скверэу щытыри мыгъэ агъэкIэжьыщт. Ащ екIолIапIэу иIэм нахь зырагъэушъомбгъущт, автомобиль уцупIэхэр щагъэпсыщтых. АР-м псэолъэшIынымкIэ и Министерствэ къызэрэщаIуагъэмкIэ, поселкэр зэпачызэ хы ШIуцIэ Iушъом зекIоу кIохэрэр мы чIыпIэм къыщыуцухэу бэрэ къыхэкIы, арышъ, ар зэтегъэпсыхьэгъэным мэхьанэшхо иI, чылысым къызэлъиубытырэ чIыпIэм игъэкIэжьыни ухыгъэ хъущт.