ЖъоныгъуакIэм и 1-р — Гъатхэмрэ IофшIэнымрэ ямэфэкI
Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр! Гъатхэмрэ IофшIэнымрэ ямэфэкIкIэ тышъуфэгушIо!
ЖъоныгъуакIэм и 1-р зэкIэми зэдагъэлъэпIэрэ, тарихъ бай зиIэ мэфэкIэу щыт. Мамырныгъэм, IофшIэным, лъытэныгъэ зэфыряIэным ятамыгъэу щыт мэфэкIыр гъатхэм идэхэгъум хэтэгъэунэфыкIы.
Адыгеир сыдигъуи лэжьэкIо Iэпшъэ пытэхэмкIэ баигъ. Республикэм гъэхъагъэу иIэхэр зишIушIагъэр Адыгеим илIэужыбэу зиIофшIэнкIэ ащ щытхъу къыфэзыхьыгъэхэр, зэдытиунэм — Урысыем игъэпытэн зиIахьышIу хэзышIыхьэхэрэр ары.
Хъупхъэу Iоф зэрашIэрэм, зэрэзэкъотхэм, республикэ гупсэр нахь зэтегъэпсыхьагъэ хъуным яшъыпкъэу зэрэфэлажьэхэрэм афэшI Адыгеим исхэм тызэрафэразэр мы мафэм къэтэIо.
ТичIыпIэгъу лъапIэхэр, псауныгъэ пытэ шъуиIэнэу, шъунасыпышIонэу, мамырэу шъущыIэнэу, Адыгеими, ти Хэгъэгушхоу Урысыеми апае шъуиIофшIэн тапэкIи гъэхъэгъакIэхэр щышъушIынэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр