«Абилимпикс» зыфиIорэ зэнэкъокъум ишъолъыр чемпионат изэфэхьы­сыжьхэр къэнэфагъэх. Мэфищым къыкIоцI Мыекъопэ индустриальнэ техникумым зипсауныгъэкIэ илэгъухэм акIэмыхьэрэ ныбжьыкIэхэм зыщаушэтыгъ. Президент платформэу «Урысыер — амалхэм яхэгъэгу» зыфиIорэм ар къыдыхэлъытагъ.

АР-м гъэсэныгъэмрэ шIэныгъэмрэкIэ и Министерствэ, сэкъатныгъэ зиIэхэм ядвижениеу «Абилимпикс» зыфиIорэм ишъо­лъыр гупчэ, Лъэпкъ гупчэр Iоф­тхьабзэм кIэщакIо фэхъугъэх.

Чемпионатым ишъолъыр уцугъо зыныбжь илъэс 14-м ехъурэ кIэлэеджакIохэр, апшъэрэ ыкIи гурыт сэнэхьат зэзыгъэгъотырэ ныбжьыкIи 102-рэ хэлэжьагъ. Лъэныкъо 16-у агъэнэфагъэм нэбгырэ 20-мэ текIоныгъэр къа­щыдахыгъ.

— Зэнэкъокъум хэлэжьагъэ пэпчъ гъэхъагъэ ышIыгъ. НыбжьыкIэхэм шIэныгъакIэхэр зэрагъэгъотыгъэх, ныбджэгъу­хэр ашIыгъэх. Ар текIоныгъэшхоу плъытэн фае, ащкIэ нэбгырэ пэпчъ сыфэгушIо, — къы­Iуагъ «Урысыер — амалхэм яхэгъэгу» зыфиIорэм ипащэ игуадзэу Алексей Агафоновым.

Шъолъыр чемпионатыр 2017-рэ илъэсым апэрэу зэхащэ­гъагъ. Ащ дэжьым нэбгырэ 33-рэ хэлэжьэгъагъэмэ, джа пчъагъэм фэдищыкIэ хэхъуагъ, нэбгыри 102-м нэсыгъ.

«Абилимпикс» зыфиIорэ Лъэпкъ гупчэм ипащэу Дина Макеевам къызэриIуагъэмкIэ, мыщ хэлажьэхэрэм сэнаущы­гъэу ахэлъыр къызэрагъэлъагъорэм дакIоу яшэн-хабзэхэр нахь псыхьагъэ мэхъух.

— Зэнэкъокъум нэбгырэ пэпчъ зэрифэшъуашэу зыфегъэхьазыры, сэнаущыгъэу хэлъыр къегъэ­лъагъо. ТекIоныгъэр къы­дэзыхыгъэхэм сыгу къыздеIэу сафэгушIо. «Абилимпиксым» и Лъэпкъ чемпионатэу Москва щыкIощтым шъу­къэкIонэу тышъожэ, — къыIуагъ ащ.

КIэлэеджакIохэм данэм хэдыкIынымкIэ, пхъэм хэбзыкIынымкIэ, дэнымкIэ, робототехникэмкIэ, текстым Iоф дэшIэгъэнымкIэ, зэдзэкIынымкIэ, флористикэмкIэ заушэтыгъ. Гурыт сэнэхьат зэзыгъэгъотырэ студентхэмрэ специалистхэмрэ художественнэ дизайнымкIэ, данэм хэдыкIыгъэ­нымкIэ, гъэлэнымкIэ, текстым Iоф дэшIэгъэнымкIэ, зэдзэкIынымкIэ, предпринимательствэмкIэ, веб-дизайнымкIэ, къэбар­лъыгъэIэс щынэгъончъэнымкIэ яшIэныгъэхэр къагъэлъэгъуагъэх. Мы илъэсым «ПсэолъэшIыныр ыкIи штукатуркэ IофшIэныр» зыфи­Iорэр кIэу къыхэхьагъ.

— Чемпионатым сыхэлэжьэным ыкIи текIоныгъэр къыщыдэсхыным сэркIэ мэхьанэ ин иI. СикIэлэегъаджэ сигъусэу зэнэкъокъум бэрэ зыфэзгъэхьазырыгъ, «Сухое строительство и штукатурные работы» зыфиIорэ лъэныкъор ары сызыхэлэжьагъэр, сищыIэныгъэ гъогу мыщ еспхы сшIоигъу, шIэныгъэу щызэзгъэгъоты­гъэхэр къысфэфедэжьыщтых. Мыщ фэдэ зэнэкъокъу зэрэзэхаща­гъэмкIэ сафэраз, ащ амалышIухэр къытетых, — еIо текIоныгъэр къыдэзыхыгъэ Святослав Олиховым.

Анахь дэгъоу зыкъэзыгъэлъэ­гъуагъэхэр Iоныгъо мазэм хэшыпыкIын уцугъом хэлэжьэщтых ыкIи те­кIоныгъэр къыдэзыхыхэрэр Лъэпкъ чемпионатэу Москва щыкIощтым хэлэжьэщтых.

ДЕЛЭКЪО Анет. Сурэтхэр АКъУ-м ипресс-къулыкъу.