Студентхэм ягъатх
Студентхэм яфестивалэу «АКъУ-м игъатх 2023-рэ» зыфиIорэр Адыгэ къэралыгъо университетым мы мафэхэм щыкIуагъ. Республикэм иапшъэрэ еджапIэхэм, колледжхэм ястудентхэм ясэнаущыгъэ ащ къыщагъэлъэгъуагъ.
Илъэс 24-рэ хъугъэ мы Iофтхьабзэр республикэм зыщызэхащэрэр. Урысые фестивалэу «Урысые студенческэ гъатх» зыфиIорэм ар ишъолъыр едзыгъу. Студентхэм ятворчествэ хэхъоныгъэ егъэшIыгъэным фэгъэхьыгъэ программэм къыдыхэлъытагъэу Урысыем и НыбжьыкIэхэм я Союз зэхещэ, президентскэ платформэу «Урысыер — амалыбэ зиIэ хэгъэгу» зыфиIорэм хэхьэ.
Адыгэ къэралыгъо университетым культурэмкIэ и Гупчэ Мыекъопэ къэлэ администрацием гъэсэныгъэмкIэ икомитет иIэпыIэгъоу фестивалыр илъэс къэс зэхащэ.
Iофтхьабзэр мэфипшIым къыкIоцI кIуагъэ. Адыгэ къэралыгъо университетым, Мыекъопэ къэралыгъо гуманитар-техническэ колледжым, АКъУ-м икъутамэу Шытхьалэ щыIэм, Мыекъопэ къэралыгъо технологическэ университетым иполитехническэ колледж, Адыгэ кIэлэегъэджэ колледжэу Андырхъое Хъусен ыцIэ зыхьырэм, искусствэхэмкIэ Адыгэ республикэ колледжэу Тхьабысым Умарэ ыцIэкIэ щытым ыкIи Мыекъопэ политехническэ техникумэу станицэу Ханскэм дэтым ащеджэрэ студентхэр ары фестивалым хэлэжьагъэхэр.
— Фестивалыр зэрифэшъуашэу кIуагъэ, сэнаущыгъэ ин зыхэлъ студентхэр зэрэтиIэхэр дгъэунэфыгъэ. Мыгъэ апэрэу факультетэу зыщеджэхэрэм елъытыгъэу тымыгощыхэу купхэр кластерхэмкIэ зэтетыутыгъэх. Ащ ишIуагъэкIэ ыпэкIэ зэрэмышIэщтыгъэ студентхэр нэIуасэ зэфэхъугъэх ыкIи нахь дэгъоу зыкъагъэлъэгъуагъ, — еIо «Урысые студенческэ гъатх» зыфиIорэ шъолъыр программэм ипащэу, жюрим хэтэу Лидия Коноваловам.
Студентхэм сэнаущыгъэу ахэлъыр къагъэлъэгъуагъ, зизакъоу зыкъэзыгъэлъэгъуагъэхэм афэдэу творческэ купхэри фестивалым щызэнэкъокъугъэх. Орэд къэIонымкIэ, къэшъонымкIэ, театральнэ, вокальнэ-инструментальнэ искусствэмкIэ, нэмыкI лъэныкъохэмкIэ ныбжьыкIэхэм зыкъагъэлъэгъуагъ.
Творчествэм ылъэныкъокIэ ныбжьыкIэхэм ясэнаущыгъэ зэрэхагъэхъуагъэм щэч хэлъэп. Лъэпкъ искусствэм ишъэфхэр зэрагъэшIагъэх, шъуашэр ащыгъэу къашъохэ зыхъукIэ гур къеIэты, лъэпкъ щэн-хабзэхэм ямэхьани зэхэошIэ. Мыщ фэдэ Iофтхьабзэхэм мэхьанэшхо яI, искусствэм ныбжьыкIэхэр зэфещэх, яныбджэгъуныгъэ егъэпытэ.
— Сэнаущыгъэу тхэлъыр къэдгъэлъэгъон амал тиIагъ, мы мафэхэр чэфэу дгъэкIуагъэх, нэIосакIэхэр тшIыгъэх. Тэ актер сэнэхьат зэтэгъэгъоты, тыкъэшъо ыкIи орэд къэтэIо, лъэныкъо зэфэшъхьафхэмкIэ сэнаущыгъэ ин зыхэлъ студентхэр зытлъэгъукIэ тшIогъэшIэгъон, тэри ащ фэдэ тыхъунэу тыфай, — къытиIуагъ искусствэхэмкIэ Адыгэ республикэ колледжэу Тхьабысым Умар ыцIэ зыхьырэм истудентэу Вячеслав Белозеровым.
«АКъУ-м игъатх 2023-рэ» зыфиIорэм анахь дэгъоу зыкъыщызыгъэлъэгъуагъэхэр «Урысые студенческэ гъатх» зыфиIорэм хэлэжьэщтых. Адыгэ къэралыгъо университетым хьисапымкIэ ыкIи компьютер шIэныгъэхэмкIэ ифакультет истуденткэу Ангелина Касумовам къыIогъэ орэдэу «Возвращайся» зыфиIорэм фестивалым и Гран-при къырихыгъ. Мы университетым икъэшъокIо купэу «Нартыр» лауреат хъугъэ. АКъУ-м истуденткэу Сихъу Джэнэт шыкIэпщынэм къыригъэIогъэ композициер, Мыекъопэ къэралыгъо технологическэ университетым истуденткэу Анна Горковенкэм къыгъэхьазырыгъэ автор щыгъынэу «Душу Грея» зыфиIорэр фестивалым илауреат хъугъэх. Мыекъопэ къэралыгъо гуманитар-техническэ колледжым икъэгъэлъэгъонэу «Митрофанушка 21 века» зыфиIорэр анахь дэгъоу алъытагъ.
Фестивалым икIэух лъэныкъо пэпчъ анахь къахэщыгъэхэм дипломхэр ыкIи щытхъу тхылъхэр афагъэшъошагъэх.
ДЕЛЭКЪО Анет. Сурэтхэр АКъУ-м ипресс-къулыкъу.