Адыгеим иполицие икъулыкъушIэхэм зыныбжь имыкъугъэхэм апае зэхэубытэгъэ пэшIорыгъэшъ Iофтхьабзэу «Твой выбор — 2023» зыфиIорэр зэхащагъ. АР-м хэгъэгу кIоцI IофхэмкIэ и Министерствэ кIэщакIо зыфэхъугъэ Iофтхьабзэр апэрэп Адыгеим зэрэщыкIорэр. КъыткIэ­хъухьэрэ лIэужхэм бзэджэшIагъэхэр ыкIи хэбзэукъоныгъэхэр зэрамыхьанхэм ар фэIорышIэ.

Мы илъэсым рекIокIыгъэ Iоф­тхьабзэм министерствэм иподразделение зэфэшъхьафхэм якъулыкъушIэ 75-рэ хэлэжьа­гъэх. КIэлэеджакIохэм ыкIи ахэм янэ-ятэхэм лекцие 500-м ехъу къафеджагъэх. ЗэгурыIоныгъэ зэрымылъ унагъохэу учетым щытхэм хэушъхьафыкIыгъэу анаIэ атырагъэтыгъ. Ащ фэдэ унэгъуи 178-мэ ащыIагъэх. Ащ нэмыкIэу зыныбжь имыкъугъэхэр зыщызэрэугъоирэ чIыпIи 130-м ехъу ауплъэкIугъ. Къатыбэу зэтет унэхэм ястаршэхэм, джащ фэдэу къоджэ псэупIэхэм япащэхэм зэдэгущыIэгъу 80-м ехъу адашIыгъ.

Лъыплъэн ямыIэу гъогум тетхэр къыхэгъэщыгъэнхэм ыкIи хэбзэукъоныгъэхэр зэрамыхьанхэм афэIорышIэрэ пэшIоры­гъэшъ патриотическэ, спорт ыкIи шIэныгъэм хэзыгъэхъорэ Iоф­тхьабзэхэр къулыкъухэм ра­гъэкIокIыгъэх.

Ахэм ащыщ министерствэм епхыгъэу зэхащэгъэ Общественнэ советым илIыкIохэр зыхэлэжьэгъэхэ Iофтхьабзэу «Я вы­бираю жизнь» зыфиIорэр. Ар зэфэшIыгъэ шIыкIэм тетэу Iоф зышIэрэ Мыекъопэ хэушъхьафыкIыгъэ егъэджэн-пIуныгъэ учреждением щыкIуагъ ыкIи мыщ щеджэрэ нэбгыри 100-м ехъу Iофтхьабзэм хэлэжьагъ. Хэгъэгу зэошхом илъэхъан тичIыпIэгъухэу лIыхъужъ хъугъэ­хэм якъэбархэр къафаIотагъэх, джащ фэдэу медицинэм истудентхэр къыхагъэлажьэхи апэрэ медицинэ IэпыIэгъур зэрябгъэ­кIыщтым Iэтахъохэр нэрылъэгъоу щагъэгъозагъэх.

Ащ нэмыкIэу спортым имэхьанэ, джащ фэдэу спорт еджа­пIэу N 2-м щеджэхэрэм правэмкIэ пIуныгъэм иIофыгъохэр къафаIотагъэх. Мы Iофтхьабзэр Мыекъуапэ хэгъэгу кIоцI къулыкъум иIофышIэхэм зэхащагъ. Ащ хахьэу зыныбжь имыкъу­гъэхэм яIофыгъохэм афэгъэзэгъэ инспекторхэм Iофтхьэбзэ зэхэтхэр рагъэкIокIыгъэх.

Урысыем хэгъэгу кIоцI Iоф­хэмкIэ и Министерствэ имеж­муниципальнэ отделхэу «Кощхьабл» ыкIи «Адыгэкъал», джащ фэдэу хэгъэгу кIоцI къулыкъум иотделэу Джэджэ районым щыIэм якъулыкъушIэхэм учет зэфэшъхьаф­хэм ахэт кIэлэ­цIыкIухэм апае футбол джэгунхэр зэхащагъэх. Ащ нэмыкIэу Тэхъутэмыкъое районым иполицие икъулыкъу­шIэхэм кIэлэ­еджакIохэр Юнармием хэтхэм аIуагъэкIагъэх, ныбжьыкIэ движением хахьэ зышIоигъо­хэр ащ пылъ къэбар­хэм ащагъэгъозагъэх.

Апшъэрэ классхэм арысхэм яфитыныгъэхэр ашIэнхэм пае джэгукIэ шъуашэм илъэу «Хьыкум процесс» зыфиIорэр Мые­къопэ районым щырагъэкIо­кIыгъ, роль зэфэшъхьафхэр къашIызэ кIэлэеджакIохэм заушэ­тын амал яIагъ. Мыщ дэжьым АР-м хэ­гъэгу кIоцI IофхэмкIэ и Министерствэ экстремизмэм пэуцужьыгъэнымкIэ игупчэ икъулыкъушIэхэм ны-тыхэм анаIэ тырарагъэдзагъ кIэлэцIыкIухэм интернетыр щы­нэгъончъэу агъэ­федэнымкIэ ашIэн фаехэм.

АР-м хэгъэгу кIоцI IофхэмкIэ и Министерствэ наркотикхэм хэбзэнчъэу ягъэзекIон лъыплъэ­рэ иотдел иIофышIэхэм хэушъхьафыкIыгъэ Iофтхьабзэу «Твой выбор» зыфиIорэр

Адыгэкъалэ икIэлэеджакIохэм афызэхащагъ. Мыщ фэгъэхьыгъэ пьесэу «Остановиться вовремя» зыфиIорэр къафагъэлъэгъуагъ.

Зэфэхьысыжьхэр къашIызэ Адыгеим иполицие икъулыкъу­шIэхэм къаIуагъ тапэкIи мыщ фэдэ пэшIорыгъэшъ Iофтхьабзэхэр зэхащэзэ зэрашIыщтыр ыкIи ахэм къыхагъэлэжьэрэ ныбжьыкIэхэм япчъагъэ нахьыбэ шIыгъэн зэрэфаер.

АР-м хэгъэгу кIоцI IофхэмкIэ и Министерствэ ипресс-къулыкъу