Мэлылъфэгъум и 27-м, урысые парламентаризмэм и Мафэ, республикэ парла­ментым и Тхьаматэ игуадзэу Цэй Эдуард АР-м и Къэралыгъо Совет — Хасэм итынхэр зисэнэхьаткIэ гъэхъэ­гъэ­шхохэр зышIыгъэхэм аритыжьыгъэх.

ТиIофшIэгъоу, илъэс 43-м ехъугъэу «Адыгэ макъэм» щы­лажьэу, зэдзэкIынымкIэ от­делым ипащэу, АР-м и Конституцие изэдзэкIын дэлэ­жьэгъэ Тхьаркъохъо Сафыет Нэшъэрдин ыпхъум АР-м и Къэралыгъо Совет — Хасэм и Щытхъу тамыгъэу «Закон. Пшъэрылъ. ЦIыфыгъ» зыфи­Iорэр къыфагъэшъошагъ.

Илъэсыбэ хъугъэу гуетыныгъэ фыряIэу Iоф зэрашIэрэм, Адыгэ Республикэм исоциальнэ-экономикэ, иобщественнэ­-политикэ хэхъоныгъэ яIахьы­шхо зэрэхашIыхьэрэм афэшI АР-м и Къэралыгъо Совет — Хасэм и Щытхъу тхылъ афагъэшъошагъ Адыгэ Республи­кэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм зэпхыныгъэ адыря­IэнымкIэ ыкIи къэбар жъугъэм иамалхэмкIэ и Комитет иотделэу тилъэпкъэгъухэм адэла­жьэрэм ипащэу Мурад Гощ­лъапIэ, мы Комитетым иотде­лэу хэутын Iофымрэ къэбар жъугъэм иамалхэмрэ адэла­жьэрэм ипащэу Людмила По­гасеевам, АР-м хэгъэгу кIоцI IофхэмкIэ и Министерствэ иследственнэ гъэIорышIапIэ юстициемкIэ иподполковни- кэу Джэнчэтэ Аскэр. Адыгеим ипар­ламент ирэзэныгъэ тхылъ АР-м и Къэралыгъо Совет —Хасэм идепутатэу Ирина Мухинам фагъэшъошагъ.

Республикэ парламентым ипащэу Владимир Нарожнэмрэ депутатхэмрэ ацIэкIэ Цэй Эдуард тынхэр къызыфагъэшъошагъэхэм гуетыныгъэ фыряIэу зэрэлажьэхэрэм фэшI зэра­фэразэр къыIуагъ, яIофшIэн гъэхъэгъакIэхэр тапэкIи ща­шIынэу афэлъэIуагъ.

— ЦIыф зэчыишIухэр, Iоф­шIэным зыIэ екIухэрэр, гуетыныгъэ фызиIэу лажьэхэрэр, патриот шъыпкъэхэр Адыгеим щэпсэух. Шъузпылъ Iофым гъэхъагъэу щышъушIыгъэхэмкIэ, щыIэныгъэм игупчэ шъыпкъэ шъузэритымкIэ цIыф лъэп­къыбэ зыщызэдэпсэурэ тирес­публикэ ищытхъу яшъогъаIо. Урысые парламентаризмэм и Мафэ тынхэр къызэрэшъосты­жьыгъэм мэхьанэшхо иIэу сэ­лъытэ, — къыIуагъ депутатым.