УФ-м и Президент кIэщакIо зыфэхъугъэ зэнэкъокъоу «Лидеры России» зыфиIорэр мэлылъ­фэгъу мазэм икъихьагъум къызэIуахыгъ. Мыгъэ ар ятфэнэрэу рагъэкIокIы.

Гупчэ къэбарлъыгъэIэс амал­хэм къызэратырэмкIэ, зэнэ­къокъум хэлажьэ зышIоигъоу тхылъ къэзытыгъэхэм япчъагъэ минишъэ заулэ хъугъэ. Урысыем исубъект пстэумэ афэдэу Адыгеими илIыкIохэр мыщ ­илъэс къэс хэлажьэх.

— IофшIэныр шIу зылъэгъоу, мурад гъэнэфагъэ зиIэ цIыф Iушхэм якъыхэгъэщынкIэ ыкIи ягъэхьазырынкIэ шIуагъэ мы зэнэкъокъум къызэритырэр уахътэм къыгъэлъэгъуагъ, — къыритхагъ ащ фэгъэхьыгъэу АР-м и ЛIышъхьэу КъумпIыл Мурат иинтернет нэкIубгъохэм ащыщ. — Адыгеим щыщэу кIэлэ ныбжьыкIэ нэбгырипшI пчъагъэ илъэс зэфэшъхьафхэм мы зэнэкъокъум хэлэжьагъэх, кIуачIэу яIэр ауплъэкIугъ, зэ­фэ­хьысыжьхэр ашIыгъэх, мурадыкIэхэр зыфагъэуцугъэх. Уцугъохэм ащыпхырыкIыхи, рес­публикэм икъэралыгъо хэбзэ къулыкъухэм Iоф ащашIэн амал зэратыгъэхэри тиIэх. Джы ти­кIалэу хэлажьэхэрэми зэрифэшъуашэм тетэу зыкъагъэлъэ-гъо­нэу, «Урысыем и Лидерхэм» ясатырэ хэтынхэу фитыныгъэ зэряIэр къаушыхьатыжьышъунэу, Адыгеим ыкIи хэгъэгум шIуагъэ къафахьэу Iоф ашIэным ищыкIэгъэ шIэныгъи, сэнаущыгъи къыхахынэу сафэлъаIо.

Адыгеим икIыгъэу «Лидеры России» зыфиIорэ зэнэкъокъум хэлажьэхи, финалым ихьагъэхэм ащыщых Никита Кулейкинымрэ Дмитрий Игнатовымрэ, финалныкъом нэсыгъэх Мыгу Заур, Павел Долговыр, Вреж Мегрикьян, Константин Щер­баковыр.

Зэнэкъокъу ужым ахэр зэкIэри къэралыгъо хэбзэ къулыкъу зэфэшъхьафхэм Iоф ащашIэнэу арагъэблэгъагъэх. ГущыIэм пае, Константин Щербаковыр АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет ипащэ игуадз.

Дмитрий Игнатовыр 2020-рэ илъэсэу зэнэкъокъум зыщыхэ­лэ­жьагъэм республикэ гъэзетэу «Адыгэ макъэм» ибухгалтер шъхьаIэщтыгъ, непэ Мыекъопэ къэралыгъо технологическэ уни­верситетым цифровизациемкIэ ипроректор. Мы зэнэкъокъум ыпэкIэ улъызыгъэкIотэщт амалыкIэхэр къызэрэпфызэIуихырэм, къэралыгъо къулыкъум, егъэджэн ыкIи научнэ лъэныкъохэм уащылэжьэнэу е биз­несыр лъыбгъэкIотэнэу амал къызэрэуитырэм ащ къыкIе­гъэтхъы.

Ащ зыщыхэлэжьэгъэ уахътэм шъолъыр зэфэшъхьафхэм къарыкIыгъэхэу, мурад гъэнэфа­гъэу яIэм чанэу екIолIэрэ Iушыбэмэ Дмитрий нэIуасэ афэхъугъэу непэ къызнэсыгъэми зэпхыныгъэ адыриI. Ахэм ежьыми кIуачIэ къызэрэратырэр, хэхъоныгъэхэр ышIынхэмкIэ яшIуагъэ лъэшэу къызэрэкIорэр къыхегъэщы.

Дмитрий къызэрэтиIуагъэмкIэ, зэнэкъокъум пылъ шап-хъэ­хэм адиштэу грантэу къы­хьыгъэ сомэ миллионыр Мос­ковскэ къэралыгъо университетэу М.В.Ломоносовым ыцIэ зыхьырэм ишIэныгъэ щыхигъэ­хъоным пэIуигъэхьагъ.

— «Лидеры России» зыфи­Iорэ зэнэкъокъум изэхэщакIохэм ащ фэдэ амал къызэрэсатыгъэм пае лъэшэу сафэраз. Республикэм, хэгъэгум шIуагъэ къызэрафэсхьырэм сырэгушхо, — къыIуагъ ащ. — Мыгъэ ежьэгъэ зэнэкъо­къум хэла­жьэхэрэм гъэхъагъэ­хэр ашIынхэу, сыдигъокIи къызэкIэмы­кIонхэу, мурадэу яIэхэм теу­бытагъэ хэлъэу якIо­лIэнхэу сафэлъаIо. Хэлэжьэщтмэ джыри ехъырэхъышэхэрэм джэнджэш агу къимыхьанэу, заушэтыжьынэу, шIэныгъакIэхэр къы­зэIуахынхэу ясэIо.

Зэнэкъокъум хэлажьэ зышIоигъохэм жъоныгъуакIэм и 14-м нэс зарагъэтхын алъэкIыщт. ГъэIорышIэн IофшIэныр илъэси 2-м мынахь макIэу зыгъэцэкIагъэхэу зыныбжь илъэс 55-м нэсыхэрэр ары хэлэжьэнхэу фитыныгъэ зиIэхэр. Зызщяб­гъэтхышъущтыр ыкIи къэбарыр нахь игъэкIотыгъэу зэрыбгъотэщтыр: лидерыроссии.рф.

ХЪУТ Нэфсэт. Сурэтыр Артур Лаутеншлегер тырихыгъ.