Медицинэ IэпыIэгъу псынкIэ языгъэгъотырэ IофышIэхэу лъытэныгъэ зыфэтшIыхэрэр!

Шъуисэнэхьат епхыгъэ мэфэкIымкIэ тышъуфэгушIо!

Псауныгъэм икъэухъумэн епхыгъэ Iофэу жъугъэцакIэрэр анахь къинхэм, пшъэдэкIыжьышхо зыпылъхэм ащыщ. ШIэныгъэ куурэ щэIагъэрэ зиIэхэр, гукIэгъу зыхэлъхэр, псынкIэу медицинэ IэпыIэгъу языгъэгъотын зылъэкIыхэрэр, чIыпIэ зэжъу ифагъэхэм IэпыIэгъу ятыгъэным ренэу фэхьазырхэр ары шъуикъулыкъу щылажьэхэрэр.

Сымаджэхэм япсауныгъи, ящыIэныгъи къарыкIощтыр бэкIэ зэлъытыгъэр IэпэIэсэныгъэу шъухэлъымрэ шъуиIоф шъузэрегугъурэмрэ ары. ПшъэдэкIыжьышхо зыпылъ IофшIэн къин шъо жъугъэцакIэрэр.

Пандемием илъэхъан шъуикъулыкъу иIофышIэхэр яшъыпкъэу коронавирусым пэуцужьыгъэх, Адыгеим исхэу ащ фэдэ узыр къызэутэлIагъэхэм IэпыIэгъу псынкIэ ягъэгъотыгъэнымкIэ ищыкIэгъэ амалхэр зэра­хьагъэх, чэщи мафи ямыIэу япшъэрылъ еIолIэнчъэу агъэцэкIагъ.

Ныбджэгъу лъапIэхэр, шъуисэнэхьат епхыгъэ мэфэкIыр зыщыхэжъугъэунэфыкIырэ мафэм тызэрэ­шъуфэразэр шъотэIо гуетыныгъэ фышъуиIэу шъузэрэ­лажьэрэм, Iофэу къыхэшъухыгъэм шъузэрэфэшъыпкъэм, мэхьанэшхо зиIэ унэшъо тэрэзхэр псынкIэу шъуштэн зэрэшъулъэкIырэм, пытагъэ зэрэшъухэлъым афэшI.

Псауныгъэ пытэрэ щыIэкIэ-псэукIэ дэгъурэ шъуиIэнэу, шъуиIофшIэн гъэхъэгъакIэхэр щышъушIынэу, шIоу щыIэр зэкIэ къыжъудэхъунэу тышъуфэлъаIо!

Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу КъумпIыл Мурат

Адыгэ Республикэм и Къэралыгъо Совет — Хасэм и Тхьаматэу Владимир Нарожнэр