Республикэм исхэм мэлылъфэгъум и 25-м Адыгеим и Къэралыгъо быракъ и Мафэ хагъэунэфыкIыгъ.

[caption id="attachment_131564" align="aligncenter" width="800"] А. Лаутеншлегер.[/caption]

Дышъэ жъогъо 12-рэ зэблэдзыгъэ дышъэ щэбзищрэ зытешIыхьэгъэ къэ­ралыгъо быракъ уцышъор я ХIХ-рэ лIэшIэгъум иапэрэ кIэлъэныкъо адыгэ­хэм агъэфедэщтыгъэ быракъыр ары зытырашIыкIыгъэр.

Мэлылъфэгъум и 20-м къыщегъэ­жьагъэу культурэмкIэ къэралыгъо, муниципальнэ учреждениехэм мэфэкI Iофтхьабзэхэр зэхащагъэх. Тыгъуасэ къалэу Мыекъуапэ шыкъэгъачъэ щыкIуагъ, Адыгэ Республикэм лъэпкъ культурэмкIэ и Гупчэ лъэпкъ Iэпэщысэхэм, изобразительнэ искусствэмкIэ IэшIагъэхэм якъэгъэлъэгъон зэхищагъ.

IэпэIасэхэм дышъэидэнымкIэ, ­адыгэ мэкъэмэ Iэмэ-псымэхэмкIэ яIэшIа­гъэхэр ыкIи нэмыкI пкъыгъохэр къагъэлъэгъуагъэх. Адыгеим итворческэ коллективхэмрэ иартистхэмрэ зыхэлэжьэгъэхэ концертым мэфэкI Iоф­тхьабзэхэр лъигъэкIотагъэх. Адыгэ джэгукIэ мэфэкIыр аухыгъ.

Непи Iофтхьэбзэ зэфэшъхьаф­хэр зэхащагъэх. Къалэу Мыекъуапэ искусствэхэмкIэ икIэлэцIыкIу еджапIэу N 1-м адыгэ быракъым и Мафэ фэгъэхьыгъэ урокхэр щыкIуагъэх. ИскусствэхэмкIэ Адыгэ республикэ кIэлэцIыкIу еджапIэу Лъэцэрыкъо Кимэ ыцIэ зыхьырэм Адыгэ Респуб­ликэм ибыракъ и Мафэ фэгъэхьыгъэ сыхьат щыкIуагъ. КIэлэцIыкIу художественнэ еджапIэм непэ сыхьатыр 17.20-м Адыгэ Республикэм и Къэралыгъо быракъ фэгъэхьыгъэ сыхьатыр щыкIощт.