Iофтхьабзэм хэлэжьагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м псауныгъэр къэухъумэгъэнымкIэ иминистрэу Мэрэтыкъо Рустем, Мыекъуапэ имэрэу Геннадий Митрофановыр, хэбзэ къулыкъухэм япащэхэр, псауныгъэм икъэухъумэн фэгъэзэгъэ IофышIэхэр, мединститутымрэ медколледжымрэ ясту­дентхэр.

Квадрат метрэ мини 4 фэдиз хъурэ медицинэ учреждениеу къатиплIэу зэтетыр къалэм имикрорайонхэу цIыфхэр бэу зыщыпсэухэрэм ащыщым щагъэ­псыгъ. Псауныгъэм икъэухъумэн тегъэ­псыхьэгъэ лъэпкъ проектым къыдыхэлъытэгъэ шъолъыр программэм диштэу поликлиникакIэм игъэпсын сомэ миллион 240-рэ тырагъэкIодагъ, медицинэ оборудованием икъэщэфын инфраст­руктурэ бюджет чIыфэу сомэ миллион 54-рэ пэIуагъэхьагъ.

Адыгеим и ЛIышъхьэ поликлиникакIэр къызэпиплъыхьагъ, ащ амалэу иIэхэм защигъэгъозагъ. Терапевтхэм ямыза­къоу, нэмыкI специалистхэми якабинетхэр ащ хэтых. Джащ фэдэу диагностикэ, рентген, ультразвуковой ыкIи нэмыкI уплъэ­кIунхэр мыщ щарагъэшIынхэ алъэ­кIыщт.

«Мы микрорайоным поликлиникакIэ зэрэщагъэпсыгъэм ишIуагъэкIэ медицинэ IофышIэхэми сымаджэхэми амалышIухэр яIэ хъугъэ. IэпыIэгъу дэгъу цIыфхэм мыщ щагъотын фае», — къы­Iуагъ КъумпIыл Мурат.

Мыекъопэ къэлэ поликлиникэм иврач шъхьаIэу ЕмтIылъ Оксанэ къызэриIотагъэмкIэ, поликлиникакIэм цIыфхэр къеуалIэхэу ригъэжьагъ. Зы сменэм нэбгырэ 500-мэ яфэIо-фашIэхэр ащ ща­гъэцэкIэщтых. Нэбгырэ мин 36-мэ ар ателъытагъ. Джырэ шапхъэхэм адиштэу поликлиникэр зэтегъэпсыхьагъ. Мэрэтыкъо Рустем къызэриIуагъэмкIэ, кол­-гупчэмкIэ е порталэу «Къэралыгъо фэIо­-фашIэхэр» зыфиIорэмкIэ цIыфхэм зарагъэтхын алъэкIыщт.

КъумпIыл Мурат поликлиникэм къэ­кIуагъэхэм адэгущыIагъ, медицинэ IэпыIэгъоу арагъэгъотырэм рыразэхэмэ кIэупчIагъ. ЕтIанэ поликлиникэм иконференц-залыкIэ республикэм имедицинэ организациехэм япащэхэм зэIукIэгъу щадыриIагъ.

Адыгеим и ЛIышъхьэ ищыкIэгъэ компьютер техникэр учреждением къы­фащэфынэу, къэбарлъыгъэIэс системэм дэгъоу Iоф ышIэным анаIэ тырагъэтынэу, къэбарлъыгъэIэс поликлиникэм къыпэIулъ чIыпIэм изэтегъэпсыхьан аухынэу пшъэрылъ афишIыгъ.

«ЦIыфхэм япсауныгъэ икъэу­хъумэн епхыгъэ Iофыгъохэм апшъэрэ мэхьанэ ятэты. МыщкIэ Iоф цIыкIу щыIэп. Медицинэ фэIо-фашIэхэр нахьышIоу агъэцэкIэнхэ, Iэдэб ахэлъэу регистратурэм щадэгущыIэнхэ, логистикэ дэгъу зэхащэн, общественнэ транспортым иуцупIэхэр Iэрыфэгъоу зэтырагъэпсыхьанхэ фае. Медицинэ фэIо-фашIэхэр нахьышIоу зэхэщэгъэнхэр зэкIэми зэдызэшIотхын фэе пшъэрылъэу щыт», — къыIуагъ КъумпIыл Мурат.

Адыгеим и ЛIышъхьэ зэрэхигъэунэфыкIыгъэмкIэ, псауны­гъэм икъэухъумэн фэгъэзэгъэ лъэныкъор джырэ шапхъэхэм адиштэу зэтегъэпсыхьэгъэнымкIэ мы аужырэ уахътэм рес­публикэм Iофышхо щашIагъ. Псауныгъэм икъэухъумэн фэгъэ­зэгъэ учреждениябэ агъэцэ­кIэжьыгъ, сымэджэщхэр, по­ли­клиникэхэр, фельдшер-мамыку IэзапIэхэр, амбулаториехэр агъэпсыгъэх. МыщкIэ Урысые Федерацием и Президентэу Владимир Путиным, УФ-м и Правительствэ, партиеу «Единэ Россием» яIэпыIэгъу ишIуагъэ къэкIо. Поликлиникэхэр мылъкукIи, техникэкIи нахьышIоу зэтегъэпсыхьэгъэнхэ зэрэфаем дакIоу Адыгеим и ЛIышъхьэ игъо афилъэгъугъ цIыфхэм яшIошIхэм язэгъэшIэнкIэ Iофэу ашIэрэр агъэлъэшынэу, ахэм закъызэ­рэфагъэзэрэ тхылъхэм ахэп­лъэнхэу.

«Медицинэ IэпыIэгъу ягъэ­гъотыгъэнымкIэ цIыфхэм зы­къызэрэтфагъэзэрэ тхылъ пэпчъ рыкIорэм сынаIэ тесэгъэты. ПоликлиникакIэм амалэу иIэхэм яшIуагъэ къызыкIощтыр медицинэ фэIо-фашIэхэр мыщ дэгъоу щызэхащэхэ зыхъукIэ ары. Медицинэ фэIо-фашIэхэм цIыф­хэр рырэзэнхэмкIэ зэкIэ афэлъэкIырэр ашIэн фае. МыщкIэ бэ къыдэлъытэгъэн фаер. Ана­хьэу мэхьанэ зиIэр медицинэ IофышIэм IэпэIэсэныгъэу хэ­лъыр, сымаджэ пэпчъ шъхьэ­кIафэу фишIырэр ары», — къы­Iуагъ КъумпIыл Мурат.

Адыгеим псауныгъэр къэу­хъумэгъэнымкIэ и Министерствэ ипащэхэм пшъэрылъ афашIыгъ медицинэ IэпыIэгъур цIыфхэм нахьышIоу ягъэгъотыгъэным анаIэ тырагъэтынэу, «Къоджэ доктор» зыфиIорэ программэр нахь чанэу пхыращынэу, Мые­къопэ къэралыгъо техноло­гическэ университетым имедицинэ институт яIэпыIэгъоу медицинэ кадрэхэм якъэгъэхьазырын епхыгъэ Iофыгъохэр зэшIуахынэу.

АвтомобилыкIэхэр аратыгъэх

Адыгеим и ЛIышъхьэу КъумпIыл Мурат медицинэ IэпыIэгъу псынкIэ языгъэгъотырэ рес­публикэ станцием автомобили 9 зэрэратыгъэм фэгъэхьыгъэ Iофтхьабзэу IэзэпIакIэм ыпа­шъхьэ щыкIуагъэм хэлэ­жьагъ. Урысые Федерацием и Пра­вительствэ 2022-рэ илъэ­сым тыгъэгъазэм и 2-м ышIыгъэ унашъор гъэцэкIэгъэным тегъэ­псыхьагъэу федеральнэ бюд­жетым къыхагъэкIыгъэ сомэ мил­лион 42-мкIэ автотранс­портыр къащэфыгъ.

Адыгеим и ЛIышъхьэу КъумпIыл Мурат медицинэ IэпыIэгъу псынкIэ языгъэгъотырэ Адыгэ республикэ станцием иIофы­шIэхэм тхьашъуегъэпсэу ари­Iуагъ дэгъоу Iоф зэрашIэрэм фэшI ыкIи медицинэ IэпыIэгъур нахьышIоу зэхэщэгъэным мэхьа­нэшхо зэриIэр къыхигъэщыгъ.

«Шъоры апэу цIыфхэм Iэпы­Iэгъу афэхъухэрэр, ахэм ящы­Iэныгъэ къэзгъэнэжьхэрэр. Тэ дэгъоу къыдгурэIо специалистым IэпэIэсэныгъэу хэлъыми, апэрэ медицинэ IэпыIэгъур псынкIэу зэрарагъэгъотырэми мэхьанэшхо зэряIэр. АвтотранспортыкIэм ишIуагъэкIэ IэпыIэгъу псын­кIэ языгъэгъотырэ брига­дэхэр нахь псынкIэу зыдэкIонхэ фэе чIыпIэм зэрэнэсыщтхэм, яIофшIэн нахьышIоу зэрэзэхащэщтым сицыхьэ телъ. Ащ епхыгъэу хьадэгъур къызылъы­Iэсыхэрэр нахь макIэ хъущт, цIыфхэм япсауныгъэ изытет зыкъыIэтыщт», — къыIуагъ КъумпIыл Мурат.

Адыгеим и ЛIышъхьэ зэрэ­хигъэунэфыкIыгъэмкIэ, псауныгъэм икъэухъумэн фэгъэзэгъэ къулыкъухэм яавтопарк бэшIагъэ загъэкIэжьырэр. 2016-рэ илъэсым къыщегъэжьагъэу ав­томобилыкIэ 58-рэ республикэм къыIэкIагъэхьагъ. IэпыIэгъу псынкIэм иавтомобильхэм илъэ­си 3 нахьыбэрэ агъэфедагъэ ахэтэп.

Адыгеим псауныгъэр къэу­хъу­мэгъэнымкIэ иминистрэ рес­публикэм и ЛIышъхьэ къыфиIотагъ медицинэ IэпыIэгъу псынкIэ зэрарагъэгъотырэ автомобильхэу къаIэкIэхьагъэхэм медицинэ, реанимационнэ, травматологическэ оборудованиер, дефибрилляторыр, электрокардиографыр, ингаляторыр ыкIи нэмыкIхэр зэритхэр.

IэпыIэгъу псынкIэ ягъэгъотыгъэнымкIэ ыкIи тхьамыкIагъор къызэхъулIагъэхэм яIэзэгъэнымкIэ Адыгэ республикэ гупчэм иврач шъхьаIэу Сихъу Ахьмэд къыIотагъ автомобильхэр къалэу Мыекъуапэрэ станицэу Хан­скэмрэ адэсхэм апае къызэрэзыфагъэфедэщтхэр. Джыдэдэм медицинэ IэпыIэгъу псынкIэр языгъэгъотырэ къулыкъум автомобиль 50 иI.

АвтомобилыкIэхэм медицинэ IэпыIэгъоу цIыфхэм арагъэгъотырэм зыкъызэрэригъэIэтыщтым ицыхьэ зэрэтелъыр республикэм и ЛIышъхьэ къыIуагъ.

АР-м и ЛIышъхьэ ипресс-къулыкъу