Мэлылъфэгъум и 26-р — радиацием къыздихьыгъэ тхьамыкIагъохэм ахэкIодагъэхэр агу къызщагъэкIыжьырэ Маф
Адыгэ Республикэм щыпсэухэу лъытэныгъэ зыфэтшIыхэрэр! ТичIыпIэгъу лъапIэхэр!
Мэлылъфэгъум и 26-р тихэгъэгу итарихъ къыхэхъу-хьэгъэ хъугъэ-шIэгъэ анахь тхьамыкIагъохэм зыкIэ ащыщ. Мы мафэм, 1986-рэ илъэсым, иинагъэкIэ ыкIи кIэухэу фэхъугъэмкIэ атомнэ энергетикэм фэдэ зыпарэкIи къыхэхъухьагъэу агъэунэфыгъэп.
Зышъхьамысыжьхэу а тхьамыкIагъом зимыушъомбгъуным фэбэнагъэхэм инэу тызэрафэразэр, хэкIодагъэхэм тызэрафэшъыгъорэр непэ къыхэдгъэщынэу тыфай.
Чернобыль къыщыхъугъэ тхьамыкIагъор цIыфлъэпкъымкIэ ушэтыпIэшхо хъугъэ. ТичIыпIэгъубэмэ лIыхъужъныгъэ зэрахьэзэ нэбгырэ миллион пчъагъэ къагъэнэжьыгъ.
Ащ фэдэ тхьамыкIагъо къэтымыгъэхъужьыныр зэкIэми зэдытипшъэрылъ.
Радиацием икIэуххэм ядэгъэзыжьын хэлэжьэгъэ пстэуми инэу тызэрафэразэр къэтэIо.
Псауныгъэ пытэ шъуиIэнэу, шIум шъущымыкIэнэу, дунаир мамырэу бэрэ шъупсэунэу тышъуфэлъаIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр