Гум имыкIыжьырэ ошIэ-дэмышIагъэр къызыхъугъэр илъэс 37-рэ хъугъэ. Ащ фэгъэхьыгъэ зэхахьэ чернобыльцэхэм ясаугъэт дэжь непэ щыкIуагъ.

Iофтхьабзэм хэлэжьа­гъэх АР-м иминистрэхэм я Кабинет хэтхэр, къэралы­гъо хабзэм икъулыкъухэм, общественнэ организацие­хэм ялIыкIохэр, депутатхэр, тхьамыкIагъохэм ядэгъэзыжьын хэлэжьагъэхэр, ахэм яIахьылхэр, ныбжьыкIэхэр, кIэлэеджакIохэр.

Адыгэ Республикэм Iоф­шIэнымкIэ ыкIи социальнэ хэхъоныгъэмкIэ иминист­рэу Мырзэ Джанбэч къэзэрэугъоигъэхэм шIуфэс къарихыгъ. ХэмыкIокIэжьын лъэужэу тарихъым къы­хэнэгъэ хъугъэ-шIагъэм илъэс 37-рэ зэрэтешIагъэр ащ къыхигъэщыгъ. А уахътэм къыкIоцI лIэужыбэ къы­зэрэхъугъэр, ау а тхьа­мыкIагъом идэгъэзыжьын хэлэжьагъэхэм лIыхъужъныгъэу зэрахьагъэр цIыф­хэм зэращымыгъупшэщтыр министрэм къыIуагъ.

— Адыгеим и ЛIышъхьэу КъумпIыл Мурат ыцIэкIи, сэ сшъхьэкIи радиацием епхыгъэ тхьамыкIагъохэм ядэгъэзыжьын хэлэжьа­гъэхэм «тхьашъуегъэпсэу» ясэIо. Непэ республикэм ищыIэкIэ-псэукIэ чанэу къы­хэлажьэхэрэм тафэраз, джащ фэдэу, зы сатыр къадыхэтыгъэхэм яфитыныгъэхэр ыкIи яшIоигъоныгъэхэр къэухъумэгъэнхэмкIэ ахэм ашIэрэр ма­кIэп. Къэралыгъо хабзэм икъулыкъухэм псаоу къэ­нэ­гъэ нэбгырэ пэпчъ зэп­хыныгъэ адыряI, ящыкIэгъэ IэпыIэгъур арагъэгъотыным фэхьазырых, — къыIуагъ Мырзэ Джанбэч.

Зэхахьэм къыщыгущыIагъэх Мыекъопэ къэлэ администрацием ипащэ игуа-­дзэу Юрий Томчак, АР-м и Къэралыгъо Совет —Хасэм идепутатэу, радиацием къыздихьыгъэ тхьамыкIагъохэм ядэгъэзыжьын хэлэжьагъэу Евгений Саловыр. Чернобыль къыщы­хъугъэ аварием къызди­хьыгъэ тхьамыкIагъохэм ядэгъэзыжьын Адыгеим икIыгъэ нэбгырэ 800 фэдиз хэлэжьагъ. Ахэм шъхьа­щэ зэрафашIырэр ыкIи зэрафэразэхэр къэгущыIэгъэ пстэуми къаIуагъ, псауныгъэ пытэрэ насыпрэ ежьхэми, яунагъохэми яIэнэу къафэлъэIуагъэх. ГухэкI нахь мышIэми, ахэм ащыщыбэм ядунай ахъожьыгъ. Ащ ишыхьат илъэс къэс зэхащэрэ зэха­хьэм мыгъэ къекIолIа­гъэр хэпшIыкIэу нахь зэ­рэ­мэ­кIагъэр. Адыгэ респуб­ликэ общественнэ организациеу «Чернобыль иинвалидхэр» зыфиIорэм итхьа­матэу Шы­къултыр Юрэ къы­зэриIуагъэмкIэ, тхьамыкIагъом идэгъэзыжьын хэлэжьагъэу псаоу респуб­ликэм къинагъэр нэбгырэ 278-рэ мэхъу.

Зэхахьэм икIэух зи­дунай зыхъожьыгъэхэм яшIэжь агъэлъапIэзэ, къэзэрэугъоигъэхэр зы та­къикърэ афэшъыгъуагъэх, саугъэтым къэгъагъэхэр кIэралъхьагъэх.

Iэшъынэ Сусан.