2012-рэ илъэсым къыщыублагъ мэлылъфэгъум и 27-р хэгъэгум ихэбзэгъэуцу къулыкъу шъхьаIэ имафэу зыхэдгъэунэфыкIырэр.

Непэ Урысыем ихэбзэгъэуцу ыкIи илIыкIо къулыкъоу щытыр Федеральнэ ЗэIукIэр ары. Ар зэтеутыгъ, УФ-м и Конституцие, федеральнэ закон зэфэшъхьаф­хэм ыкIи Регламентым адиштэу иIофшIэн зэхещэ.

УФ-м ФедерациемкIэ и Совет Къэралыгъо Думэм ыштэгъэ хэбзэгъэуцугъэхэм ахэплъэ, ады­регъаштэ е зэкIе­гъэкIожьых. Ащ зиштэрэм ыуж Президентыр кIэтхэжьынэу зыфагъакIорэр.

Джащ фэдэу сенаторхэм япшъэрылъхэм ащыщ Президентым къызэригъэлъэгъуагъэм тетэу Конституционнэ ыкIи Ап­шъэрэ хьыкумхэм ятхьаматэхэр, ахэм ягуадзэхэр, хьыкумышIхэр гъэнэфэгъэнхэр.

УФ-м и Къэралыгъо Думэ хэбзэгъэуцугъэхэм Iоф адешIэ, ештэх, УФ-м и Правительствэ иIофшIэн лъэплъэ. Джащ фэдэу УФ-м и Президент къызэригъэлъэгъуагъэм тетэу, УФ-м и Правительствэ и Тхьаматэ, ащ игуадзэхэр, федеральнэ министрэхэр, Гупчэ банкым, ЛъытэкIо палатэм япащэхэр, цIыфхэм яфитыныгъэхэр къэухъумэгъэнхэмкIэ Уполномоченнэр егъэ­нафэх, бзэджэшIагъэ зезыхьагъэхэм апае амнистие щыIэщтмэ рехъухьэ, дунэе парламентариехэм адэлажьэ.

ФедерациемкIэ Советымрэ Къэралыгъо Думэмрэ гощыгъэ­хэу зэхэсыгъохэр зэхащэх, ау ахэр зэIухыгъэх.

УФ-м и Къэралыгъо Думэ ия VII-рэ зэIугъэкIэгъу мы уахътэм Iоф зышIэрэр, ащ депутат 450-рэ хэт. УФ-м ФедерациемкIэ и Совет субъект пэпчъ сенаторитIу къегъакIо.