«Правительственнэ сыхьатыр» апэу повесткэм итыгъэхэм ащыщ. Пыдзэфэ пытэхэм яугъоин ар фэгъэхьыгъагъ. ЫпэрапшIэу ащ фэгъэхьыгъэу къэгущыIагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ игуадзэу Лафышъэ Рэмэзан.

Ащ къызэриIуагъэмкIэ, цIыфхэм хэкIэу къырахырэр щыратэкъунэу чIыпIэ 1003-рэ республикэм щагъэпсыгъ. Ахэм контейнер 3094-у ащагъэуцугъэм щыщэу 589-р хэкIыр зэхэдзыгъэу Iущыгъэным тегъэпсыхьагъ. Ащ фэдэ бакхэр агъэфедэзэ икIыгъэ 2022-рэ илъэсым пластик тонни 9,3-рэ дащыгъ. Ыпэрэ 2021-м егъэпшагъэмэ, ар фэди 4,8-кIэ нахьыб.

ХэкIыр зэхэдзыгъэу дэщыгъэным фэгъэхьыгъэ проектым къыдыхэлъытагъэу мыгъэ Мыекъуапэ иплощадкэ 38-рэ икIэрыкIэу ашIыжьыщт. Ахэм кубическэ метри 3,5-рэ зэрыфэрэ контейнер 91-рэ ащагъэуцущт. Ащ пэIухьанэу муниципальнэ образованием сомэ миллион 15,5-рэ къытIупщыгъ, жъоныгъокIэ мазэм ыкIэм нэс а IофшIэнхэр аухынхэ фае. Доклад ужым депутатхэм упчIэхэр къатыгъэх. Шъолъыр операторым хэкIыр зэрэIуищырэм ыпкIэ къызэрилъытэрэм, пыдзэфэ пытэхэм ядэщын епхыгъэу цIыфхэм щыкIагъэу къыхагъэщыхэрэм, нэмыкIхэм ахэр афэгъэхьыгъагъэх. Мыхэм джэуапхэр къаритыжьыгъэх «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Зэхэсыгъом хэбзэгъэуцугъэ 13-мэ япроектхэм щатегущыIагъэх ыкIи ахэм ащыщэу 11-р законэу аштагъ, тIумэ апэрэ еджэгъумкIэ ахэплъагъэх. Жъэгъэузым зимыушъомбгъуным пае шIэгъэн фаехэм, республикэм ис лъэпкъ зэфэшъхьафхэм яныдэлъфыбзэ, цIыфхэр ошIэ-дэмышIагъэхэм ащыухъумэгъэнхэм, унагъом, ныгъом, тыгъом ыкIи кIэлэцIыкIугъом якъэухъумэн, мэз зэфыщытыкIэхэм ягъэIорышIэн, бюджет зэфыщытыкIэхэм, нэмыкIхэм ахэр афэгъэхьыгъэх.

Джащ фэдэу мы зэхэсыгъом доклад къыщишIыгъ цIыфхэм яфитыныгъэхэр къэухъумэгъэнхэмкIэ Уполномоченнэу АР-м щыIэ Анатолий Осокиным. БлэкIыгъэ 2022-рэ илъэсым Iофэу ашIагъэр ащ къызэфихьысыжьыгъ. КъызэриIуа­гъэмкIэ, Уполномоченнэм цIыфхэр зыщыригъэблэгъэгъэ мафэхэм нэбгырэ 453-рэ къякIолIагъ. Тхьаусыхэу къарахьылIагъэхэм анахьыбэр Iэзэгъу уцхэр цIыфхэм аIэкIэгъэхьэгъэнхэм, фэтэрыбэу зэхэт унэхэм ачIэсхэм зэдагъэфедэхэрэм ягъэкIэжьын, псэупIэ-коммунальнэ фэIо-фашIэхэм ауасэ къызэралъытэрэм, пособиехэм, пенсиехэм ягъэнэфэн, социальнэ IэпыIэгъум афэгъэхьыгъагъэх.

ГумэкIыгъо зиIэу къяуалIэрэм ипчъа­гъэ нахьыбэ хъугъэми, муниципальнэ хэбзэ къулыкъухэм яIофшIакIэ епхыгъэ тхьаусыхэу къарахьылIэрэр проценти 6-кIэ нахь макIэу хъугъэу зэрагъэу­нэфыгъэр Уполномоченнэм къыхи­гъэщыгъ.

Адыгеим и Парламент ыгъэхьазырыгъэу федеральнэ гупчэм фэгъэзэгъэ джэпсалъэхэми зэхэсыгъом щатегущыIэхи аштагъэх. Ахэр «ПсэупIэр» зыфиIорэ къэралыгъо программэм иподпрограммэу унэгъо ныбжьыкIэхэм псэупIэхэр ягъэгъотыгъэнхэм фэгъэхьыгъэм хэлажьэ­хэрэм аныбжь зыфэдизын фаем, хэ­ушъхьа­фыкIыгъэ цIыф купхэм ыпкIэ хэмылъэу Iэзэгъу уцхэр аIэкIэгъэхьэгъэн­хэм, цIыфым пэIудзыгъэ шIыкIэм тетэу чIыфэ (микрозайм) зиштэкIэ, ар къэзытыхэрэм хъор-шэрыгъэ къыдызэрамыхьаным пае шIэгъэн фаехэм, гуманитар предметхэмкIэ егъэджэн федеральнэ программэ шъхьаIэхэм ягъэкIэжьын, нэмыкIхэм ахэр афэгъэхьыгъэх.

Урысые Федерацием инэмыкI субъект­хэм яхэбзэихъухьэ къулыкъухэр кIэщакIо зыфэхъугъэхэми депутатхэр ахэплъа­гъэх, зэкIэми адырагъэштагъ.

ХЪУТ Нэфсэт.