«Адыгеим икIэлэегъэджэ анахь дэгъу» зыфиIорэ зэнэкъокъум ишъолъыр уцугъо мы мафэхэм аублагъ. Мыгъэ ар я 29-у зэхащэ. Республикэм ирайонхэм ыкIи икъалэхэм текIоныгъэр къащыдэзыхыгъэ кIэлэегъаджэхэр арых мыщ хэлажьэхэрэр. Ахэр зэкIэмкIи нэбгырэ 16 мэхъух. Мы илъэсым зэнэкъокъум хэлажьэхэрэм анахьыбэр пэублэ классхэмкIэ кIэлэегъаджэх.

Iофтхьабзэр къызэIуихыгъ АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцэкIэрэ Евгений Лебедевым. КIэлэегъаджэхэм яIоф­шIэнкIэ хэхъоныгъэхэр ашIынхэм, яшIэныгъэхэм ахагъэхъоным пае мыщ фэдэ зэнэкъокъу­хэм мэхьанэ ин зэряIэр, ахэм яшIуагъэкIэ гъэсэныгъэм исистемэ хэхъоныгъэхэр зэришIыхэрэр къыхигъэщыгъ. Егъэ­джэкIо-гъэсакIом и Илъэс зэрифэшъуашэу зэрагъакIорэр, Iофтхьэбзэ зэфэшъхьафхэр зэрэзэхащэхэрэр къыIуагъ.

— КIэлэегъэджэ сэнэхьатым мэхьанэшхо зэриIэр зэкIэми тэшIэ, сыда пIомэ къыткIэхъу­хьэрэ лIэужхэм шIэныгъэ языгъэгъотырэр, щыIэныгъэ гъогум тезыщэхэ­рэр кIэлэ­егъаджэр ары. Егъэджэным исистемэ гъунапкъэ иIэп, тиIофшIэн къы­хэ­хьэрэ шэпхъакIэхэм адедгъаштэзэ ыпэкIэ тылъыкIотэн фае. Муниципальнэ уцугъом текIоныгъэ къыщыдэшъухи, мыщ шъукъызэрыкIуагъэм шIэныгъэ куу зэрэшъуиIэр къеушыхьаты, — къыIуагъ Евгений Лебедевым.

«2023-рэ илъэсым икIэлэегъэ­джэ анахь дэгъу» зыфиIорэ Iофтхьабзэм зыщызыушэтынэу къекIолIагъэ­хэм ягъэхъагъэхэм джыри аха­гъэхъонэу, ыпэкIэ лъыкIотэнхэу, зэрифэшъуашэу зыкъагъэлъэгъо­нэу ар къафэлъэIуагъ.

Джащ фэдэу Урысыем лъэпкъ гъэсэныгъэмкIэ ыкIи шIэныгъэмкIэ иIофышIэхэм я Адыгэ республикэ профсоюз организа­цие итхьаматэу Сергей Кошкиным, блэ­кIыгъэ илъэсхэм «Адыгеим икIэлэегъэджэ анахь дэгъу» зыфиIорэм текIоныгъэр къыщыдэзыхыгъэхэр зыхэхьэрэ респуб­ликэ клубым илIыкIохэм Iофтхьабзэм къекIолIагъэхэм шIуфэс къарахыгъ ыкIи гъэхъагъэхэр ашIынхэу къафэлъэIуагъэх.

Зэнэкъокъум къыдыхэлъытагъэу «Здравствуйте, это я!» зыфиIорэмкIэ кIэ­лэегъаджэхэм нэужым заушэтыгъ. ЗэкIэмкIи лъэныкъуи 8-кIэ кIэлэегъэджэ пэрытхэр зэнэкъокъущтых.

ЯIофшIэн зэрэзэхащэрэм фэгъэхьыгъэ мастер-классхэр къагъэлъэгъощтых, урокхэр къатыщтых, мыгъэ апэрэу педагогическэ диктант атхыщт.

Зэнэкъокъур мэлылъфэгъум и 20-м къыщегъэжьагъэу жъоныгъуакIэм и 9-м нэс кIощт, текIоныгъэ къыдэзыхырэр Урысые зэнэкъокъум хэлэжьэщт.

ДЕЛЭКЪО Анет.