Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр непэ Адыгеим къэкIогъагъ.

АР-м и Правительствэ и Унэ АР-м и ЛIышъхьэу КъумпIыл Мурат ар щыIукIагъ ыкIи зэIукIэу зэхащагъэм Владимир Устиновым АР-м и Къэралыгъо Совет — Хасэм и Тхьаматэу Владимир

Нарожнэм къэралыгъо наградэр къыщыритыжьыгъ. Урысые Федерацием и Президент и УказкIэ Зэкъошныгъэм иорден ащ къыфагъэшъошагъ. Президентым и Полномочнэ лIыкIо Владимир Нарожнэм къыфэгушIозэ къызэрэхигъэщыгъэмкIэ, республикэ парламентым хэбзэихъухьан IофшIэнэу ыгъэцакIэрэр лъэныкъо пстэумкIи зытегъэпсыхьагъэр цIыфхэм яфедэхэр ары.

«О пшъхьэкIэ уиIахь зэрэ­хэ­п­шIыхьэрэм ишIуа­гъэкIэ предпринимательхэм Iоф ашIэнымкIэ республикэм амалышIухэр щызэхэщагъэ хъугъэх, инвестициехэмкIи республикэм анаIэ нахь къытыра­дзагъ, ахэм яшIуа­гъэ къэ­кIо зекIоным ылъэныкъокIэ Адыгеим иамалхэм джыри нахь заушъомбгъунымкIэ. Рес­публикэм иэкономикэрэ исоциальнэ лъэныкъорэ хэхъоныгъэ ашIы, промышленнэ къыдэгъэ­кIыжьынымрэ цIыфхэр зычIэсыщт унэхэм яшIынрэ япсынкIагъэ хэхъо. Социальнэ ыкIи культурнэ лъэныкъохэмкIэ псэ­олъакIэхэр ашIых, агъэцэкIэжьых, кIэлэцIыкIу IыгъыпIэхэр, спортым епхыгъэ псэуа­лъэхэр ашIых», — къы­Iуагъ Владимир Устиновым.

Президентым и Полномочнэ лIыкIо ирэзэныгъэ гущыIэхэр Владимир Нарожнэм ыкIи рес­публикэм ихэбзэгъэуцу пстэуми афэгъэхьыгъагъэх, хэушъхьафыкIыгъэ дзэ операцием хэлажьэ­хэрэм социальнэ IэпыIэгъу яты­гъэныр, ахэм яунагъохэм адеIэгъэныр къизыIотыкIырэ хэбзэгъэуцугъэхэр игъом зэра­штэхэрэм япхыгъагъэх.

Ащ хэхьэх яунэ исхэу ыпкIэ хэмылъэу социальнэ IэпыIэгъу ахэм ятыгъэныр, гъэсэныгъэм ылъэныкъокIэ яшIуагъэ арагъэ­кIыныр, транспорт хэбзэIахьымкIэ фэгъэкIотэныгъэхэр щыIэнхэр ыкIи нэмыкIыбэхэр.

Адыгэ Республикэм и ЛIышъхьэ джащ фэдэу Владимир Нарожнэм фэгушIуагъ тын лъа­пIэ къызэрэратыгъэм ыкIи тигупсэ Адыгеимрэ Урысые Федерациемрэ яфедэ зыхэлъ Iоф­шIэныр илъэсыбэ хъугъэу зэригъэцакIэрэм тефэрэ уасэ къызэрэфашIыгъэм фэшI.

«Владимир Нарожнэм илъэсыбэмэ къакIоцI Адыгэ Республикэм и Къэралыгъо Совет — Хасэм пэщэныгъэ дызэрихьэзэ, Адыгеим парламентаризмэр щыпытэным, республикэм ихабзэ иунэшъошI ыкIи игъэцэкIэкIо къулыкъухэм язэдэлэжьэныгъэ джыри нахь пытэ хъуным ышъхьэ­кIэ иIахьышхо хишIыхьагъ. Хэдза­кIохэм апашъхьэ пшъэдэ­кIыжь ин щахьын зэрэфаемкIэ Владимир Иван ыкъор щысэшIу мэхъу. Рес­публикэм идепутатхэм яIофшIэн дэгъоу зэрэзэхэщагъэм осэшIу фэтэшIы, ахэм тыря­гъусэу лъэпкъ пшъэ­рылъхэмрэ проектхэмрэ пхырытэщых. Респуб­ликэм иэкономикэрэ исоциальнэ лъэныкъорэ гъэпытэгъэнхэм, Адыгеим щыпсэурэ цIыфхэм щыIэкIэшIу яIэным а пшъэрылъхэр фэлажьэх», — къыIуагъ КъумпIыл Мурат.

Адыгэ Республикэм и ЛIышъхьэ къызэрэхигъэщыгъэмкIэ, хабзэм икъутэмэ пстэуми зэдегъэштэныгъэ ахэлъэу Iоф зэрэзэдашIэрэм ишIуагъэ къэкIо Ады­геим хэхъоныгъэ ышIынымкIэ ыкIи ыпэкIэ ар лъыкIотэнымкIэ.

АР-м и ЛIышъхьэ ипресс-къулыкъу