Быслъымэнэу дунаим тетхэм анахь агъэлъэпIэрэ мазэу Рэмэзаныр ыкIэм фэкIуагъ. МэфэкI анахь шъхьаIэхэм ащыщэу Бирамыр мы илъэсым, пэшIорыгъэшъэу зэрагъэнэфагъэмкIэ, мэлылъфэгъум и 21-м хагъэунэфыкIыщт. Ащ ипэгъокIэу Гупчэ мэщытым иIимамэу Шъхьэлэхъо Ибрахьимэ гущыIэгъу тыфэхъугъ.

— Мы мэфэкIышхом къегъэ­лъагъо быслъымэн пстэухэмкIи цIыфыгъэ шапхъэхэм уатетэу узекIоным мэхьанэшхо зэриIэр. Ислъам диным ылъапсэхэм ащыщых гукIэгъур, шIушIэныр. Джащ фэдэ зекIокIэ дахэхэм, IофышIухэр ашIэнхэм цIыфхэр къафегъэущых, — къыIуагъ Шъхьэлэхъо Ибрахьимэ. Бирамыр мэфэкI гушIуагъоу щыт. Бирамым ыкIи НэкIмазэм Алахьталэм игъэгъуныгъэ алъе­гъэIэсы. ЦIыфхэр зэпыйхэми, зэшIужьынхэм, сымаджэхэм алъыIэсынхэм, псапэ ашIэным мы мафэр афэIорышIэ.

Бирам мафэр диныр зылэ­жьы­хэрэм нэмазшIынымкIэ ра­гъажьэ. Ащ ини, цIыкIуи ухэ­лэжьэным псэпэшхо хэлъ.

— Бирам нэмазыр бэрэскэшхо пчэдыжьым сыхьатыр 8-м едгъэ­жьэщт, — еIо Iимамым. — Нэужым мэфэкI ма­фэр яIахьылхэм ягъу­сэ­хэу рахы. Къэхэлъэ кIо­ныр пшъэрылъэу ди­ным къы­Iорэп.

Хабзэу къахэ­хьагъэшъ, сыд фэдэ уахъти ащ укIон уфит.

Джащ фэдэу тигущыIэгъу къыхигъэщыгъэхэм ащыщ нэкIыр тыухэу, неущ фэдэм Бирам зыхъукIэ, пчыхьэм зэчырхэр къапIохэмэ зэрэдэгъур. Бирам нэмазыр къэсыфэ Тхьэм уелъэ­Iущт:

«Алахьэу акбэр, Алахьэу акбэр, лаIилэхьэ Iилалахь. Алахьу акбэр, Алахьу акбэр, олилахьи альхьамд» (Алахьыр зэкIэми анахь ин, Алахьыр зы, ары щытхъур зиер). Бирамыр быслъымэн пстэу­хэмкIи мэфэкIышхоу щыт. НэкI­мэзэ мазэу Алахьым Къур­Iаныр къызщыригъэхыгъэм къы­кIоцI цIыфхэм апкъышъолкIи агукIи загъэкъэбзагъ. Псапэ зэрашIэщтым, цIыфхэм гуфэбэныгъэ зэрапагъохыщтым пылъы­гъэх. Бирам мафэм ахэм гу­кIэгъу­ныгъэу зэрахьагъэм хагъахъо, псэпэшIэныр лъагъэ­кIуатэ. Пегъымбарэу Мухьамэд къы­Iуагъ: «ЦIыфым НэкIмазэм гущыIэ мыхъунхэр ыIуагъэмэ, мыхъунхэр ышIагъэу щытмэ, фытырыр ытымэ зеукъэбзы­жьы». Фытырыр Бирам нэмазыр рамыгъажьэзэ птын фае, ащ ыуж зыптырэм сэдакъэ мэхъу нахь, фытыр хъурэп. Ар отыфэ уинэкI кIэшIагъэу къэнэ, зыптырэ нэуж Алахьым уипсапэхэм ахегъахъо.

Дунаим тет быслъымэн пстэуми мэфэкI нэмазхэр мы мафэм мэщытхэм ащашIых, НэкIмазэр зэраухыгъэмкIэ зэфэгушIох. Янэ-ятэхэм, яIахьылхэм адэжь макIох, шIухьафтынхэмкIэ кIэлэцIыкIухэр агъэгушIох. Джащ фэдэу сымаджэхэм акIэупчIэнхэ, тхьамыкIэхэм алъыплъэнхэ, шIушIэным зыратын фае. Ис­лъам къэралыгъо пстэухэмкIи Бирамыр зыгъэпсэфыгъо мафэу щыт быслъымэнхэр зэIукIэнхэ, мэфэкI Iанэм пэсынхэ, агукIэ загъэпсэфын алъэкIыным пае.

Быслъымэн пстэуми Тхьэм Бирам мафэ тытырегъахь!

Iэшъынэ Сусан.