ЗыкIыныгъэмрэ ЗэгурыIоныгъэмрэ я Гупчэу Мыекъуапэ дэтым мэфэкIыр щыкIощт.

Пчыхьэм сыхьатыр 4-м адыгэ IэпэIасэхэм яIэшIагъэхэм якъэ­гъэлъэгъон-ермэлыкъ, зэнэкъокъухэр, джэгукIэхэр (Iофтхьабзэм изэхэщакIохэм ащыщэу «Ростелекомым» ылъэныкъокIэ) зэхащэщтых, ахэм ауж сыхьатыр 5-м Адыгеим иорэдыIохэмрэ икъэшъуа­кIохэмрэ яконцерт кIощт.

МэфэкIым икIэух шIухьафтынхэмрэ уасэ зиIэ тынхэмрэ зыщагощыщтхэ адыгэ джэгур рекIокIыщт.

Ом изытет дэи хъумэ, Iофтхьабзэр Адыгэ Республикэм и Къэралыгъо филармоние щыкIощт.

МэфэкIым хэлажьэ зышIоигъо пстэури зэхэщакIохэм къырагъэблагъэ.

Шъугу къэдгъэкIыжьын, илъэс 30-м ехъукIэ узэкIэIэбэжьмэ, 1992-рэ илъэсым, Адыгеим и Апшъэрэ Совет иапэрэ зэхэсыгъо республикэм игерб, игимн ыкIи икъэралыгъо быракъ къыщыхахыгъагъ.

Нэужым, 2013-рэ илъэсым, «МэфэкI ыкIи шIэжь мафэхэм афэгъэхьыгъ» зыфиIорэ хэбзэгъэуцугъэм зэхъокIыныгъэхэр фашIыхи, шIэжь мэфакIэ агъэнэфагъ – Адыгеим и Къэралыгъо быракъ и Мафэ. Ащ къыщыублагъэу мэлылъфэгъум и 25-м мэфэкIыр хагъэунэфыкIы.