Предпринимательхэм IэпыIэгъу ятыгъэнымкIэ Адыгэ республикэ Фондыр УФ-м и Прези­дентэу Владимир Путиныр кIэщакIо зыфэхъу­гъэ лъэпкъ проектхэм ащыщэу «Малое и сред­нее предпринимательство и поддержка индивидуальной предпринимательской инициа­тивы» зыфиIорэм къыдыхэлъытагъэу 2019-рэ илъэсым къызэIуахыгъ.

Бизнесыр мылъку къэкIуапIэу къыхэзыхыгъэмкIэ Фондыр IэпыIэгъушхоу зэрэщытыр охътэ кIэкIым къэлъэгъуагъ. Ащ ишы­хьат фэIо-фашIэу ыгъэцакIэхэрэр зыгъэфедэхэрэм япчъагъэ нахьыбэ зэрэхъурэм фэшI Тэ­хъутэмыкъое районми офис ща­гъэпсын фаеу зэрэхъугъэр. Мы тхьамафэм ар поселкэу Инэм къыщызэIуахыгъ.

Бизнесыр мылъку къэкIуапIэу къыхэзыхыгъэхэм ар рагъэжьэным е унэе хъызмэтшIапIэ зы­гъэпсыгъэхэм ащ зырагъэу­шъомбгъуным пае процентхэр макIэу тегъэхъуагъэхэу ахъщэ чIыфэ (микрозайм) аритыныр ары пшъэрылъ шъхьаIэу Фондым иIэр. Ащ игъэцэкIэкIо пащэу Кобл Азамат къызэриIуагъэмкIэ, Тэхъутэмыкъое районым исэу яIэпыIэгъу зыгъэфедэхэрэм япчъагъэ Адыгеим икъэлэ шъхьаIэ бэкIэ ыуж къызэримынэрэр ары ащ офисыр къыщызэIуахыным лъапсэ шъхьаIэу фэхъугъэр. Офисыр предпринимательхэр, ежь-ежьырэу IофшIэн къызфэзыгъотыжьы­гъэ­хэр (самозанятые) ары ана­хьэу IэпыIэгъу зыфэхъущтыр.

— Ащ фэдэу мылъку къэкIуа­пIэ къызфэзыгъотыжьэу тиIэр нахьыбэ хъумэ, социальнэ IэпыIэгъу зищыкIагъэхэм япчъагъэ къыщыкIэщт. Ащ имызакъоу, предпринимательхэм, «самозанятэхэм» ябизнес зырагъэу­шъомбгъумэ, IофшIэпIэ чIыпIэ­хэр къатыщтых, хэбзэIахьэу экономикэм къыхалъхьэрэм хэхъощт, — къыIуагъ Тэхъутэмыкъое район администра­цием ипащэу Шъэо Аскэр.

Мы муниципальнэ образо­ваниер республикэм икъэлэ шъхьа­Iэ анахь пэIудзыгъ. Арышъ, ащ ипредпринимательхэм, ежь­ежьырэу IофшIэн къызфэзы-гъо­тыжьыгъэу исхэм Фондым иIэ­пыIэгъу нахь къызIэкIэгъэхьэгъошIу джы афэхъущт. Ащ имы­закъоу, финансхэм ягъэзекIонкIэ бизнесым пылъхэм яшIэныгъэ хагъэхъонымкIэ IэпыIэгъу афэ­хъущтых, егъэджэнхэр, зэIукIэгъухэр афызэхащэщтых.

Хъут Нэфсэт. .