ДзэкIолIхэм тынаIэ атет
ТекIоныгъэм и Мафэу къэблагъэрэм республикэм зыфегъэхьазыры. Iофтхьабзэу мы мэфэкIым зэхащэщтхэм зэкIэми текIоныгъэр къыдэзыхыгъэ лIэужхэм яшIэжь къэгъэнэжьыгъэныр пшъэрылъ шъхьаIэу зэряIэр АР-м и ЛIышъхьэу КъумпIыл Мурат иинтернет нэкIубгъохэм ащыщ къыщыхигъэщыгъ.
— Пстэумэ анахь шъхьаIэр ахэм лIыхъужъныгъэу зэрахьагъэр къакIэхъухьагъэхэмкIэ щысэтехыпIэ зэрэхъугъэр ары, — къетхы республикэм ипащэ. — Непэ тичIыпIэгъухэм ащыщыбэхэм хэушъхьафыкIыгъэ дзэ операцием хэлажьэхэзэ, ятэжъхэм лIыблэнагъэу зэрахьагъэр лъагъэкIуатэ. ТикIалэхэм тицыхьэ ателъ, пытагъэу ахэлъым тырэгушхо. Ти Хэгъэгу иухъумакIохэм лIыхъужъныгъэ зэрахьэ. Ащыщыбэхэр къэралыгъо тын лъапIэхэмкIэ къыхагъэщыгъэх. Дзэм къулыкъу щызыхьырэм сыдигъокIи лъытэныгъэрэ шъхьэкIафэрэ фашIы. Арышъ, зэзэгъыныгъэ шIыкIэм тетэу къулыкъу ыхьынэу кIохэрэм Хэгъэгум икъэухъумэнкIэ пшъэрылъышхо зэрэзэшIуахырэр къагурыIон фае. Ахэр яунагъохэм къафэмыгумэкIынхэм пае IэпыIэгъоу яттырэр тэ лъыдгъэкIотэщт.
ТидзэкIолIхэмрэ ахэм яунагъохэмрэ социальнэу ухъумэгъэнхэм ыкIи ахъщэ IэпыIэгъу арагъэгъотыным къэралыгъом ынаIэ зэрэтетыр КъумпIыл Мурат къыхигъэщыгъ. ДзэкIолIхэм ясабыеу кIэлэцIыкIу IыгъыпIэхэм ачIэсхэм, еджапIэм кIохэрэм ыпкIэ хэмылъэу шхын стыр аIэкIагъахьэ, «продленкэм» щыIэхэу урокхэм аужи зылъыплъэхэрэм янэ-ятэхэм ыпкIэ арагъэтырэп.
ДзэкIолIхэм цIэу, IэнатIэу, илъэс IофшIагъэу яIэхэр къыдэлъытагъэхэу, зыщырагъаджэхэрэ Гупчэм щэIэфэхэкIэ мазэ къэс сомэ мин 30-м щыублагъэу мин 45-м нэс къараты. Зэзэгъыныгъэ шIыкIэм тетэу къулыкъу ахьынэу зыкIатхэхэкIэ зэтыгъоу сомэ мини 195-рэ къафэкIо, етIани республикэм ибюджет къыхэхыгъэу сомэ мини 100 афытырагъахъо.
ХэушъхьафыкIыгъэ дзэ операцием хэлажьэхэрэм мазэм къаратырэр сомэ мини 170-м щыублагъэу мин 200-м нэсы, ыпэкIэ лъызгъэкIуатэхэрэ Iофтхьабзэм зыщыхэлажьэхэрэм зы мафэ пэпчъ сомэ мини 8, штурм зышIырэ отрядхэм ахэтхэу зылъыкIуатэхэкIэ зы километрэ пэпчъ сомэ мин 50 афытырагъахъо.
— Урысыем текIоныгъэр къызэрэдихыщтым, лIыгъэу зэрахьэрэмкIэ, ялIыхъужъныгъэкIэ Хэгъэгум иухъумэкIо — патриот цIэр къэзылэжьыгъэ тикIалэхэр зыпарэми къызэрэзэкIимыфэщтхэм тицыхьэ телъ, — къытхыгъ АР-м и ЛIышъхьэ.