Тхьамафэу къихьагъэм мэфэкIэу зэкIэлъыкIощтхэр къеублэх, ащ къыхэкIэу мыри, къыкIэлъыкIощт IофшIэгъу тхьамэфищыри кIэкощтых. Мы бэрэскэшхом, мэлылъфэгъум и 21-м къыщегъэжьагъэу зыгъэпсэфыгъо охътэ кIыхьэр едгъэжьэщт. АР-м и ЛIышъхьэу КъумпIыл Мурат иунашъокIэ, а мафэр Бирамым тефэ, мэфэкI мафэу агъэнэфагъ. Ащ къыкIэлъэкIох шэмбэтымрэ тхьаумафэмрэ, блыпэри зыгъэпсэфыгъо мэфэщт (ащ пае мэлылъфэгъум и 15-м, шэмбэтым, Iоф ашIагъ) ыкIи гъубджыр, мэлылъфэгъум и 25-р (чыристан диныр зылэжьыхэрэм щымыIэжьхэр агу къызщагъэкIыжьырэ, яшIэжь зыщагъэлъэпIэрэ маф). 2023-рэ илъэсым имэлылъфэгъу мазэм и 20-р Iоф зышIэхэрэмкIэ мэфэкI мафэм ыпэ къакIоу щытышъ, нахь кIэкощт. Мэлылъфэгъум и 26-м, бэрэскэжъыем, IофшIэгъу тхьамафэр аублэжьыщт. ЖъоныгъуакIэм иапэрэ тхьамэфитIури мэфэкI мафэхэмкIэ баеу щыт. Гъатхэмрэ IофшIэнымрэ я Мафэ 2023-рэ илъэсым блыпэм, жъоныгъуакIэм и 1-м тефэ, ащ пае ар зыгъэпсэфыгъо мафэу агъэнэфагъ. ТекIоныгъэм и Мафэ фэшI мэфи 4-рэ тыдэсыщт — жъоныгъуакIэм и 6-м къыщыублагъэу и 9-м нэс. Шъугу къэдгъэкIыжьын, УФ-м и Правительствэ иунашъокIэ зыгъэпсэфыгъо мафэу щылэ мазэм и 8-м тефэщтыгъэр жъоныгъуакIэм и 8-м, блыпэм, къахьыжьыгъ.