2023-рэ илъэсым игъэтхапэ и 18-м къыдэкIыгъэ федеральнэ хэбзэгъэуцугъэм диштэу, пенсиехэр цIыфхэм зэраIэкIахьэрэм зэхъокIыныгъэхэр фэхъугъэх.

Ащ къызэрэщыдэлъытагъэмкIэ, пенсиер банкым ифэIо-фашIэхэр ымыгъэфедэхэу, Iэрылъхьэу къаIызыхыхэрэм жъоныгъокIэ мазэу къакIорэм и 1-м къыщыублагъэу Урысыем и Почтэ закъу ар къаIэкIэзгъэхьащтыр. Адыгеим щыпсэоу нахьыпэкIэ «Центр доставки пенсии» зыфиIорэ къулыкъум ахъщэ тыныр къызIэкIахьэщтыгъэхэм почтэм иIофышIэхэр ары джы ар афэзыгъэцэкIэщтыр. Ащ пае лъэIу тхылъ атын ищыкIагъэп.

Шъугу къэдгъэкIыжьын, пенсие е нэмыкI социальнэ ахъщэ тын къызфакIохэрэм ар къаIэкIэзгъэхьащтыр банкхэр арымэ, хьауми почтэм ифэIо-фашIэхэр агъэфедэщтмэ, нахьыпэрэм фэдэу, ежьхэм къыхахын амал яIэщт. ШъунаIэ тешъудз, банкыр нахьышIоу зылъытэхэрэм ахъщэр зыдэкIощт реквизитхэр лъэIу тхылъым ратхэнхэ фае. Ар къэралыгъо фэIо-фашIэхэм япортал, МФЦ-м е Социальнэ фондым икъулыкъоу цIыфхэм Iоф адэзышIэрэм щатын алъэкIыщт.