Президент платформэу «Урысыер — амалхэм яхэгъэгу» зыфиIорэм къыдыхэлъытагъэу непэ Мыекъопэ индустриальнэ техникумым чIыпIэ Iофтхьабзэу «Абилимпикс» зыфиIорэр къыщызэIуахыгъ. Мэфищым къыкIоцI сэкъатныгъэ зиIэ ныбжьыкIэхэу зиамалхэмкIэ ялэгъухэм акIэмыхьэхэрэр зэнэкъокъущтых. ЗэкIэмкIи ахэр нэбгыри 102-рэ мэхъух, ахэм ащыщэу 45-р кIэлэеджакIох, 55-р колледжхэм ястудентых ыкIи 10-р лъэныкъо зэфэшъхьафхэмкIэ специалистых.

АР-м гъэсэныгъэмрэ шIэныгъэмрэкIэ и Министерствэ, сэкъатныгъэ зиIэхэм ядвижениеу «Абилимпикс» зыфиIорэм ишъолъыр гупчэ Лъэпкъ гупчэр иIэпыIэгъоу Iофтхьабзэм кIэщакIо фэхъугъэх.

МэфэкI шIыкIэм тетэу олимпиадэр къызэIуахыгъ. Ащ къырагъэблэгъагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэ­кIэрэ Евгений Лебедевыр, цIыфхэм IофшIэн ягъэгъотыгъэ­нымкIэ федеральнэ къулыкъум и ГъэIорышIапIэу Адыгеим щыIэм ипащэу Галина Цыганковар, Адыгэ къэралыгъо университетым иапэрэ проректорэу Михаил Силантьевыр, Мыекъопэ къэралыгъо технологическэ университетым сэкъатныгъэ зиIэхэм яфитыныгъэ къэухъумэгъэнымкIэ иуполномоченнэу Галина Измайловар, сэкъатныгъэ зиIэхэм я Урысые обществэ и Адыгэ республикэ организацие ипащэу Агъыржьэнэкъо Симэ, «Абилимпиксым» зэзэгъыныгъэ дыряIэу сэкъатныгъэ зиIэхэм IофшIапIэ языгъэгъотыхэрэр, нэмыкIхэри.

Чемпионатэу «Абилимпикс» зыфиIорэр апэрэу 1972-рэ илъэ­сым Японием щызэхащэгъагъ, Урысыер дунэе движением 2014-рэ илъэсым хэхьагъ, 2017-рэ илъэсым къыщегъэжьагъэу Адыгеим шъолъыр чемпионатыр щызэхащэ.

Мы Iофтхьабзэм мэхьанэ ин зэриIэр Евгений Лебедевым къыIуагъ. Мыщ хэлажьэхэрэм сэнаущыгъэ ин зэрахэлъыр ыкIи илъэс къэс ахэм гъэхъэгъэшIу­хэр зэрашIыхэрэр ащ къыхигъэ­щыгъ. ГъэрекIо Москва щыкIогъэ Лъэпкъ чемпионатым хэлэжьэгъэ нэбгыри 7-м ащыщэу 6-мэ медальхэр къалэжьыгъэх, ащ щыщэу плIыр дышъэ. Мы илъэсми гъэхъэгъэшIухэр ашIынхэу министрэм ипшъэрылъхэр зыгъэцакIэрэр къафэлъэIуагъ.

Джащ фэдэу Iофтхьабзэм хэлажьэхэрэм видео зэпхыныгъэмкIэ шIуфэс къарихыгъ Уры­сыем просвещениемкIэ иминистрэу Сергей Кравцовым. Илъэс къэс мыщ хэлажьэхэрэм япчъагъэ зэрэхахъорэр, щыIэныгъэм нахь щагъэфедэрэ сэнэ­хьатхэр сэкъатныгъэ зиIэ ныбжьыкIэхэм къызэрэзыIэкIагъа­хьэрэр ащ къыIуагъ.

Олимпиадэм хэлажьэхэрэр аныбжьыкIэ зэтефыгъэхэу зэнэ­къокъущтых. Лъэныкъо 16-кIэ ар зэтеутыгъэщт. Дэныр, гъэлэныр, пхъэм хэбзыкIыгъэныр, художественнэ дизайныр, текстым Iоф дэшIэгъэныр, къэбарлъыгъэIэс щынэгъончъэныр, веб-дизайныр ары ныбжьыкIэ­хэм нахь къыхахырэр. Мы илъэсым «ПсэолъэшIыныр ыкIи штукатуркэ IофшIэныр» зыфи­Iорэр кIэу къыхэхьагъ.

Мыекъопэ индустриальнэ техникумым щыкIогъэ Iофтхьабзэм джащ фэдэу «Ярмарка вакансий» зыфиIорэр къыщызэIуахыгъ.

ЦIыфхэм IофшIэн ягъэгъотыгъэнымкIэ федеральнэ къулыкъум и ГъэIорышIапIэу Адыгеим щыIэм иIофышIэу Елена Михайловских къызэриIуагъэмкIэ, зипсауныгъэкIэ илэгъухэм акIэмыхьэрэ ныбжьыкIэхэр IофшIэпIэ чIыпIэу щыIэхэм нэIуасэ афашIыгъэх. Непэрэ мафэм ехъулIэу мы купым къыхиубытэрэ нэбгырэ 707-мэ Мые­къуапэ ичIыпIэ зэфэшъхьафхэм Iоф ащашIэ, джыри чIыпIи 103-рэ щыI.

ГъэрекIо апэрэ чIыпIэр къыдэзыхыгъэ Валерия Дерягинар мы илъэсми зэнэкъокъум хэлажьэ. Художественнэ дизайнымкIэ анахь дэгъоу къыхахыгъагъ, мыгъэ данэм сурэтхэр хидыкIынэу зыфигъэсагъ, ащкIэ зиушэтыным фэхьазыр.

— СишIэныгъэхэм ахэзгъэхъо­ныр сикIас, къин къысщэхъуми, кIэухэу фэхъущтыр сшIогъэшIэгъон. Iофэу зыуж сихьэрэр зэшIосэхы. ГъэрекIо текIоны­гъэр къызэрэдэсхыгъэм гухахъо сигъэшIыгъ, къысатыгъэ сертификатымкIэ ноутбукрэ планшетрэ зэзгъэгъотыгъ, — еIо Мые­къопэ индустриальнэ техникумым ятIонэрэ курсым щеджэрэ пшъа­шъэм. Анахь дэгъоу зыкъэзыгъэлъэ­гъуагъэхэр мэлылъфэгъум и 26-м къыхахыщтых, нэужым ахэр Iоныгъо мазэм хэшыпыкIын уцугъом хэлэжьэщтых ыкIи те­кIоныгъэр къыдэзыхыхэрэр Лъэпкъ чемпионатэу Москва щыкIощтым хэлэжьэщтых.

ДЕЛЭКЪО Анет.

Сурэтхэр Iэшъынэ Аслъан тырихыгъэх.