«ЭкоЦентрэм» ишъолъыр оператор хэб­зэн­чъэу ашIыгъэгъэ хэкIитэкъупIэ чIы­пIэр ыукъэбзыжьыгъ. Мызыгъэгум Крас­ногвардейскэ районыр ары амыгъэнэфэгъэ чIыпIэм хэкIыр зыщыратэкъугъэр.

Къоджэ псэупIэу Садовэм иадминистрацие къытыгъэ заявкэмкIэ хэкI кубометрэ 60 Бжъэдыгъухьаблэ дэжь къыщаугъоигъ ыкIи шъолъыр операторым ихэушъхьафыкIыгъэ техникэ ыгъэфедэзэ ар хэушъхьафыкIыгъэ полигоным ащагъ. ПсэолъэшIыным щагъэфедэрэ пкъыгъохэр, нэмыкI пыдзафэхэр а чIыпIэм щызэтыратэкъогъагъ.

«Мы щысэмкIэ тэ джыри зэ нафэ къытфэхъугъ — цIыфхэр тыкъэзыуцухьэрэ дунаир зэрауцIэпIырэм емыгупшысэхэу, хэкIыр зэтыратакъо, ахъщэ зэрамытыщтым фэшI полигоным ащэрэп, нэужым административнэ тазыр зэратыралъхьащтми къыгъэуцухэ­рэп», — къы­Iуагъ пшъэдэкIыжь зыхьырэ обществэу «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Шъугу къэдгъэкIыжьын, компаниеу «ЭкоЦентрэм» зэзэгъыныгъэ дэзышIырэмэ Iофышхо къыпымыкIэу пыдзафэхэр дарагъэщын алъэкIыщт. Сатыу шIыкIэм тетэу хэкIыр зэрэдащыщтымкIэ заявкэхэр мыщ фэдэ адресхэмкIэ яшъутынхэ шъулъэкIыщт: къалэу Мыекъуапэ, ур. Пионерскэр, 297 ыкIи поселкэу Яблоновскэр, ур. Школьнэр,10/1, онлайн шIыкIэм тетэу заявкэр жъугъэхьыщтмэ, жъугъэфедэщт сайтыр: https://adygeya.clean-rf.ru. ГуIэгъу IофкIэ узэрэтеощт телефон номерыр: 8-800-707-05-08, къулыкъу­шIапIэм иер: 8-962-868-14-62. ХэкIыр амыгъэнэфэгъэ чIыпIэхэм ащыратэкъугъэу шъулъэгъумэ, зигугъу къэт­шIыгъэ телефон номерхэмкIэ шъутеон шъулъэкIыщт.