Адыгеим и ЛIышъхьэу КъумпIыл Мурат Iахьзэхэлъ обществэу «Медвежья гора» зыфиIорэм илIыкIохэм зэIукIэгъу адыриIагъ. ЕтIэф хьаджыгъэм икъыдэгъэкIынкIэ республикэм завод щышIыгъэнымкIэ гугъапIэу ыкIи амалэу щыIэхэм ахэр атегущыIагъэх. ЗэIукIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур.

Зы мафэм тонн 400 къыдигъэкIыным ар фытегъэпсыхьэгъэщт. Инвесторым сомэ миллиарди 2-м ехъу производствакIэм пэIуигъэхьанэу рихъухьагъ, IофшIэпIэ чIыпIэ 90-рэ фэдиз щыIэ хъущт. Мы лъэхъаным Iахьзэхэлъ обществэу «Медвежья гора» зыфиIорэр Мые­къопэ районым етIэфыр къыщычIэ­хыгъэныр ары зыуж итыр. Ащ пыдзафэ зыфэмыхъущт производствэ ыгъэпсын мурад иI. ЗыхашIыкIыщтымрэ къыдагъэ­кIыщтымрэ япхыгъэ Iофтхьабзэхэр тэрэзэу зэшIохыгъэ зэрэхъущтхэм экономикэм ылъэныкъокIэ федэ къыхьыщт ыкIи республикэм итранспорт инф­раструктури тегъэкIагъэр нахь макIэ хъущт. КъычIэхыпIэу «Скалистый» зыфиIорэм етIэфыр къыращызэ ашIыщт, мы лъэхъаным ар зыIэ илъыр Iахьзэ­хэлъ обществэу зигугъу къэтшIыгъэр ары. НепэкIэ кIуачIэ зиIэ «технологическэ гъогукIэ» заджэхэрэмкIэ ар зэращэщт.

Нэужым псэупIэу Каменномостскэм къыщызыухьащт, федеральнэ трассэм къекIолIэщт технологическэ гъогукIэ ашIынэу рахъухьагъ.

Тыкъэзыуцухьэрэ дунаим зэрар рамыхыным пае а лъэныкъомкIэ Iофтхьабзэу зэшIуа­хыщтхэм афэгъэхьыгъэу инвесторым къыIотагъ. ГущыIэм пае, заводым шIогъэ ин къэзытыщт укъэбзалъэхэр хэтыщтых. Апэрэ чэзыум ащ фэдэу 11 ащ хагъэ­уцощт.

Адыгэ Республикэм и ЛIышъхьэ промышленнэ производствэм ихэхъоныгъэкIэ ыкIи Iоф­шIэпIэ чIыпIакIэхэр щыIэ хъунхэмкIэ ащ мэхьанэшхо зэриIэр хигъэунэфыкIыгъ. Адыгеим социальнэ-экономикэ хэхъоныгъэу ышIырэм ипсынкIагъэ джыри нахь хэхъоным иамал ащ къытыщт. ЗаводыкIэр ашIын зыхъукIэ тыкъэзыуцу­хьэрэ дунаим икъэбзэныгъэ епхыгъэ шапхъэхэр зэкIэ гъэцэкIэгъэнхэ фаеу хъущт, етIани Мыекъопэ районым зекIо къа­кIорэр нахьыбэ зыщыхъурэ лъэ­хъаным.

Ащ елъытыгъэу псэупIэу Каменномостскэм дэжь, автомобиль гъогумрэ зекIохэр нахьыбэу къызэутэлIэрэ чIыпIэхэмрэ апэIудзыгъэу, заводыр щашIыщт.

Адыгэ Республикэм и ЛIышъхьэ АР-м экономикэ хэхъоныгъэм­кIэ ыкIи сатыумкIэ и Министерствэ пшъэрылъ фишIыгъ инвестициехэм алъэныкъокIэ зигугъу къашIыгъэ Iофтхьабзэм дэгъоу зыщигъэгъозэнэу, цIыф­хэм яеп­лъыкIэ къыдалъытэнэу, тыкъэзыуцухьэрэ дунаим икъэу­хъумэнкIэ шапхъэхэр укъуагъэ мыхъунхэм ынаIэ атыригъэтынэу.

АР-м и ЛIышъхьэ ипресс-къулыкъу