Сомэ миллион 640-рэ Адыгеим къыIукIэщт
Шъолъырхэм хэхъоныгъэ ягъэшIыгъэнымкIэ УФ-м и Правительственнэ комиссие ипрезидиум Урысыем ишъолъыр 53-мэ яинфраструктурэ псэуалъэхэу ипIалъэм къыпэу 2023-рэ илъэсым мылъку къызыфатIупщыщтхэм къадыригъэштагъ. Казначейскэ чIыфэхэу шъолъырхэм къафыхагъэкIыщтхэр 2024-рэ илъэсым мэлылъфэгъум и 30-м нэс атыжьыщтых.
Шъугу къэтэгъэкIыжьы Урысые Федерацием и Президентэу Владимир Путиныр зыкIэтхэжьыгъэ федеральнэ законым инфраструктурэ проектхэм апае казначейскэ чIыфэхэр шъолъырхэм аштэн алъэкIынэу зэритыр.
«Лъэпкъ проектхэм ателъытэгъэ мылъкоу 2024-рэ илъэсымкIэ федеральнэ бюджетым къыщыдэлъытагъэхэр процент зытемылъ казначейскэ чIыфэхэу шъолъырхэм джыдэдэм къаIахын ыкIи къызфагъэфедэн алъэкIыщт, къихьащт илъэсым имэлылъфэгъу ар атырахыжьыщт. Мы Iофыгъор зэрэзэшIуахырэм ренэу гъунэ лъытфыщт», — къыщиIуагъ Владимир Путиным Федеральнэ ЗэIукIэм фигъэхьыгъэ Джэпсалъэм.
Адыгэ Республикэм ыцIэкIэ Къэралыгъо Думэм идепутатэу Владислав Резник зэрэхигъэунэфыкIыгъэмкIэ, социальнэ мэхьанэ зиIэ псэуалъэхэм, гъогухэм ягъэпсын, ягъэцэкIэжьын, ягъэкIэжьын пае казначейскэ чIыфэу сомэ миллион 640-м ехъу Адыгеим къыIукIэщт. Мылъкур къызэрэхагъэкIыщтым ехьылIэгъэ унашъор заштагъэр УФ-м и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж.
«Федеральнэ гупчэм IэпыIэгъоу къытитырэм ишIуагъэкIэ социальнэ псэуалъэхэм ягъэпсынкIэ, инфраструктурэм игъэкIэжьынкIэ итхъухьагъэхэр дгъэцэкIэнхэ тэлъэкIы. Экономикэм хэхъоныгъэ зэрэрагъэшIырэ, цIыфхэм ящыIакIэ зыкъызэрэрагъэIэтырэ амалхэм ар ащыщ», — къыIуагъ АР-м и ЛIышъхьэу КъумпIыл Мурат.
Бюджет мылъкумкIэ автомобиль гъогухэр, искусственнэ псэуалъэхэр джырэ шапхъэхэм адиштэу зэтырагъэпсыхьащтых, Дахъорэ Лэгъонакъэрэ зэзыпхырэ гъогур агъэкIэжьыщт.
Мылъкум щыщ социальнэ инфраструктурэм изэтегъэпсыхьан пэIуагъэхьащт. АщкIэ культурэм и Унэ къуаджэу Хьалъэкъуае щагъэпсыщт, Мыекъуапэ иурамэу Чкаловым ыцIэ зыхьырэм тет поликлиникэм гъэцэкIэжьын IофшIэнхэр рашIылIэщтых, фельдшер-мамыку IэзапIэу Гончаркэ дэтыр, искусствэхэмкIэ кIэлэцIыкIу еджапIэу Тульскэм щыIэр, культурэм и Унэу къутырэу Чернышевым дэтыр агъэцэкIэжьыщтых.
«Адыгэ Республикэм ипащэхэм социальнэ мэхьанэ зиIэ псэуалъэхэм яшIынрэ ягъэкIэжьынрэ япхыгъэ Iофыгъохэм лъэшэу анаIэ атырагъэты. Адыгеим ипащэхэми, «Единэ Россиеми» тырягъусэу ищыкIэгъэ федеральнэ мылъкур республикэм къыфыхэгъэкIыгъэным тапэкIи тишъыпкъэу ыуж титыщт», — къыIуагъ Владислав Резник.