Урысые зэнэкъокъоу «Мастер года» зыфиIорэм иреспубликэ чэзыу Адыгеим непэ щырагъэжьагъ. Егъэ­джэкIо-гъэсакIом и Илъэс фэгъэхьы­гъэу зэхащэрэ Iофтхьабзэхэм ар ащыщ.

Зэнэкъокъум икъызэIухын хэлэжьагъэх АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцэкIэрэ Евгений Лебедевыр, АР-м и Къэралыгъо Совет — Хасэм идепутатхэр, министрэхэм я Кабинет хэтхэр, Урысыем лъэпкъ гъэсэныгъэмкIэ ыкIи шIэныгъэмкIэ иIофышIэхэм я Адыгэ республикэ профсоюз организацие итхьаматэу Сергей Кошкиныр, муниципальнэ образованиехэм япащэхэр, общественнэ ыкIи гъэсэныгъэ организациехэм ялIыкIохэр, кIэлэегъа­джэхэр, студентхэр.

КIэлэегъаджэм имэхьанэ зы­къегъэ­Iэтыгъэныр, сэнэ­хьат зэфэшъхьаф­хэм афэзыгъэсэрэ кIэлэ­егъаджэхэм сэнаущыгъэу ахэ­лъыр гъэунэфыгъэ­ныр, нэмыкIхэм щысэ афэхъунхэр ары пшъэрылъ шъхьа­Iэу зэхэща­кIохэм зыфагъэуцужьырэр.

Евгений Лебедевым Iофтхьабзэр къызэIуи­хыгъ, мы илъэсым егъэджэкIо-гъэ­сакIом епхыгъэ Iоф­тхьабзэхэр бэу зэрэзэхащэхэрэр къыIуагъ. Зэнэкъокъур зэрифэшъуашэу кIонэу ыкIи шъо­лъыр уцугъом пхырыкIэу, Урысые зэнэкъо­къум хэлэжьэщтым текIоныгъэ къыдихынышъ, къэкIорэ илъэсым «Мастер года» зыфиIорэ зэнэкъокъур Адыгеим щызэхащэн амал къаритынэу зэрэгугъэрэр ащ къы­хигъэщыгъ.

Муниципальнэ уцугъохэм текIоныгъэ къащыдэзыхыгъэ нэбгырэ 18-м лъэныкъо зэфэшъхьаф­хэмкIэ сэнаущыгъэу ахэ­лъыр мы мафэхэм къа­гъэлъэгъощт, яIоф­шIэнкIэ агъэфедэрэ шIыкIэхэр къагъэлъэгъощтых.

ДЕЛЭКЪО Анет.